ROMAN HEHNÂNG POLMA RAANGWAH SITI 5 - NIEMNYAN Naga NT (BSI)

Joban Demnâng Toangtang Dâng

¹ Ade phumma nãng wah putedâlem junko nãnga Joban demnâng toangtang dangeki ngale Teso Jisu Krista junma Joban demnâng mêmo dangeki.

² Atema putedâlem junko nãngnâng are Joban mînchenchaan pa kephukoh ehi, ngale athângheh nãnga ere khohko hin eki. Ngale erohwah nima rângthôeki nãngmin Joban mîndôngko ejohroam e ngama dâlem eki!

³ Nãngkhuma nãng chêmchei hehmin rângthôe chengrãngma ngako nãngma ajet chêmchei junko atâdo re eki,

⁴ ngale atâdô junko Joban ma senchoh ehi, ngale atema sênchoh junko nãngma dâlem eki.

⁵ Are nãngma dâlem ekipa chenthumin mahto nâng ledangmin, chenrãngma ngako Asâthôanju junma Joban ma nãng hungkhen nâng atewah hun pa kohehi, ere Asâthôanju pa Joban ma nãngnâng hînhô rãngrãng kohehi.

⁶ Chenrãngma ngako chenthu nãnga chohsokte aho dângpoatko, Joban ma sanpoatsen pa renlahma ere sanpoatsen ko mihnyan chhih hehrãng Krista riieka.

⁷ Mihnyan pa toangtangjô medang akomin ate rãngma ahan wathe ritpa alat. Rohkomin toangtang mihnyan rãngma târittemin etonga.

⁸ Rohkomin Joban ma nãngnâng chentô hun ehia erepa khesok ehi - erepa nãnga papi dângwah rohkomin Krista nãngrãngma ritwah!

⁹ Ate hei pumma ade phumma nãnga Joban demnâng toangtang dangthuk ehi; erediko nãnga Joban rinkhah thunwah min Krista junma pe eki!

¹⁰ Nãnga Joban demko ran dângwah, rohkomin ate Chha ritjunma ate lemruchha rãng dangthuk ehi. Ade phumma nãnga Joban lemruchha lâdangtih, erohwah Krista ma ate roandông kohjunko nãngkhu khope eki!

¹¹ Phumma nãngkhu khope lanlan dangmah; khumin hah eki, chenrãngma ngako, nãng Teso Jisu Krista junma Joban ma nãng ade phumma ate lemruchha rãng dangthuk ehi.

Adam ngale Krista

¹² Hahtokkhoh ko pappa mihnyan wathe junma hûera, ngale atema pap demko rit pemin kephûera. Erohwah anga ngama pap moatdi rit pa chentô mihnyan nyuchha khohnâng hûera.

¹³ Niemarang pa kohmako hahtokkhoh ko pap dângwah; rohkomin niemarang aho dângnomeko, pap min aho dângmin wah.

¹⁴ Rohkomin Adam sanpoat tôwah Mosa sanpoat tôkotuk arit pumma chentô mihnyan nyuchha khohko pênlahma dângwah, Adam ma Joban nginlekep thangma pap motah rãngrãng lemote heh khohkomin arit pumma pênlahma dângwah. Adam pa khedi wah khope kohrãng hokte rãngrãng dângwah.

¹⁵ Rohkomin are wanii pa khoakthe dangmah, chenrãngma ngako Joban ma thãhoma khope koh ekapa Adam pap rãngrãng dangmah. Arepa toangtang ngin, wathe mihnyan pap rekwah ajahthem mihnyan lâriitah. Rohkomin Joban mînchenchaan pa ere nomemin bâmbâm adong, ngale wathe mihnyan erepa Jisu Krista mînchenchaan junma Joban ma atewah thãho hînhô pa ajahthem mihnyan hehnâng koheka.

¹⁶ Joban wah hînhô ngale mihnyan wathema pap moeka pa khoakthe dangmah. Wanthe pap moatdiko, “Athe” ngama ngaehi; rohkomin ajahthem pap moatdiko Joban wah hînhô pa nãngnâng, “Themet!” ngama kohehi.

¹⁷ Arepa toangtang ngin, ere wathe mihnyan pumma papkaam moatjunko arit pumma pêneka. Rohkomin wathe mihnyan Jisu Krista pumma moatmãn pa erenoma chentôjah bâmdong moeka! ngale Joban wah mînchenchaan chohte chentô heh erediko ate demnâng toangtang dangthuk eka heh Krista junma roandông dôngtang epên a.

¹⁸ Erohwah wathe pap junma chentô mihnyan nyuchha ma chêmchoh eki rãngrãng, wathema toangtang moatdi Joban ma chentô mihnyan nyuchha heh toangtang dangthuk eka, ngale roandông koh eka.

¹⁹ Ngale wathe mihnyan ma Joban nginlekep dângdi chentô mihnyan nyuchha heh papi dangthuk eka, ererãngrãngjô wathe mihnyan erepa Jisu Krista ma Joban ngin kepdi chentô mihnyan nyuchha heh Joban demnâng toangtang dangthuk eka.

²⁰ Niemarang pa mihnyan nyuchha hehma papkaam jahmoat rãngmaba hongeka; rohkomin papkaam pa jahmoat phumma, Joban wah mînchenchaan pemin erenoma ajah bâmhong eka.

²¹ Erohwah, pap junko rit pumma nãngkhoh ko pêntah rãngrãng, toangtang pumma Joban mînchenchaan pa nãngkhohko pên ehi, erohwah nãng Teso Jisu Krista junma nãngma roantang roanjêng ahîn roangdong pa choheki.