1กจุ้แฆว้ 1 - Northern Pwo Karen Thai Bibleทย้ะโละนี่ โละซ้ะ ล่างชี๊น้างโพะคองเท่อ 1 กจุ้แฆว้ ดาเว อ โญะ แอ ดี๊ อ ซ้ะแซย่ น้ะ เย้า, ทึเมะ โพล้ง ดึ้ มี๊งลึ้ เอะ อ แบย แอ เบง ฌี้ๆ, ล ล้าทาง-อ้ะ น่าง เม้ง แบ 2 กเย่ อ กดูกแซย่ ลแพ นอ ไจ้ะเว๊, “เกม๊า โพล้ง อางฆื๊ง นี่ โพล้งมืงน้างเช๊งเกล้ง, เฌ๊ โอ ดี๊ ก เซงคู กจุ้แฆว้ ล แฌ้, ดี๊ กมืง นอ ม โอ ยู่ โอ แคว่ เว๊, เกม๊า อ เว๊ มี๊ง ลู่ง กจุ้แฆว้ อ ฌื๊งละ พ้า, บี่ซุ้ จ เซงคู กจุ้แฆว้ นอ ม ล้าทาง” 3 อ ซื๊งเว๊ อางฆื๊ง นี่ โพล้ง มืงน้าง ลู่ง อ ฌี้ ทึ, เฆ้ง ค่าง อีซลาเอง พ้า, ฌ้อง แด โพล้ง มืง ล แฌ้ อ เม้ง น่าง อาบีชา, เก โพล้ง ชูเนง, โพล้ง เฌ๊ฌ้า-อ้ะ ม๊า เฌ๊ฆ้าง โอ กจุ้แฆว้ 4 โพล้ง มืง ล แฌ้ นอ ฌี้ เต้ๆ, อ เว๊ เก แบโพล้ง โอ แคว่ กจุ้แฆว้, ดี๊ แม้ เอะ เว๊ อ เท่อ, แบเด้าะ กจุ้แฆว้ ล นี่ ไพ้ะ นี่ แย-อ้ะ น่าง เม้ง แบ 5 น่าง ฮะกี อ พูแคว๊ เมะเว๊, อาโดนียา อางกีทางโท๊ อ ซ้ะ ไคล้ทาง ไจ้ะเว๊, “แย้ โย้ ล้อ จ ม เก กจุ้แฆว้”, อ เว๊ นอ แด้เว้ เลาะ ดึ้ซึ้ เท่อ, ดี๊ ซึ้พู เทา กซี, ดี๊ โพล้ง เย่ ชี๊ง แฌ้ อางกี เว๊ ลี้ ซยู๊ วี่ง ลู่ง อ เมะแย๊ 6 อ แพ่ โพะ เว๊ อ ซ้ะ น๊างชู้, “น แม้ บี่อี้ง แม้ ทเล้?”, นอ, อ แพ่ ล ไจ้ะ-อ้ะ น่าง พ๊า แบ, อ เว๊ อี้ง นอ, เก โพล้ง อเค่งแบฌ้างฌี้ อ เมะ ฌี้ แน๊ ฌี้, อ เว๊ กึทาง เท่ง ดี๊ อะซาโลง 7 อ เว๊ ฆู๊ง โละอซ้ะ ช๊องมอง ซกุ้ เท่อ ดี๊ น่าง เซรูยา อ พู, เมะเว๊ โยอะ, ดี๊ โพล้งลื่งเท่ออคู อาบียาทา, อ ซื๊งเว๊ คี๊ง แฌ้ อี้ง โพะ อาโดนียา อ ไค๊, ดี๊ แม้ช้า เว๊ 8 แบเด้าะ โพล้งลื่งเท่ออคู ซาโด, ดี๊ เบไนยา เยโฮยาดา อ พู, ดี๊ นาทาง โมไคล้คิ้กแช่แยว้, ชีเมอี, ดี๊ เรอี, ดี๊ ดาเว อ ซึ้พู ดึ้เท่อ ซี ทึ ซีงลแพ นอ, ล โอ ล แพ้ ฆ่าง ดี๊ อาโดนียา แบ 9 อาโดนียา แม้ซี๊ง แกะ, งู้, ดี๊ ทพูแฆ่ ลู่ง อ บองอืง นอ, เก ทเทว๊ ลื่งทาง เท่อ ลู่ง ไล๊ คู โซเฮเละ, พี่ อ โอ ที๊ง ทางชุ้ เองโรเกง อ ฆ้อง, อ เว๊ กุ้นี่ อ พื่ง อ วี่ เลาพะ, เมะเว๊ กเย่ กจุ้แฆว้ อ พูแคว๊ ลแพ นอ, ดี๊ โพล้งเฌงพูฆ๊างพู ยูดา, พี่ อ เก กจุ้แฆว้ อ กดูกแซย่ 10 แบเด้าะ อ เว๊ ล อางจ้ะนี่ นาทาง โม ไคล้คิ้ กแช่แยว้, เบไนยา, ซึ้พู พี่ อ ดึ้ เท่อ ซี ทึ ซีงลแพ, ดี๊ อ พื่ง ซาโลโม นอ น่าง เม้ง แบ 11 ฌ้อง นาทาง ไคล้ ดี๊ น่าง บะเชบา, เมะเว๊ ซาโลโม อ มู่ นอ ไจ้ะเว๊, “น ล ดุ้ น แน่ แบ-อ้า?, อาโดนียา น่าง ฮะกี อ พูแคว๊ นอ เก กจุ้แฆว้ เย้า, ดี๊ เฆ้อ ซีงลแพ อี้ง, ก เซงคู ดาเว นอ ล ซีงแฌ๊ ทน่าง เม้ง แบ 12 อ กย้อง บี่นอ, จ ม โล้ฌ้าเนฌ้า เอะ แน้ บี่อี้ง, บี่ซุ้ ม แม้พ้องพลิ้ น กแช่ อ ทโอม๊า, ดี๊ น พูแคว๊ ซาโลโม อ ทโอม๊า 13 เกม๊า น ปชื่ง ลี้ฆ้าง โอ กจุ้แฆว้ ดาเว, ฌ้อง ไคล้ ดี๊-อ้ะ บี่อี้ง, ‘จ เซงคู กจุ้แฆว้-เอ้อ, น นี่ อืงล้าง เว้ เท่อ ดี๊ น เพล่ มืง น ไจ้ะ, “น พูแคว๊ ซาโลโม ม เก กจุ้แฆว้ เท่งก้ะ แย้, ดี๊ ม ชี๊น้าง ลู่ง จ ล่างชี๊น้าง คู ล เมะ แบ-อ้า?”, ฌ้อง แบ ทเล้?, อาโดนียา เก ก้ะ กจุ้แฆว้ ก้ะ เด้าะ’ 14 แคว่เซ้อ, พี่ ล โท้ แย๊ น ไคล้ ดี๊ กจุ้แฆว้ ได้ะ อ แค๊ นอ, แย้ จ ม ลี้ฆ้าง โอ กจุ้แฆว้ ปะ, ดี๊ จ ม ไคล้ อืง โพะ น ทไคล้ อ ไค๊ 15 ฌ้อง น่าง บะเชบา ลี้ฆ้าง โอ กจุ้แฆว้, ลู่ง อ ล่าง มี๊ง พ้า, (กจุ้แฆว้ นอ อ ซ้ะแซย่ น้ะ เย้า, ดี๊ น่าง อาบีชา โพล้ง ชูเนง มืง นอ, โอ แม้ เอะ กจุ้แฆว้ อ เท่อ พี่ นอ) 16 ท่อง น่าง บะเชบา ไคล้ะล้าง อ คาง, ซย๊องล้าง อ คู, ลู่ง กจุ้แฆว้ อ เมะแซ พ้า ฌ้อง เย้า นอ, กจุ้แฆว้ อางจ้ะ-อ้ะ ไจ้ะเว๊, “น แบซ้ะ ทเม้งเล้?” 17 อ เว๊ โล้ เอะ-อ้ะ ไจ้ะเว๊, “จ เซงคู-เอ้อ, น อืงล้าง เว้ เท่อ ลู่ง กแช่ยาเว น กแช่แยว้ อ เม้ง, น โล้ เอะ น เพล่ มืง บี่อี้ง, ‘น พูแคว๊ ซาโลโม ม เก แบ กจุ้แฆว้ เท่งก้ะ แย้ เต้ๆ, ล้อ, ดี๊ อ เว๊ นอ ม ชี๊น้าง ลู่ง จ ล่าง ชี๊น้าง คู’ 18 แคว่เซ้อ, ค๊องเนงอี้ง, อาโดนียา เก กจุ้แฆว้ เย้า, ทึเมะ แน้ เมะเว๊ จ เซงคู กจุ้แฆว้ น ซีงแฌ๊ น่าง เม้ง เอะ 19 อ เว๊ แม้ซี๊ง งู้, ทพูแฆ่ ลู่ง อ บอง, ดี๊ แกะ แอฌ้อง เก ทเทว๊ ลื่งทาง เท่อ, อ เว๊ กุ้นี่ กเย่ กจุ้แฆว้ อ พูแคว๊ ลแพ นอ, ดี๊ โพล้งลื่งเท่ออคู อาบียาทา, ดี๊ ซึ้พูมู๊งอคูดู โยอะ, แบเด้าะ ล กุ้นี่ น เพล่ ซาโลโม แบ 20 แน้ เมะเว๊ จ เซงคู กจุ้แฆว้-เอ้อ, ค๊องเนงอี้ง, โพล้ง อีซลาเอง เลาพะ นอ คุ้แคว่ดุ้ แน้, บี่ซุ้ น ม ไคล้ ดี๊ อ ซื๊งเว๊ซีง บี่อี้ง, น ม เกม๊า โพล้ง เล้, ชี๊น้าง ลู่ง จ เซงคู กจุ้แฆว้ อ ล่าง ชี๊น้าง คู เท่งก้ะ น ล่าง 21 เมะ ล บี่นอ แบ นอ, ท ม แม้ อ ซ้ะ บี่อี้ง, พี่ จ เซงคู กจุ้แฆว้ เมะ ซี๊ง ไท้ โอ ดี๊ อ พี๊ง อ พู๊ง ลู่ง แย๊ อู้ง โฆะ นอ, แย้ ดี๊ จ พูแคว๊ ซาโลโม, ม แบ ทแคว่-อ้ะ เก เท่อ ลู่ง อ ไพ้ะ ล แพ้ นอ” 22 พี่ น่าง บะเชบา ไคล้ ดี๊ กจุ้แฆว้ ได้ะ อ แค๊ นอ, โม ไคล้คิ้ กแช่แยว้ นาทาง เฌ๊ฆ้าง 23 อ ซื๊งเว๊ซีงลแพ นอ, โล้ เอะ กจุ้แฆว้ ไจ้ะเว๊, “อ อี้ง นอ เก โม ไคล้คิ้ กแช่แยว้ นาทาง”, ท่อง นาทาง เฌ๊ฆ้าง ลู่ง กจุ้แฆว้ อ เมะแซ พ้า นอ, อ เว๊ ซย๊องล้าง อ ซ้ะ อ เมะ ท้องล้าง ฌางคู คู 24 นาทาง ไคล้ทาง ไจ้ะเว๊, “จ เซงคู กจุ้แฆว้-เอ้อ, น โล้ ชี่ ว้า, ‘อาโดนียา ม เก กจุ้แฆว้ เท่งก้ะ แย้, ดี๊ ม ชี๊น้าง ลู่ง จ ล่าง ชี๊น้าง คู’ 25 เมะเว๊ ล นี้ง แย๊ อี้ง นอ, อ เว๊ ลี้ ล้าง แม้ซี๊ง งู้, แม้ซี๊ง ทพูแฆ่ ลู่ง อ บอง, ดี๊ แกะ แอฌ้อง, เก ทเทว๊ ลื่งทาง เท่อ, ดี๊ กุ้นี่ กเย่ กจุ้แฆว้ อ พูแคว๊ ลแพ นอ, เลา ดี๊ ซึ้พูมู๊ง อ คู ดู, ดี๊ โพล้งลื่งเท่ออคู อาบียาทา, แคว่เซ้อ, อ ซื๊งเว๊ซีง, อาง เท่อ โอ้ เท่อ ลู่ง อ เว๊ อ เมะแซ พ้า, ดี๊ ไจ้ะเว๊, ‘เกม๊าเต้ กจุ้แฆว้ อาโดนียา ดูทางโท๊ทาง’ 26 แบเด้าะ, แย้ เมะเว๊ น เพล่, ดี๊ โพล้งลื่งเท่ออคู ซาโด, ดี๊ เยโฮยาดา อ พู เมะเว๊, เบไนยา, ดี๊ น เพล่ ซาโลโม นอ, อ เว๊ ล กุ้นี่ เว๊ แบ 27 ทกึทาง อ ซ้ะ บี่อี้ง นอ เฌ๊นี่ ดี๊ แน้, เมะเว๊ จ เซงคู กจุ้แฆว้ นอ-อ้า, ดี๊ น ล นี่ ไคล้ ดี๊ น เพล่ แบ พี่ ม ไจ้ะ, ม เกม๊า โพล้ง พี่ แฌ้ เล้, ชี๊น้าง ลู่ง จ เซงคู กจุ้แฆว้ อ ล่าง ชี๊น้าง คู เท่งก้ะ น ล่าง” ซาโลโม โพะคอง ทาง เท่อ (1ทกน.29:22ข-25) 28 ฌ้อง กจุ้แฆว้ ดาเว ไคล้ช๊า-อ้ะ ไจ้ะเว๊, “กุ้นี่ บะเชบา ม๊า เฌ๊ฆ้าง โอ แย้”, ฌ้อง น่าง บะเชบา เฌ๊ฆ้าง ชี๊เทิง ลู่ง กจุ้แฆว้ อ เมะแซ พ้า 29 ฌ้อง กจุ้แฆว้ อืงล้าง อ ซ้ะ บี่อี้ง, “กแช่ยาเว พี่ อ แม้ช้า แย้ พ้องไฆวะ ดี๊ ทน้ะทโน๊ง กุ้ อ เม้ง ล แฌ้ นอ, โอม๊า ได้ะ บี่จะเล้ นอ 30 ล นี้ง แย๊ อี้ง, จ ม แม้ บี่ซุ้ดี๊ จ อืงล้าง เว้ เท่อ ดี๊ แน้, ลู่ง กแช่ยาเว โพล้ง อีซลาเอง อ กแช่แยว้ อ เม้ง บี่นอ ล้อ, เมะเว๊, ‘น พูแคว๊ ซาโลโม ม เก กจุ้แฆว้ เท่งก้ะ แ ย้ โฆะ เต้ๆ, ล้อ, ดี๊ ม ชี๊น้าง ลู่ง จ ล่าง ชี๊น้าง คู เท่งก้ะ แย้’, จ ม แม้ บี่นอ ล นี้ง แย๊ อี้ง” 31 ฌ้อง น่าง บะเชบา ไคล้ะล้าง อ คาง, อ เมะ ท้องล้าง ฌางคู คู ดี๊ ไจ้ะเว๊, “เกม๊าเต้ จ เซงคู กจุ้แฆว้ ดาเว อ ดูทางโท๊ทาง ล้างชู้” 32 กจุ้แฆว้ ดาเว โล้ เว๊, “เกม๊า ลี้ กุ้นี่ โพล้งลื่งเท่ออคู ซาโด, ดี๊ นาทาง โม ไคล้คิ้ กแช่แยว้, ดี๊ เยโฮยาดา อ พู, เมะเว๊ เบไนยา นอ ม๊า อ เฌ๊ฌูง แย้”, ฌ้อง อ ซื๊งเว๊ซีงลแพ นอ, เฌ๊ฆ้าง ลู่ง กจุ้แฆว้ อ เมะแซ พ้า 33 ดี๊ กจุ้แฆว้ ไคล้ ดี๊ อ ซื๊งเว๊ซีงลแพ นอ ไจ้ะเว๊, “เกม๊า น ซื๊ง ลี้ฌ้า กเย่ น เซงคู อ กดูกแซย่ นอ, ลี้ เกม๊า จ พูแคว๊ ซาโลโม เทา ทาง จ ล้อ ล ดื้ง นอ อ คู, ดี๊ ลี้ล้าง ฌ้า-อ้ะ ลู่ง ทล่าง ที๊ง ทางชุ้ กีโฮง 34 เกม๊า โพล้งลื่งเท่ออคู ซาโด, ดี๊ นาทาง โม ไคล้คิ้ กแช่แยว้ นอ, เท้าไน ต๊างทาง-อ้ะ, เก โพล้ง อีซลาเอง อ กจุ้แฆว้ พี่ นอ, ฌ้อง เกม๊า น ซื๊งซีง อูง เซ๊ทาง ควี้ ทโน้ง, ดี๊ โล้ล้าง-อ้ะ บี่อี้ง, ‘เกม๊าเต้ กจุ้แฆว้ ซาโลโม ดูทางโท๊ทาง’ 35 ฌ้อง เกม๊า น ซื๊ง เฌ๊ไท้ ทางโพะ อ ไค๊, ดี๊ อ เว๊ ม เฌ๊ไท้ ชี๊น้าง ลู่ง จ ล่าง ชี๊น้าง คู, เมะเว๊ อ เว๊ ม เก กจุ้แฆว้ เท่งก้ะ แย้, แย้ จ อางแบเลา อ เว๊, ม๊า อ เก ทอคูดู ลู่ง โพล้ง อีซลาเอง ดี๊ ยูดา อ แกล้” 36 เยโฮยาดา อ พู เมะเว๊ เบไนยา, ไคล้ช๊า กจุ้แฆว้ ไจ้ะเว๊, “อาเมง, พี่ จ เซงคู กจุ้แฆว้ ไคล้ เท่อ นอ, เกม๊า เต้ กแช่ยาเว ไคล้ เว๊ บี่นอ ปะ 37 กแช่ยาเว โอ ดี๊ จ เซงคู กจุ้แฆว้ บี่จะเล้ นอ, เกม๊าเต้ โอ ดี๊ ซาโลโม บี่นอ ปะ ล้อ, ดี๊ เกม๊า ซาโลโม อ ล่าง ชี๊น้าง ดูเละ โท๊เละ, จ เซงคู กจุ้แฆว้ ดาเว เว๊ แด นอ ได้ะ” 38 ทบี่นอ, โพล้งลื่งเท่ออคู ซาโด, นาทาง โม ไคล้คิ้ กแช่แยว้, ดี๊ เยโฮยาดา อ พู เมะเว๊ เบไนยา, โพล้ง เคเรที, ดี๊ โพล้ง เปเละ ลี้ แม้นี่ กจุ้แฆว้ ดาเว อ ล้อ ล ดื้ง, เกม๊า ซาโลโม เทา ทาง เว๊, ดี๊ เฌ๊ฌ้า เว๊ ท้อง ลู่ง ทล่าง ที๊ง ทางชุ้ กีโฮง 39 ฌ้อง โพล้งลื่งเท่ออคู ซาโด, แม้นี่ ทพูแฆ่ อ โน้ง พี่ ทซู โอ อ พ้า นอ, ลู่ง เด้กแช่แยว้อล่างโอ พ้า, ดี๊ เท้าไน เฆาะ ซาโลโม, ดี๊ อ ซื๊งเว๊ซีง อูง เซ๊ทาง ควี้ ทโน้ง, ดี๊ โพล้งเฌงพูฆ๊างพู เลาพะ นอไจ้ะเว๊, “เกม๊าเต้ กจุ้แฆว้ ซาโลโม ดูทางโท๊ทาง” 40 ฌ้อง โพล้งเฌงพูฆ๊างพู เลาพะ นอ, ลี้ทาง โพะ เว๊ อ ไค๊, ต้ะ อูง ดี๊ ปี้ง, ดี๊ ซ้ะอวีงซ้ะโทะ ฌี้ มะ, อ ซื๊งเว๊ เซ๊ อึๆ, ฌางคู เทาทื้ง โย๊ เฆาะ 41 ท่อง อาโดนียา, ดี๊ กเย่ โพล้ง พี่ โอ ดี๊-อ้ะ อาง เท่อ ฌ้อง เย้า นอ, แน่ฌ๊า ท อ ลู่ง นอ, ดี๊ ท่อง โยอะ แน่ฌ๊า ควี้ ทโน้ง เซ๊ทาง นอ, ไคล้ทาง ไจ้ะเว๊, “แบทเล้, โบ่, ลู่ง เว่ง พ้ะ ดู พ้า โอ ดี๊ ท อ ลู่ง เซ๊ตทูงเซ๊ล้างคล้าง? 42 พี่ โยอ้ะ ไคล้ ล คลึ้ ทึ ได้ะ แบ นอ, แคว่เซ้อ, โพล้งลื่งเท่ออคู อาบียาทา อ พู เมะเว๊ โยนาทาง นอ เฌ๊ ท้อง เมาะ, ดี๊ อาโดนียา ไคล้ทาง ไจ้ะเว๊, “เฌ๊ฆ้าง แดเทา, เมะเว๊ แน้ น เก โพล้ง ลู่ง อ ฌี้ น ม เฌ๊ โล้ ทโล้โค ลู่ง อ ฌี้ เย้า” 43 แบเด้าะ โยนาทาง ไคล้ช๊า อาโดนียา ไจ้ะเว๊, “ล เมะ ทฌี้ อ ไฌ่ แบ, เมะเว๊ เฆ้อ ก เซงคู กจุ้แฆว้ ดาเว นอ, ดึ้ เกม๊า ซาโลโม เก กจุ้แฆว้ 44 ดี๊ กจุ้แฆว้ อางแบเลา เว๊, เกม๊า โพล้งลื่งเท่ออคู ซาโด, นาทาง โม ไคล้คิ้ กแช่แยว้, ดี๊ เยโฮยาดา อ พู เมะเว๊ เบไนยา, ดี๊ โพล้ง เคเรที, ดี๊ โพล้ง เปเละ นอ ลี้ โพะ ซาโลโม อ ไค๊, ดี๊ อ ซื๊งเว๊ซีง เกม๊า ซาโลโม เทา ทาง กจุ้แฆว้ อ ล้อ ล ดื้ง อ คู 45 โพล้งลื่งเท่ออคู ซาโด, ดี๊ นาทาง โม ไคล้คิ้ กแช่แยว้ นอ, เท้าไน ต๊างทาง ซาโลโม เก กจุ้แฆว้, ลู่ง ทล่าง ที๊งทางชุ้ กีโฮง, ฌ้อง อ ซื๊งเว๊ซีง ไจทางไฆวะ พี่ นอ, ดี๊ ท ซ้ะอวีงซ้ะโทะ, ทบี่นอ, ลู่ง เว่ง พ้า โอ ดี๊ ท อ ลู่ง เซ๊ตทูงเซ๊ล้างคล้าง, อ อี้ง ล้อ เก ท อ ลู่ง พี่ น ซื๊งซีง แน่ฌ๊า-อ้ะ นอ 46 ล ก้ะ ได้ะ แบ นอ, ซาโลโม นี่ ชี๊น้าง แบ ลู่ง กจุ้แฆว้ อล่าง ชี๊น้าง คู เย้า 47 ดี๊ แอเละ อ นอ ได้ะ นอ, กเย่ กจุ้แฆว้ อ กดูกแซย่ ซีงลแพ นอ, ลี้ฆ้าง ชูฌี้ เอะ ก เซงคู กจุ้แฆว้ ดาเว อ เท่อ ไจ้ะเว๊, ‘เกม๊าเต้ น กแช่แยว้, ดึ้ เกม๊า ซาโลโม อ เม้งลื้อแซท้อง ดูเละ น กแช่ อ เม้ง, ดี๊ ดึ้ เกม๊า ซาโลโม อ ล่าง ชี๊น้าง นอ, ดูเละ โท๊เละ น กแช่ อ ล่าง ชี๊น้าง’, ฌ้อง กจุ้แฆว้ นอ, บุ้ล้าง อ ซ้ะ ลู่ง ล่าง มี๊ง คู 48 ดี๊ กจุ้แฆว้ ไคล้ เว๊ บี่อี้ง ปะ, ‘อางปฆ้าทาง กแช่ยาเว โพล้ง อีซลาเอง อ กแช่แยว้, พี่ อ เกม๊า โพล้ง ล แฌ้ ชี๊น้าง ลู่ง จ ล่าง ชี๊น้าง คู ล นี้ง แย๊ อี้ง, ดี๊ จ แด แบ-อ้ะ ดี๊ จ เมะ เย้า’, ” 49 ฌ้อง กเย่ โพล้ง พี่ อ ลี้ อาโดนียา อ ทลื่งอาง พ้า ลแพ นอ, ซ้ะเม เท่อ ว้ะโทะ โย๊ เฆาะ, ล แฌ้ๆ, เฌ้เทิงทาง ไท้ ลู่ง อ กแช่ อ เกล้ อ พ้า แด เว๊ นอ ล้อ 50 เมะ อาโดนียา นอ ซ้ะเม ซาโลโม, อ เว๊ เฌ้เทิงทาง ลี้ฆ้าง พอง ทลื่งล่าง อ โน้ง นอ คระ 51 โพล้ง ลี้ โล้ แบ ซาโลโม ไจ้ะเว๊, “แคว่เซ้อ, อาโดนียา ซ้ะเม กจุ้แฆว้ ซาโลโม, แคว่ อี้ง เซ้อ, อ เว๊ พองทะ ทลื่งล่าง อ โน้ง คระ, ไจ้ะเว๊, ‘เกม๊าเต้ กจุ้แฆว้ ซาโลโม, อืงล้าง เท่อ ดี๊ แย้ บี่อี้ง ท่อง อ ฌ้อง, ล แม้ซี๊ง อ เพล่ อี้ง ดี๊ น้ะ แบ’, ” 52 ซาโลโม ไจ้ะเว๊, “อ เว๊ เมะ เนโพลทาง อ ซ้ะ เก โพล้ง ฌี้ นอ, ทึเมะ อ คูซู๊ง ล บ้อง ฌี้, ล ล้างเทะ ฌางคู คู แบ, แบเด้าะ เมะ แด ทอ้าทซ๊าง โอ ดี๊-อ้ะ นอ, อ เว๊ ม แบ ทแม้ซี๊ง ล้อ” 53 กจุ้แฆว้ ซาโลโม เจ่ โพล้ง, เกม๊า อ เฌ๊ไท้ล้างฌ้าไฆวะ อาโดนียา ลู่ง ทลื่งล่าง นอ, ดี๊ อ เว๊ เฌ๊ คะด้ะ ล้าง อ ซ้ะ ลู่ง กจุ้แฆว้ ซาโลโม อ เมะแซ พ้า, ดี๊ ซาโลโม ไคล้ ดี๊-อ้ะ ไจ้ะเว๊, “ไท้ ลู่ง น บลาง พ้า แดเทา” |
Pwo Karen Bible (Thailand) © Thailand Bible Society, 2016.
Thailand Bible Society