1ทกวิ้ไน 29 - Northern Pwo Karen Thai Bibleทเทว๊ ลู่ง ทไต้ทาง กแช่แยว้ อ เว่งฮ๊าง อ ฌ่าง 1 ดี๊ กจุ้แฆว้ ดาเว ไคล้ ดี๊ โพล้ง น๊างมู๊ง เลาพะ นอ ไจ้ะเว๊, “จ พู ซาโลโม พี่ อ เก โพล้ง ล แฌ้ ล้อ, ลู่ง กแช่แยว้ อางลึนี่ เว้-อ้ะ, อ เว๊ เก โพล้ง บาง ดี๊ อ ทซีงแฌ๊แน่ฌ๊า ล โอ ได้ะ แบ, ทแม้ อี้ง นอ พ้ะดู พ้ะโท๊, เมะเว๊ เว่งฮ๊าง นอ ล เมะ ลู่ง โพล้ง อ ฌ่าง แบ, แบเด้าะ ลู่ง กแช่ยาเว, กแช่แยว้ อ ฌ่าง ล้อ 2 ทบี่นอ, แย้ จ แด้เว้ เท่อ ลู่ง จ กแช่แยว้อล่างโอ นอ อ ฌ่าง, ฆวี๊ จ ทซีทแบ โอ นอ, อ นอ เมะเว๊ ท๊อง ลู่ง เท่อ พี่ ไต้ ดี๊ ท๊อง นอ อ ฌ่าง, จี้ ลู่ง เท่อ พี่ ไต้ ดี๊ จี้ นอ อ ฌ่าง, ท่อง บ้าง ลู่ง เท่อ พี่ ไต้ ดี๊ ท่อง บ้าง นอ อ ฌ่าง, ท้ะ ลู่ง เท่อ พี่ ไต้ ดี๊ ท้ะ นอ อ ฌ่าง, ดี๊ เซง ลู่ง เท่อ พี่ ไต้ ดี๊ เซง นอ อ ฌ่าง, ทแมล่ โฌ้ ซวีง, ดี๊ โกย ลู่ง ม บล้าล้าง เกาะ, โล่งกีงไก้, ทแมล่ ลู่ง อ ฆวี้ แค้ กุ้ อ เม้ง, ดี๊ โล่ง บางแอฌ้อง อ ฌ่าง 3 แอเละ อ นอ ได้ะ, ทกุ้เม้ง พี่ จ อางฆื๊งนี่ เว้-อ้ะ ลู่ง กแช่แยว้อล่างโอ ฌี้แอว้ อ ฌ่าง นอ โอเจ ได้ะ, โอ ดี๊ ท๊อง ดี๊ จี้ พี่ เก จ กแช่ อ เท่อ, ดี๊ เมะเว๊ ลู่ง จ ทเอทกวี้ง พี่ จ เอ แบ จ กแช่แยว้อล่าง นอ, จ ม เกล๊าง เอะ จ กแช่แยว้อล่างโอ นอ บี่อี้ง 4 ท๊อง อ กีโล ล ล้าง, เก ท๊อง พี่ เฌ๊นี่ ลู่ง โอฟี พ้า, ดี๊ จี้ พี่ โล๊ล้าง-อ้ะ เย้า นอ คี๊ง ล้าง ลี่ง ไซ กีโล, บี่ซุ้ ม เจ่-อ้ะ ด้ะไบ้ะ กแช่แยว้อล่างโอ อ ดอง 5 ท๊อง ลู่ง เท่อ พี่ ไต้ ดี๊ ท๊อง นอ อ ฌ่าง, ดี๊ จี้ ลู่ง เท่อ พี่ ไต้ ดี๊ จี้ นอ อ ฌ่าง, ดี๊ ลู่ง ทแม้ เลาพะ อ ฌ่าง พี่ โพล้ง จูง ซี แม้ เว๊ ดี๊ จูง นอ, โพล้ง เล้, พี่ อ ซ้ะ โอ ม เทว๊ล้าง อ ซ้ะ เอะ กแช่ยาเว ล นี้ง แย๊ อี้ง?” 6 ฌ้อง โพล้ง ล ดองๆ, อคูอแน่, โพล้ง อีซลาเอง กุ้ ชื้อ อคูอแน่, เลา ดี๊ ซึ้คู ยู่แคว่ ซึ้พู อ แฌ้ ล ม๊า, ดี๊ ซึ้คู ยู่แคว่ ซึ้พู อ แฌ้ ล แย้, ดี๊ กจุ้แฆว้ อ กดูกแซย่ ลแพ นอ, เทว๊ เท่อ ดี๊ ท แบซ้ะ เทว๊ เว๊ นอ ล้อ 7 อ ซื๊งเว๊ซีง เทว๊ เท่อ ลู่ง ทแม้ แยว้ อ เท่อ, แบฆ้ะ ดี๊ กแช่แยว้อล่างโอ อ ฌ่าง, เก ท๊อง ล ล้าง เนว๊ไซ โฆะ ชี๊ง ลี่ง กีโล, จี้ ซ๊าล้าง ลี่งไซ กีโล, ท่อง บ้าง ฆู๊งล้าง คี๊งไซ กีโล, ดี๊ ท้ะ ซ๊าล๊าง ลี่งล้าง กีโล 8 โพล้ง เล้ พี่ อ ทแมล่ ลู่ง อ ฆวี้ แค้ โอ นอ, เฌ๊ เทว๊ เว๊ ลู่ง กแช่ยาเวอล่างโอ, อ ทล่างอางกีซยองเท่อ นอ อ พ้า, อ นอ โอ ลู่ง เยฮีเอง โพล้ง เกอโชง นอ อ ทยู่แคว่ พ้า 9 ฌ้อง โพล้งเฌงพูฆ๊างพู ซ้ะอวีงซ้ะโทะ, เมะเว๊ อ ซื๊ง เทว๊ ทลแพ อี้ง ดี๊ อ ซ้ะโอ แด เว๊, เมะเว๊ อ ซื๊ง เทว๊ เอะ กแช่ยาเว ดี๊ ทแบซ้ะ เทว๊ เว๊, กจุ้แฆว้ ดาเว ซีง ซ้ะอวีงซ้ะโทะ ดู มะ ปะ ล้อ ดาเว อางปฆ้าทาง กแช่แยว้ 10 อ กย้อง บี่นอ, ดาเว อางปฆ้าทาง กแช่แยว้ ลู่ง โพล้ง น๊างมู๊ง อ เมะแซ พ้า ไจ้ะเว๊, “กแช่ยาเว เฆ้อ กุ้ แฌ้ อ พี๊ง อ พู๊ง ลู่ง แย๊ อ กแช่แยว้ เอ้อ, อางปฆ้าทาง แน้ ล้างชู้ล้างแกย 11 กแช่ยาเว-เอ้อ, ทอดูอโท๊, อดู้งยางซยื๊งซย้องแอทึ, ทโฌ่งทพ้าง, ทน้าเท่อฆ่างเท่อ, ดี๊ ทฆี๊งดูแล้ดู นอ เก น เท่อ, เมะเว๊ ทกุ้เม้ง พี่ อ โอ ลู่ง มุ้คู, ดี๊ ฌางคูโคล๊งคู นอ เก น เท่อ, กแช่ยาเว-เอ้อ, มื่งบ้าง นอ เก น เท่อ ดี๊ แน้ นอ น เก ทอางปฆ้าทาง เก ทอดู ลู่ง ทกุ้เม้ง อ แกล้ 12 เลา ดี๊ ทเฌิ่งทค๊า, ดี๊ ทแม้ฆี๊งแม้แล้ นอ เฌ๊นี่ ดี๊ กแช่แยว้, ดี๊ แน้ นอ น ยู่แคว่-อ้ะ โอ โท๊เละ ทกุ้เม้ง, ทอฌ้องอเก ดี๊ ทอดู้งอยาง นอ โอ ลู่ง น จูง พ้า, ดี๊ โอ ลู่ง น จูง พ้า พี่ น ม ดึ้ เกม๊า อ ดู อ โท๊, ดี๊ น เกล๊าง เอะ โพล้ง กุ้ แฌ้ อไฌ่อแบ้ 13 ค๊องเนงอี้ง, เฆ้อ ซีงลแพ อี้ง ก ไจ้ะบลึ้ทาง แน้ พี่ เก เฆ้อ กุ้ แฌ้ อ กแช่แยว้, ดี๊ อางปฆ้าทาง น เม้ง ลู่ง อดูอโท๊ 14 “แบเด้าะ แย้ นอ จ เก โพล้ง เล้?, ดี๊ โพล้ง ล ชื้อ ฆ่าง ดี๊ แย้ นอ เก โพล้ง เล้, พี่ เฆ้อ ซีงลแพ อี้ง ม เทว๊ เอะ น เท่อ ดี๊ ทแบน่างแบซ้ะ ซี บี่อี้ง?, เมะเว๊ เท่อ กุ้เม้งกุ้มยู๊ นอ เฌ๊นี่ ดี๊ แน้, กซื๊งเว๊ ซีงลแพ นี่ เทว๊ เท่อ, พี่ อ เฌ๊นี่ ดี๊ กแช่แยว้ นอ เทว๊ เอะ กแช่แยว้ ล้อ 15 เมะเว๊ เฆ้อ ซีงลแพ อี้ง, ก เก โพล้งลชื้อแดโอ ล ค่าง แด ลู่ง น เมะแซ พ้า, เก โพล้ง พี่ อ โอชู๊ ลชู่ลล่าง, บี่ซุ้ดี๊ กพี๊งกพู๊งลู่งแย๊ เลาพะ นอ, ก มื่ง นี้ง มื่ง ซ๊าง ก เนง ก แล้ ลู่ง ฌางคูโคล๊งคู อี้ง นอ, เก แบด้องซุ้ ทอกดื้งแล้, ดี๊ ทมื้งแล่ ล โอ แบ 16 กแช่ยาเว เฆ้อ กุ้ แฌ้ อ กแช่แยว้-เอ้อ, ทแอฌี่งแอฌ้อง เลาพะ อี้ง, พี่ เฆ้อ กุ้ แฌ้ แด้เว้-อ้ะ, บี่ซุ้ ม ไต้ กแช่แยว้อล่างโอ เทว๊ เอะ แน้, บี่ซุ้ ลู่ง น เม้ง น แซ ลู่ง อฌี้อแอว้ เฌ๊นี่ ดี๊ น จูง นอ อ ฌ่าง, ดี๊ เก น เท่อ เลาพะ 17 จ กแช่แยว้-เอ้อ, แย้ จ ซีงแฌ๊-อ้ะ, แน้ น กว้ะแคว่ดุ้ เซิงซ้ะ, ดี๊ แบ น ซ้ะ ดี๊ ทอโต้อล้อง, เมะ แย้ นอ จ เทว๊ ทลแพ อี้ง เลาพะ ดี๊ จ ทซ้ะ โอ, ทเซิงเท่งซ้ะโต้, ดี๊ ค๊องเนงอี้ง นอ, จ เซิงมึซ้ะมึ พี่ จ แด แบ น พู น ลี้ง พี่ อ โอ พี่ อี้ง, อ ซื๊งเว๊ อ ซ้ะ โอ, พี่ ม เทว๊ เท่อ ดี๊ ทเซิงฆวี๊งซ้ะโย้ เอะ แน้ 18 กแช่ยาเว อาบราฮาง, อีซาฮ้ะ, ดี๊ อีซลาเอง เฆ้อ กุ้ แฌ้ กพี๊งกพู๊งลู่งแย๊ อู้ง อ กแช่แยว้-เอ้อ, เกม๊าเต้ น แฌแซ ทแบซ้ะ, ดี๊ น พู น ลี้ง อ ทช๊องมอง ลู่ง ซ้ะ พ้า บี่อี้ง ครึๆ, ไช้ะ, ดี๊ เกม๊า น แม้เฌิ่ง แม้ค๊า เอะ อ ซื๊ง เว๊ อ ซ้ะ ลู่ง น ซุ้ ไช้ะ 19 ม๊า น เกล๊าง ทซ้ะ โอ เอะ จ พู ซาโลโม, พี่ ม แฌแซ กเย่ ทซองทซ๊าง, น ลู่ง น แท๊, ดี๊ น ท อเค้อะอต้าง, ดี๊ เกม๊า แม้ ทกุ้เม้ง ลแพ อี้ง, ดี๊ ไต้ทาง กแช่แยว้ อ เว่งฮ๊าง, บี่ซุ้ดี๊ แย้ จ นี่ แด้เว้-อ้ะ นอ ไช้ะ” 20 ฌ้อง ดาเว ไคล้ ดี๊ โพล้ง น๊างมู๊ง เลาพะ นอ ไจ้ะเว๊, “ม๊า อางปฆ้าทาง กแช่ยาเว น ซื๊ง กุ้ แฌ้ อ กแช่แยว้”, ฌ้อง โพล้ง น๊างมู๊ง เลาพะ นอ อางปฆ้าทาง กแช่ยาเว, เมะเว๊ อ ซื๊งเว๊ซีง อ พี๊ง อ พู๊ง ลู่ง แย๊ อ กแช่แยว้, ดี๊ อ ซื๊งเว๊ซีง ซย๊องล้าง อ คู โบงทางแบ้ทาง กแช่ยาเว, ดี๊ ไคล้ะล้าง อ คาง แบ้ทาง กจุ้แฆว้ 21 ทพ้างทาง โฌ้ โค๊, อ ซื๊งเว๊ซีง เทว๊ ทพูแฆ่ ลื่งทาง เท่อ, ดี๊ เทว๊ ทลื่งทาง เช้า ทพูแฆ่ น๊างดื้ง เอะ กแช่ยาเว, เก งู้ แพ๊, อ ดื้ง ล ม๊า, แกะ แพ๊, อ ดื้ง ล ม๊า, ดี๊ แกะ พู อ ดื้ง ล ม๊า, ล พ๊า ฆ่าง ดี๊ ทโอ้ ลื่งทาง เท่อ พี่ อ กู่ง โละซ้ะ นอ, ดี๊ เทว๊ ทพูแฆ่ ลื่งทาง เท่อ แอฌ้อง ลู่ง โพล้ง อีซลาเอง กุ้แฌ้ อ ฌ่าง 22 ดี๊ อ ซื๊งเว๊ซีง อาง เท่อ โอ้ เท่อ, ลู่ง กแช่ยาเว อ เมะแซ พ้า ล นี้ง แย๊ นอ, ดี๊ ทเซิงมึซ้ะมึ ดู มะ ดี๊ อ ซื๊งเว๊ซีง, ต๊างทาง ดาเว อ พูแคว๊ ซาโลโม, เก กจุ้แฆว้ คี๊ง พ๊า ล พ๊า, ดี๊ เท้าไน เว๊ เก ทอคูดู ลู่ง กแช่ยาเว อ ฌ่าง, ดี๊ ซาโด นอ เก โพล้งลื่งเท่ออคู ซาโลโม เก กจุ้แฆว้ เท่งก้ะ ดาเว อ ล่าง ( 1กจฆ.2:10-12 ) 23 ฌ้อง ซาโลโม ชี๊น้าง ลู่ง กแช่ยาเว อ ล่าง ชี๊น้าง คู, เก กจุ้แฆว้ เท่งก้ะ อ แพ่ ดาเว ดี๊ อ เว๊ ดูทางโท๊ทาง, ดี๊ โพล้ง อีซลาเอง กุ้ แฌ้ ชู่งลู่งเน้แท๊-อ้ะ 24 ดี๊ กเย่ ซึ้คู กุ้ อ แฌ้, ดี๊ โพล้งดึ้ซึ้เท่อพู เลาพะ, เลา ดี๊ กเย่ ดาเว อ พูแคว๊ ลแพ นอ, นี่ อืงล้าง อ ซ้ะ ม โต้ ม ล้อง ดี๊ กจุ้แฆว้ ซาโลโม 25 กแช่ยาเว อางกีทางโท๊ ซาโลโม, ลู่ง โพล้ง อีซลาเอง กุ้ แฌ้ อ เมะแซ พ้า, ดี๊ เกล๊าง เอะ เว๊ กจุ้แฆว้ อฆี๊งอแล้, พี่ กจุ้แฆว้ ล โอ น่าง แฌ้ ได้ะ แบ ลู่ง อีซลาเอง พ้า, พี่ อ โอ วี่ง-อ้ะ นอ นี่แบ เว๊ ดาเว ซี๊ง เว๊ ล้อ 26 เจซี อ พู เมะเว๊ ดาเว นอ ยู่แคว่ โพล้ง อีซลาเอง เลาพะ 27 อช๊าอโท่ พี่ อ เว๊ โพะคอง อีซลาเอง นอ, เก ลี่ง ชี๊ง เนง, อ เว๊ โพะคอง เท่อ ลู่ง เฮโบรง พ้า เนว๊ เนง, ดี๊ เยรูซเลง พ้า ซ๊า ชี๊ง ซ๊า เนง 28 ดี๊ อ เว๊ ซี๊ง ลู่ง อ ซ้ะแซย่ ดี๊ อ ซ้ะแซย่ น้ะ เย้า อ แค๊ นอ, ดาเว โอเฌิ่งโอค๊า ดี๊ โอ ดี๊ อฆี๊งอแล้, ดี๊ อ พูแคว๊ ซาโลโม โพะคอง เท่อ เท่งก้ะ อ ล่าง 29 กจุ้แฆว้ ดาเว อ ทไพ้ะทแม้, ล โค๊ ลู่ง อ คางไท้ะ ท้อง ลู่ง อ ทึ นอ, แบ ทกวิ้ล้าง ลู่ง โพล้งพ้ะเว้เท่อ ซามูเอง อ ไละ กวิ้ไน เท่อ นอ อ พ้า, ดี๊ นาทาง โม ไคล้คิ้ กแช่แยว้ อ ทกวิ้ไน พ้า, ดี๊ ลู่ง โพล้งพ้ะเว้เท่อ กะดา อ ทกวิ้ไน พ้า 30 โอ ดี๊ อ ทยู่แคว่ เท่อ อไฌ่อกย้อง เลาพะ, ดี๊ อไฌ่ อ แบ้ ดึ้เท่อชางเท่อ, ดี๊ ทไฌ่ทกย้อง พี่ อ กึทาง ดี๊-อ้ะ ดี๊ โพล้ง อีซลาเอง, ดี๊ กเย่ ที๊งล่างค่างพ้า อ ที๊งช๊า ค่างช๊า ล เม้ง แบ ล เม้ง นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society