ROMAN HEHNÂNG POLMA RAANGWAH SITI 6 - NIEMNYAN Naga NT (BSI)

Pap nâng Arit rohkomin Krista Demnâng Roam lihma Ahin

¹ Eroh medang ako nãngma chenni ngaea? Joban wah mînchenchaan pa ajah chenchoh e ngama papkaam molihmejû tongea?

² Eroh chenthumin dangmah! Nãnga papnâng lâriitih - phumma pap khenkojû chenroh jienthãm lektongea?

³ Chenrãngma ngako nema senthemthem ajet, chenthu Jisu Krista demnâng roam lihma baptijem keptih a, ereko nãng ate ritko roam lihma baptijem kepeki.

⁴ Nãngma baptijem kepeki pa, nãng ate ritko roamlihma ate demnâng johbin ehi, erohwah, chenroh Jisu Krista ma ate Wa mîndôngchaan keplahma ritwah ngakhintah a ererãngrãng, nãngmin roandông nyan danglihma sôngtôngmin.

⁵ Chenroh nãngmin ate ritko ate demnâng phoangthe danglihma johrii ekia, ererãngrãngjô ate ngakhîn komin ate demnâng phoangthe danglihma johngakhîn min.

⁶ Ngale nãngma ajet, nãng roandông apã pa Krista demnâng ate bãngphak ko lâjoh rittektah, erepa nãnghung wah papchaan pa chhihsiet rãng johrittek eka, erohwah nãnga paphaa dangtûmih.

⁷ Chenrãngma ngako chenthu nãng merii tihko, nãnga papchaan wah lâpetih.

⁸ Nãnga Krista demnâng johritdi, ate demnângjô johngakhîn min ngama putedâlem eki.

⁹ Chenrãngma ngako nãngma ajet, Krista ritwah ngakhintah, ngale chenthumin letherii tumin - rit pumma chenthumin ate khohko leta pêntumin.

¹⁰ Ngale erohwah, ate ritdi, papchaan ate khohko ahotu; ngale athângheh ate hin eka pemin ate roandôngpa Joban demnâng roamlahma hin eka.

¹¹ Ererãngrãngjô nededema papmoatlam nâng riichoan rãngrãng thonghunrii en, rohkomin, Jisu Krista junma Joban demnâng roamletma ahînte rãngrãng dangen.

¹² Ne hei angem phoangpa papnâng nekpênthuk en, eroh medang ako nema ne hei angem hungma huneka nginpa kep eken.

¹³ Ngale ne phoang kowah kaamchhih moatrãngma papnâng chhupthemin nekkoh en. Erenoma, nedede phoangpa ritwah ngakhîn thukte Joban nâng koh en, ngale kaamsen moatrãngma ne phoang phangtang atenâng koh en.

¹⁴ Papnâng ne roandôngpa nekpênthuk en; chengrãngma ngako nea niemarang khennâng dangmet, Joban mînchenchaan khennâng songtong eken.

Toangtang Rãngma Haa Dâng

¹⁵ Eroh medang ako chennire min a? Nãngma pap moea, chenrãngma ngako nãnga niemarang khennâng dangmih, Joban mînchenchaan khennâng songeki? Erohmin jienmo mih!

¹⁶ Linlinjô nemajet, chenthu nemin mihnyan wathe nginkep letma ate haa rãngrãng medang tetko, linlinjô nema hen nginkep eken a erehaa lâdangtet - pap ngin mekep enko rit rêmin, ngale Joban ngin mekep enko ate demnâng toangtang dângmin.

¹⁷ Rohkomin Joban nâng dangkoh a ngama ngaekang! Chenrãngma ngako rekthe nekhu paphaa dângwahjô medang enkomin, nehung phangtang kohletma nenâng hethô ehèn toangtang nginpa kep eken.

¹⁸ Nea papwah lâpesietthen ngale toangtang haa lâdangtet.

¹⁹ (Ne hei angem hung pumma letajet dâng phumma ngama mihnyan nyuchha ngin rãngrãng jabekang.) Poatthe nema nedede phoangpa phangtang ngek atek, chhih akhahli, erediko kaamchhih heh moatwah. Ererãngrãngjô ade phumma nededema ne phoang phangtang Asâthôan kaam moatrãng toangtang haarãng dangthuk en.

²⁰ Chenthu nea paphaa dângpoatko, nea toangtang ledang wah.

²¹ Athângheh nerêsê eken moatlem heh moletma chenni chohtet a? Ere moatlem heh moletma ritba rewah!

²² Rohkomin ade phumma nea papwah lâpesietthen ngale Joban haa lâdangtet. Ngale ne roandôngpa phangtang Joban nâng lâkohtet, ngale erohwah roantang roanjêng lethôan roandông choh eken.

²³ Chenrãngma ngako, pap dekbi thãpa - rit; rohkomin Joban ma thãhoma hînhô kohehi pa nãng Teso Jisu Krista demnâng roamlihma roantang roanjêng ahîn roandông choheki.