1กจุ้แฆว้ 10 - Northern Pwo Karen Thai Bibleกจุ้แฆว้ มืง ลู่ง เว่ง เชบา เฌ๊ ไจ ซาโลโม อ โอ ( 2ทกน.9:1-28 ) 1 กจุ้แฆว้ มืง ลู่ง เว่ง เชบา แน่ฌ๊า แบ ซาโลโม อ เม้งลื้อแซท้อง, แบฆ้ะ ดี๊ กแช่ยาเว อ ไฌ่ นอ, อ เว๊ เฌ๊ แม้แคว่ดุ้ ซาโลโม, ดี๊ ทไคล้ ไก ดุ้ เท่อ อ ไฌ่ ล เม้ง แบ ล เม้ง 2 กจุ้แฆว้ มืง เฌ๊ ลู่ง เยรูซเลง พ้า ดี๊ อเพล่อบาง แอฌ้อง, เฌ๊ ดี๊ เอ้า น๊างมู๊ง, เฌ๊ ต้าง ทน๊าม๊า, ดี๊ ท๊อง แอฌ้อง, ดี๊ ทแมล่ ลู่ง อ ฆวี้ แค้, ดี๊ ท่อง อ เฌ๊ ท้อง ซาโลโม อ โอ เย้า นอ, ทไฌ่ กุ้เม้ง พี่ โอ อ ซ้ะ พ้า, อ เว๊ โล้ เอะ ซาโลโม ล้อ 3 ดี๊ ซาโลโม ไคล้ช๊า-อ้ะ กุ้ อ เม้ง ล้อ, ทอางกีซูงอางกีบีง ล โอ น่าง เม้ง แบ, พี่ กจุ้แฆว้ ไคล้ช๊า เว๊ ล ซี แบ 4 ท่อง กจุ้แฆว้ มืง เว่ง เชบา, แด ซาโลโม อ ทโกงซีมองแบ กุ้เม้ง, ดี๊ อ บลาง พี่ อ ไต้ทาง เว๊ นอ 5 ดี๊ ทอาง ลู่ง คะ คู, ดี๊ กเย่ ซาโลโม อกดูกแซย่ อ ล่าง ชี๊น้าง, ดี๊ กจุ้แฆว้ อ เพล่ดู ซีง อ ทแม้, เลา ดี๊ อ ซื๊งเว๊ อ ไช๊ อ ช้าง พี่ ไต้ทาง อ ซ้ะ, ดี๊ อ เพล่ พี่ อ เฌ๊ โชะ ท โอ้, เลา ดี๊ อ เว๊ อ ทลื่งทาง เช้า ทพูแฆ่ น๊างดื้ง พี่ อ เทว๊ เว๊ ลู่ง กแช่ยาเวอล่างโอ พ้า นอ, กจุ้แฆว้ มืง โท๊ โย๊ เว๊ เฆาะ ล้อ 6 อ เว๊ ไคล้ ดี๊ กจุ้แฆว้ ไจ้ะเว๊, “ทโล้โค พี่ จ แน่ฌ๊า แบฆ้ะ ดี๊ น ทไพ้ะทแม้, ดี๊ น ทโกงซีมองแบ อ ไฌ่ อ กย้อง ลู่ง จ กแช่ อ ค่าง พ้า อู้ง นอ, เก ทอเมะอโต้ เต้ๆ, ล้อ 7 แบเด้าะ จ ล นะ ทลื่งทไคล้ ลแพ นอ แบ, ท่อง จ นี่ เฌ๊ฆ้าง โอ แบ แน้, จ แด ดี๊ จ กแช่ อ เมะ แด เว๊, แคว่เซ้อ, พี่ โพล้ง โล้ เอะ แย้ นอ, ล พุ้พ๊าง ทาง แบ, น ทโกงซีมองแบ ดี๊ น ทเฌิ่งทค๊า เมะ กลู เมะ จี้ นอ, โอ แอเละ ทโล้โค พี่ จ แน่ฌ๊า แบ-อ้ะ ได้ะ ล้อ 8 กเย่ น โพล้ง ซีงลแพ นอ โอมึโอพ้า, กเย่ น กดูกแซย่ ซีง นอ โอมึโอพ้า, เมะเว๊ โพล้ง พี่ อ โอ แม้ เท่อ ลู่ง น เมะแซ พ้า คระ ซีงลแพ นอ, ดี๊ ช๊องแน น ทโกงซีมองแบ 9 อางปฆ้าทาง กแช่ยาเว น กแช่แยว้, พี่ อ แบ อ ซ้ะ ดี๊ แน้, ดี๊ ต๊างทาง แน้ เกม๊า ชี๊น้าง ลู่ง โพล้ง อีซลาเอง อ กจุ้แฆว้ อ ล่าง ชี๊น้าง คู, เมะเว๊ กแช่ยาเว เอ โพล้ง อีซลาเอง ล้างชู้, อ กย้อง บี่นอ, อ เว๊ ต๊างทาง แน้ ม๊า น เก กจุ้แฆว้, บี่ซุ้ น ม แม้ ทอเกิ้งอแบ, ดี๊ ทแบแยว้อซ้ะ 10 ฌ้อง กจุ้แฆว้ มืง นอ, เกล๊าง เอะ กจุ้แฆว้ ซาโลโม ท๊อง ฆ๊า อ กีโล ลี่ง ม๊า, ดี๊ ทน๊าม๊า แอฌ้อง ได้ะ, ทแมล่ ลู่ง อ ฆวี้ แค้, ทน๊าม๊า เฌ๊ นึฆ้าง แอฌี่งแอฌ้อง, บี่ซุ้ดี๊ กจุ้แฆว้ มืง ลู่ง เชบา เทว๊ เอะ กจุ้แฆว้ ซาโลโม บี่อี้ง นอ, ล โอ น่าง พ๊า ล้าแบ 11 แอเละ อ นอ ได้ะ, ฮีราง อ คลี๊ง น๊างมู๊ง พี่ อ ต้างนี่ ท๊อง ลู่ง โอฟี พ้า นอ, แม้นี่ ดี๊ เซง แล้โฌ้ แอฌ้อง, ดี๊ ทแมล่ ลู่ง อ ลื่ง ดู ฆวี้ แค้ ลู่ง โอฟี พ้า 12 ฌ้อง กจุ้แฆว้ เจ่ เซง แล้โฌ้ นอ, แม้ กแช่ยาเวอล่างโอ อ เทิง, ดี๊ กจุ้แฆว้ อ บลาง อ เทิง, ดี๊ แม้ ทแน่พี่โอดี๊อโน้ง, ดี๊ ทแน่ พ้ะดู ลู่ง โพล้ง ซ้ะอวีงแท๊ พู ซีง อ ฌ่าง, ท้อง ล นี้ง แย๊, อี้ง เซง แล้โฌ้ แอฌี่งแอฌ้อง บี่อี้ง นอ, ล แด เฌ๊ นึฆ้าง น่าง พ๊า ล้าแบ 13 กจุ้แฆว้ ซาโลโม, เกล๊าง เอะ กจุ้แฆว้ มืง เชบา อ ทกุ้ อ เม้ง ฆวี๊ อ แบซ้ะ ดี๊ อางท่าง เว๊ นอ, ฆวี๊ อ อางท่าง เว๊ เย้า ล ก้ะ ได้ะ แบ นอ, ซาโลโม เกล๊าง เอะ กจุ้แฆว้ มืง อ เท่อ ดี๊ ทซ้ะโพล๊, ทบี่นอ, กจุ้แฆว้ มืง ไท้ๆ, ลู่ง อ ที๊งล่างค่างพ้า, เลา ดี๊ อ กดูกแซย่ ซีงลแพ นอ ล้อ 14 ท๊อง พี่ เฌ๊โชะ เทว๊ เอะ ซาโลโม ลู่ง ล เนง อ ฌ่าง นอ, ฆ๊า อ กีโล คี๊งไซ ซ๊า ม๊า 15 ล ก้ะ ได้ะ แบ นอ, ท๊อง พี่ อ เฌ๊นี่ ดี๊ โพล้ง แม้แค้ เท่อ ซีง, ดี๊ โพล้ง แม้เละแม้แค้ เท่อ ซีง, ดี๊ กเย่ กจุ้แฆว้ ค่าง อาระเบีย, ดี๊ กเย่ โพล้งโพะคองเว่ง ลู่ง ที๊งล่างค่างพ้า เว๊ นอ 16 กจุ้แฆว้ ซาโลโม เกม๊า แม้นี่ ท๊อง นอ, ไน๊ เกทาง นางปด้าง พ้ะดู คี๊ง แย้ เบง, นางปด้าง ล เบงๆ, นอ, เจ่ ท๊อง ฆ๊า เมาะเว๊ เนว๊ กีโล 17 ดี๊ อ เว๊ เกม๊า แม้นี่ ท๊อง, ไน๊ เกทาง นางปด้าง อ ปี๊ ล เอ้า นอ ซ๊า แย้ เบง, นางปด้าง ล เบงๆ, นอ เจ่ ท๊อง ฆ๊า คี๊ง กีโล, ดี๊ กจุ้แฆว้ อางกี เว๊ ลู่ง อ ล่างโอไปว้ะชู๊ มแลแกล้ เลบาโนง พ้า 18 กจุ้แฆว้ ไต้ทางนี่ อ ล่าง ชี๊น้าง ดี๊ กช๊าง เม พ้ะดู, พ้าง เว๊ ดี๊ ท๊อง ลู่ง อ แย ฌี้ 19 อ ล่าง ชี๊น้าง นอ โอ ดี๊ ฆ๊าง ฆู๊ง แซว๊, ลู่ง อ ล่างไค๊ อ คูด้าง ล โค๊ นอ ก วองคลอง, ดี๊ อ ล่าง ชี๊น้าง อ ฆ้อง คี๊ง แพ้ นอ, โอ ดี๊ อ ล่าง อางกีล้าง จูง, โอ ดี๊ คี๊ยื่ง อ ฌ้าง คี๊ง ดื้ง, ชี๊เทิง ลู่ง อ ล่าง อางกีล้าง จูง นอ อ ฆ้อง 20 ดี๊ คี๊ยื่ง อ ฌ้าง ล ชี๊ง คี๊ง ดื้ง เด้าะ นอ, ชี๊เทิง ลู่ง ฆ๊าง แซว๊ ฆู๊ง แซว๊ นอ อ ล้อง, ล แซว๊ๆ, นอ, คี๊ง ดื้งๆ, มื่งบ้าง ล โอ น่าง จอง ได้ะ แบ, พี่ อ แม้ เท่อ บี่ซุ้ดี๊ ทลแพ อี้ง 21 กจุ้แฆว้ ซาโลโม อ เจเล โท๊กีง กุ้ อ เม้ง นอ, ไต้ เว๊ ดี๊ ท๊อง เลาพะ, ทพ้าทล่าง กุ้ อ เม้ง ลู่ง อ ล่างโอไปว้ะชู๊ มแลแกล้ เลบาโนง พ้า นอ, แม้ เว๊ ดี๊ ท๊อง ลู่ง อ แย ฌี้, แม้ เว๊ ดี๊ จี้ ล โอ น่าง เม้ง แบ เฆาะ, ลู่ง ซาโลโม อ ชู้ แค๊ นอ, จี้ นอ แคว่ เว๊ เก เท่อ พี่ อลื่งอฆวี้ ล โอ แบ ล้อ 22 เมะเว๊ กจุ้แฆว้ นอ, โอ ดี๊ อ คลี๊ง น๊างมู๊ง ลู่ง เว่ง ทาราชิ้ พ้า, ลี้ ซกุ้ เท่อ ดี๊ ฮีราง อ คลี๊ง น๊างมู๊ง ลู่ง ปางเล พ้า, คลี๊ง น๊างมู๊ง ลู่ง เว่ง ทาราชิ้ พ้า นอ แม้นี่ ท๊อง, จี้, กช๊าง เม, โพ๊ไล้ะ, ดี๊ ทูซยะ เฌ๊ไท้โชะ เว๊ ซ๊า เนง ล พ๊า 23 อ กย้อง บี่นอ, กจุ้แฆว้ ซาโลโม อ ทโอทช๊อง, ดี๊ อ ทโกงซีมองแบ โอ ดูเละ กจุ้แฆว้ กุ้ แฌ้ๆ, ลู่ง ฌางคูโคล๊งคู อี้ง นอ ล้อ 24 โพล้ง ฌางคูโคล๊งคู น๊างเบง แย๊ นอ, แบซ้ะ เฌ๊ โอ ซาโลโม, บี่ซุ้ ม ช๊องแน เว๊ อ ทโกงซีมองแบ, พี่ กแช่แยว้ อางกีล้าง เว๊ ลู่ง อ ซ้ะ พ้า นอ 25 โพล้ง กุ้ อ แฌ้ เฌ๊ โชะ อ ทแบเกล๊าง, เมะเว๊ ทพ้าทล่าง พี่ อ เก จี้, ดี๊ ทพ้าทล่าง พี่ อ เก ท๊อง, ไช๊ ช้าง, นางดึ้นางชาง, ทน๊าม๊า, กซี, ดี๊ แนว้ น๊างมู๊ง, ฆวี๊ซุ้ ดี๊ แบ ทอางกีล้างนี่-อ้ะ กุ้ เนงๆ, นอ ล้อ 26 ซาโลโม อางกีซยองนี่ เลาะ ดึ้ซึ้ เท่อ ดี๊ ซึ้พู เทา กซี, อ เว๊ อ เลาะ ดึ้ซึ้ เท่อ โอ ล ม๊า ลี่ง แย้ ช๊อง, ดี๊ ซึ้พู เทา กซี โอ ล ไซ คี๊ง ม๊า แฌ้ อ นอ เกม๊า เว๊ อ โอ ลู่ง เว่ง ทล่าง อางกี เลาะ ดึ้ซึ้ เท่อ อ ล่าง, ดี๊ โอ ดี๊ กจุ้แฆว้ ลู่ง เว่ง เยรูซเลง พ้า 27 ดี๊ กจุ้แฆว้ ดึ้ เกม๊า จี้ ลู่ง เว่ง เยรูซเลง พ้า นอ, แอ แบด้องซุ้ โล่ง ดี๊ ดึ้ เกม๊า ซย๊องซีดา โอ แอฌี่งแอฌ้อง, แบด้องซุ้ กูงเย้ มื่งเทิง, ลู่ง ทลู่ง เชเฟลา คู นอ ล้อ 28 กซี พี่ อ เก ซาโลโม อ ทเละทแค้, พี่ อ โอ ลู่ง ค่าง อีไย้ะ พ้า ดี๊ คูเอ พ้า เฌ๊ นึฆ้าง, ดี๊ กเย่ กจุ้แฆว้ อ โพล้ง แม้แค้ เท่อ, นี่แบ กซี ลู่ง คูเอ พ้า, บี่ซุ้ดี๊ อ ฆวี้ โอ นอ 29 เลาะ ดึ้ซึ้ เท่อ, พี่ อ โอ ลู่ง ค่าง อีไย้ะ พ้า เฌ๊ นึฆ้าง นอ, ล ช๊อง นอ อ ฆวี้ ฆู๊ง แย้ เชเค่ง กซี ล ดื้ง นอ, อ ฆวี้ ล แย้ เย่ ชี๊ง เชเค่ง ทบี่นอ, ลู่ง โพล้ง แม้แค้ เท่อ อ กย้อง นอ, อ เว๊ โซ๊งทาง เว๊ ลี้ ลู่ง โพล้ง ฮีไท อ กจุ้แฆว้ ลแพ นอ, ดี๊ ลี้ ลู่ง โพล้ง ซีเรีย ซีง ลแพ อ กจุ้แฆว้ อ โอ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society