ROMAN HEHNÂNG POLMA RAANGWAH SITI 14 - NIEMNYAN Naga NT (BSI)

Mihnâng Athe Neklo

¹ Henhen putedâlem nâng ane dangeka ere mihnyan hehmin asenma roo en, ngale thin demnâng thinma chenni thonghun eka erejunko nekchhiakmîn en.

² Wawathe mihnyan hehnâng thin putedâlem junko chentôpa phhekchhah eka, rohkomin henhen pa putedâlem nâng ane a erehehma pharu wahra lolo phhek eka.

³ Rongrup tâphhek tâchhahte mihnyan hehma chenjô lephhek lechhahte komin achhih lengamin; ngale pharu wahra lolo phhekchhahte pummemin rongrup phhekchhate komin athe lengamin; chenrãngma ngako Joban ma ere mihnyan pemin kepeka.

⁴ Mihhaa hehnâng athe loatte nea hen a? Thinma tawak ekale tawakmah a ere sokte pa thin Tângtewa etonga. Ngale thinma etawak a, chenrãngma ngako Teso ma thinnâng chohsû lahma etathukwak a.

⁵ Wawathe mihnyan ma wanwanthe rangwopa jahanwah jengre rangwo noma alemli rangwosen ngama ethonghun them a, ngale khuka hehma chentô rangwopa mãnthe ngama ethonghun them a. Nãngkhu anga ngama nãnghung nãngrin nâng senthemthemjô mamthônghun min.

⁶ Henhenma wowothe rangwopa nyahrãng rangwo dong ngama thonghun eka ereheh memin Teso rãngma jôba moeka; ngale henhenma chentôpa phhekchhah eka ereheh memin Teso rãngma jôba moeka, chenrãngma ngako thinma ere phhekchhah rãngma Joban nâng dangkoh a ngaeka. Ngale henhenma chentôpa lephhek lechhah dangeka ereheh memin Teso rãngma jôba moeka, ngale thinmemin Joban nâng dangkoh a ngaeka.

⁷ Nãnga nãngdede rãnglolo hîn dangmih, ngale rit komin nãngdede rãnglolo rit dangmih.

⁸ Nãng ahîn medang eko, erepa Teso rãng hineki, ngale rit mere ekomin, nãnga Teso rãng riieki. Erohwah, nãnga ahîn medang ekomin, ngale rit medang ekomin, Teso rãng jôba.

⁹ Chenrãngma ngako Krista riilahma ngakhin ekapa, atea ahînte ngale aritte heh Teso dângrãngma ngakhin eka.

¹⁰ Erohwah nemin, henhen pharu lolo phhek eken a erehehma - mihhan heh khohnâng chenrãngma athe ngaeken a? Ngale rongrup phhekchhahte heh memin - ne lemru putedâlemte ahan hehnâng achhih ngama chenrãngma ngaeken a? Nangkhu anga ngajô Joban mathahko atema rênrãng chepmin.

¹¹ Chenrãngma ngako Joban nyapraangma ngaeka, “Teso ma ngaeka, nga a linlin ahîn Joban, anga ngama nga mathahko dakuh ethohûra, ngale anga ngama nga a Teso ngama enga hang.”

¹² Erediko nãngkhu anga ngama henma moatlem chenroh motih a ereheh Joban nâng ekhesok e.

Mihheh Pap nâng Nekjârii Thuk en

¹³ Erohwah, wathema wathe nâng athe loatmîn pa ajekre e. Erenoma, mih dakhothutli moatlem ngale mihheh papnâng jâritli moatlem heh chenthumin lemorãng thonghun en.

¹⁴ Ngama Teso Jisu demnâng roamlekma jet ekang, chenni phhekchhahjô niemarang junko atedede angek aho; rohkomin nema wanwanthe phhekchhah pa niemarang junko angek methonghun enko, erepa nerãngma angek dângmin.

¹⁵ Nema chenni phhekchhah eken a ere phhekchhah junma mihrãng chhih medang ako, erepa nema mihnâng hun achet junma moat dangmet. Nema phhekchhah eken junma mih nekchhihsiet en, chenrãngma ngako Krista thinrãng memin ritwah!

¹⁶ Nema chenko asen ngama ngaeken a ereko mihma achhih nekchen ngaeka.

¹⁷ Chenrãngma ngako Joban Hahsông pa jokphhek chhah rãnglolo dangmah, rohkomin, toangtang, mêmo, ngale khuhah nâhah loloba, ngale erepa Asâthôanju ma koheka.

¹⁸ Ngale chenthu nema arerãngrãng dangletma Krista nâng mesoam enko, nema Joban rinmin methuk eken, ngale mihhan heh memin asen ngama engahèn.

¹⁹ Erohwah, roantangma nãngkhu mongthem pa chenrohma mêmo jiendângmin a ngama thônghunmin ngale eroh mêmo danglihma jôba wathema wathe târongsiet mînmin.

²⁰ Joban ma chenni hôantah a erepa phhekchhah junma nekchhihsiet en. Chentô phhekchhah pa tâphhek tâchhahmin, rohkomin rongruppa phhekchhah junma mih wathe papnâng jâritkatli medang ako lephhek lechhah ba asen.

²¹ Apunthôan pa ngem lephhek, khem lejok, ngale Joban nâng putedâlemte mihnyan heh chhih nâng jâritli moatlem heh chenjô lemo medang eko asenthôan dângmin.

²² Arekowah nema chennipa pute eken a erepa Joban nechhe tungko lolo jetletma thien en. Chenthu thinma asen ngama jetlahma moeka moatlem junko thinmîn lechhih medang ako, erehehma rang ekep a!

²³ Rohkomin thinma phhekchhahli dangmah ngama jetlahma mephhek mechhah ako, erepa phhekchhahdi Joban ma thinnâng achhih ngatmin, chenrãngma ngako, thinma chenroh putedâlem eka ere junko moat dangmah. Ngale chenni akomin putedâlem junma ledang medang ako erepa pap.