ROMAN HEHNÂNG POLMA RAANGWAH SITI 11 - NIEMNYAN Naga NT (BSI)

Isrial heh Khohnâng Joban Mînchen

¹ Erediko ngama thôngphâ wah: Joban ma ate mihnyan heh phere eka? Phemah! Ngadede min Isrial mihnyan, Abraham chhuchha, ngale Benjamin jatwah.

² Joban ma ate mihnyan khebeng thuma rentah heh phemah. Nema ajet Joban nyapraang nâng Ilija ma Isrial mihnyan heh lelatnâng Joban nâng rosep lahma raang ekapa:

³ “Teso, thinma nang Mõng heh ritphe eka ngale nãngnâng soam aroak thin heh chhihsiet wakeka; Nga loloba leritphe thangma pe ekang, ngale thinma ngamin ritphe rãng hun ehang.”

⁴ Joban ma atenâng chenni dânthangtah a? “Ngama ngarãng hahjat engit mihnyan joban mõang Baal nâng lesoamte lâthientek.”

⁵ Athângheh min ererãngrãngjô dangeka: Ate mînchenchaan junma Joban ma amãnchha renlahma tonga.

⁶ Joban ma ate mînchenchaan junkoba ren eka, thinma chenni moeka ere moatlem junko rên dangmah. Chenrãngma ngako Mihnyan ma chenni moeka erejunko Joban ma meren ako, ate mînchenchaan pa alinlin mînchenchaan ledangmin wah.

⁷ Eroh medang ako chenroh dângmin a? Isrial mihnyan hehma thatlem tantahpa thinma chohho. Roanchechha mihnyan Joban ma rentah heh meba erepa chohwah; khuka hehma Joban ma rooko lejetat dangwah.

⁸ Joban nyapraangma ngaeka rãngrãng, “Joban ma thinhung arin heh bathuk eka; thenep thejâ nângtumin thinma jienkhemah ngale jientatmah.”

⁹ Ngale Devit ma ngatwah, “Thin a benâng mânritwah rãngrãng jokphhek chhah nâng lumrii lahma chenmãnrii wak a; ngale thin jârit chenrewak a, erediko chêmthuk chenrewak a!

¹⁰ Thin mitmin adoak chenrewak a ngale nekchen jienkhetu wakeka; ngale roantang roanjêngma chêmchoh lahma anuhjâ chenrewak a.”

¹¹ Erediko ngama thôngphâ ekang: Jews heh chenthu dakho thutriitah a? ngale lejien ngaksen tuli lânchhih jâroh chenthu jâriitah a? Erohmin dangmah! Jews hehma pap moatjunko, thinma chenphetwân a ngama khope pa Jews ledangte hehma choh eka.

¹² Jews heh pap dângjunko hahtokkhoh ma ajahthem rangkep eka, ngale Jews heh junâng tangchhih dângjunko Jews ledangte hehma rangkep eka. Eroh medang ako, chenthu Jews hehma Joban wah rangmekep tahko jãtanga chentô bâmdôngmin a!

Jews Ledangte heh Khope

¹³ Ngama athângheh Jews ledangte hehnâng thôkoh ekang: Chentôko Nga Jews ledangte hehrãng Joban moattat chhoante dangekanga, eretôko, Nga moatlempa hungkoh lekma emo ang.

¹⁴ Ngale ngama nga mihnyan hehma phetwanli molekma thinwahmin roanche kho eta pesiet ang ngama thonghun ekang.

¹⁵ Chenrãngma ngako chenthu Joban ma thin thînphe phumma, mihnyan ahan heh phangtang Joban demnâng ran rãngrãng dangtahpa Joban lemruchha rãng litdangtu eka. Eroh medang ako, chenthu Joban ma thin mengak keptahko chenroh dângmin a? Eroh medang ako mihnyan hehma rit dikomin roandông echoh a!

¹⁶ Bankên phathe kowah Joban nâng chhupthe methit kotihko, bankên pa phangtang aterãng lâdangtah; ngale bãngrin pa Joban nâng mekoh tihko, bãngphak bãngra phangtang aterãng lâdangtah.

¹⁷ Humnâng khiet apân eka Oliv bãngkowah bãngphak phakjâchhoan eka, phumma phakjâ chhoan re ekako wunwah Oliv bãngphak kowah choatkhhek hûeka. Ne Jews ledangte heh ere wunwah Oliv bãng rãngrãng, ngale ade phumma nema Jews heh demnâng roamletma Joban wah khope pa choh eken.

¹⁸ Erohwah, nema phakjâ re eka bãngphak rãngrãng heh khohko nekngamrii en. Ne chenroh jienngamritmin a? Nea bãngphak rãngrãng ba; bãngphak pumma bãngrinko chohsûmah - bãngrin pumma ba bãngphakko chohsûeka.

¹⁹ Rohkomin nema enga en, “Danga, ere bãngphak phakjâeka pa ngarãng the hôankohrãng phakjâeka.”

²⁰ Arepa toangtang. Thinma lepute dâlemdi phakjâeka, ngale nemin putedâlem junkoba ere bãngko choatkhhek ehèn. Rohkomin ererãngma nekngamrii en; erenoma Joban ranchei letma tongen.

²¹ Joban ma humnâng khietwah bãngphak rãngrãng dangeka Jews heh tumin bâmah; nejã ebâhi ngama thonghun eken a?

²² Are junko nãngma Joban pa nyahrãng mînchênte ngale nyahrãng rinkhahchaan ngama khe eki. Atea achhih nâng jâritte heh demnâng nyahrãng rinkhah lahma kheki, rohkomin nenâng mînchen ehèn - roantangma ate mînchen demkojû metong enko. Rohkomin ate mînchen demko ledang medang enko, nemin echhihjâ en.

²³ Ngale Jews hehma leputedâlem dangeka pa mejek ako, thin chenre theko dângtah a eretheko ethe tongthuk a; chenrãngma ngako Joban ma ere pemin tamoa.

²⁴ Ne Jews ledangte heh wunwah Oliv bãngphak phakjâwah rãngrãng, ngale humwah Oliv bãngphak phakjâ mãnko chôatkhhek wah rãngrãng. Jews heh a humnâng khiet bãng rãngrãng; ngale akhiet bãngkowah phakjâ ekapa atedede bãngphoko ngakchôat khhekpa ala.

Joban ma Chentônâng Mînchen

²⁵ Ngalemruchha heh, Ngama nenâng Joban ngewah toangtang ngin jetthuk hunka, erepumma nedede jet ajien ngama thonghunrii eken kowah ejeksiet hèn. Arepa Isrial mihnyan heh hung arincheh ekapa roantangrãng chehdangmah, rohkomin Jews ledangte heh Joban tânâng roak lânleroh mahû tungkoba elekcheh a.

²⁶ Ngale eroh jôba Isrial heh phangtang khope min. Joban nyapraangma aroh ngaeka, “Zion wah Pângte ekara ngale Jakob chhu chha hehwah chentô achhih heh phangtang erephe koh a.

²⁷ Ngama thin demnâng kah ekhetmîn ang chenthu ngama thinpap heh rephe kohko.”

²⁸ Chenrãngma ngako thinma Nginkongsen pa kepmah, ngale Jews ledangte hehrãng sênrãngma Jews heh Joban demnâng ran dangeka. Rohkomin Joban ma rênjunko, thin te awa heh junma thin a Joban lemruchha dangeka.

²⁹ Chenrãngma ngako Joban ma hennâng rangkoh rãng rentah a erepa atema ngakdânmah.

³⁰ Ne Jews ledangte hehma khemako Joban ngin lekepwah; rohkomin athângheh nema Joban wah mînchen lâchohtet, chenrãngma ngako Jews hehma Joban ngin kepmah.

³¹ Ere-rãngrãng, nema Joban wah mînchen chohphumma, Jews hehma athângheh Joban ngin kepmah, ngale eroh dangekapa, thinmemin athângheh Joban wah mînchen jienchoh rãng dangeka.

³² Chenrãngma ngako, Joban ma mihnyan heh phangtang ngin lekepte dangthuk eka, erepa atema chentô nâng ate mînchen pa jienkhesok rãng hôan eka.

Joban nâng Rô

³³ Joban pa chentô techhua! Ate buthi mongthem ngale jet ajien pa chentôlûa! Joban ma themawa ekapa henma tâjienthômin a? Ngale ate lempa henma tâjetloat min a?

³⁴ Joban nyapraangma ngaeka, “Teso hung arin henma tathôanlep lahma tonga? Henma atenâng târîn min a?

³⁵ Henma atenâng chenni komin thatkohtah a, ere litko atema ngakkoh rãngma?”

³⁶ Chenrãngma ngako chentôpa atema hôanwah, ngale chentôpa ate junma hin ajoeka ngale aterãng tuta hin ajoeki. Joban mîn roantang roanjêng adong chendanga! Amen.