ROMAN HEHNÂNG POLMA RAANGWAH SITI 4 - NIEMNYAN Naga NT (BSI)

Abraham Thakthô

¹ Eroh medang ako nãngte nãngwa Abraham nâng chenroh ngaea? Atea chenroh dângwah a?

² Atema moatlem moat akat junko Joban demnâng toangtang dângwah medang ako, atema ere moatlem junko chenni akomin rângthôrit minwah - roh akomin erepa Joban mathahko rângthô ritthin dangmah.

³ Joban nyapraangma ngaeka, “Abraham ma Joban nâng putedâlem wah, ngale Abraham putedâlem junko Joban ma ate demnâng Abraham toangtang dângthukwah.”

⁴ Moatlem nâng chepte mihnyanko ate dekbi thãpa kohmin, rohkomin erepa hînhô dangmah; thinma bii re eka.

⁵ Rohkomin henhenma moatlem moatjunko ledang, putedâlem nâng lolo tok anaa eka, ngale athe pa letherãng lithôante Joban nâng putedâlem eka, ere putedâlem peba Joban ma ate demnâng toangtang dângthukrãng lemeka.

⁶ Hen mihnyan nâng Joban ma ate moatlem junko ledangma toangtang ngama kepeka ere mihnyan khuhah junma Devit memin aroh jabwah:

⁷ “Hennâng atema chhihmotah heh map koheka, ere mihnyan pa rangkepte, ngale hennâng ate pap heh map koheka erepa rangkepte!

⁸ Ngale Teso ma hen mihnyan heh pappa thin khohnâng lethien dangeka ere mihnyan heh rangkepte”

⁹ Devit ma are rangkep ngin jab ekapa khoankhen niem hôante hehrãng lolo lejab eka? Erehehrãng lolo dangmah! Erepa khoankhen niem lehôante hehrãng memin danga. Chenrãngma ngako nãngma Joban nyapraangwah jeteki, “Abraham ma Joban nâng putedâlem wah, ngale ate putedâlem junko Joban ma atea toangtang ngama kepwah.”

¹⁰ Arepa chenthu dângwah a? Arepa Abraham ma khoankhen niem hôanma koale hôandiko dângwah a? Arepa khediko dangmah, khemako dângwah.

¹¹ Atea khedi koba khoankhen niem pa hôanwah, ngale atema khoankhen niem hôan ekapa, Abraham putedâlem junko atema khoankhen niem hôan mama Joban ma atea toangtang ngama kep ekapa khesok rãng hôanwah. Ngale erohwah, thinma khoankhen niem pa lehôan medang akomin, Joban nâng putedâlem lahma Joban ma thin a toangtang ngama kepeka mihnyan hehrãng Abraham pa Ju ngenâng thinrãngma wa.

¹² Abraham pa khoankhen niem hôante hehrãng memin wa jôba, ngale khoankhen niem mahôante danglahma nãng wa Abraham khoankhen niem hôan mako chenroh sõngtongtah a ererãngrãng sôngte hehrãng memin wa.

Joban Toamsem pa Putedâlem junko Chohmin

¹³ Chenthu Joban ma Abraham ngale ate chhuchha hehnâng rangkhen pa nedek khohko ekoh a ngama toamsem tahpa, thinnâng kohtah, phumma erepa Abraham ma Niemarang kep junko kohwah dangmah, Abraham ma putedâlem junko Joban ma atenâng toangtang ngama kepdi kohwah.

¹⁴ Phumma chenpa Joban ma toamsem eka erepa Niemarang kepte hehnâng kohmin ngama medang ako, putedâlem pa sekhota ngale Joban toamsem pemin mahto dângmin.

¹⁵ Niemarang pumma Joban rinkhah ba kephûera; Phumma chenko niemarang aho dangeka, ereko niemarang chhihsiet thinmin aho.

¹⁶ Ngale erohwah putedâlem junko Joban wah toamsem pa choheki, ngale arepa chentô Abraham chhuchha hehma Joban wah thaho hînhô rãngrãng choheki - ngale arepa Niemarang kepte hehnâng lolo ledang, Abraham ma putedâlemtah rãngrãng putedâlemte hehnângmin koheka. Chenrãngma ngako, chentô mihnyan rãngma Abraham pa Ju ngenâng wa;

¹⁷ Joban nyapraangma aroh ngaeka, “Ngama nanga ajahthem diak akan heh wa rãng hôaneki.” Are toamsem ekapa Joban mathahko toangtang, ngale atenâng Abraham ma putedâlem eka - Are Joban pumma riichoante heh ngakhinthuk eka, ngale atema mathat hongpa hongthuk eka.

¹⁸ Akhâtuli ledang komin Abraham ma putedâlem wah, ngale erohwah, “Ajahthem diak akan heh wa rãng dangeka.” Joban nyapraangma ngaeka rãngrãng, “Nangchhu nangchha heh rangkho wah merit jahtô edanga.”

¹⁹ Ere sanpoatko ate châthe rangpâ dangnemnem dângwah; rohkomin ate sekko thakritko riichoan thãthãjô medang akomin, ngale linlin Sara min chhaho jatjô medang akomin ereheh thonghun lahma atewah putedâlem pa mahho.

²⁰ Atema Joban nâng putedâlem pa jek ho, ngale Joban ma toamsem tah pa ledangmin ale dângmin a ngamemin tungmaangho; atewah putedâlem pumma atenâng chaan kohwah, ngale atema Joban nâng rôwah.

²¹ Joban ma chenni toamsem tah a erepa Joban ma linlinjô emoa ngama Abraham ma putedâlem wah.

²² Erohwah putedâlem junko, “Joban ma Abraham pa toangtang ngama kepwah.”

²³ “Atea toangtang ngama kepeka” are jabkhab pa aterãng lolo raang dângwah.

²⁴ Ere jabkhab pa nãngkhurãng memin raangeka, henhenma nãng Teso Jisu ritwah ngakhînsiette Joban nâng putedâlem junko Joban ma ate demnâng toangtang ngama kep ehia ereheh rãngmemin raangeka.

²⁵ Nãngkhu pap junko Jisu ritphethuk wah, ngale nãngkhu Joban demnâng toangtang jiendângthuk rãngma Jisu ritwah ngakhînwah.