MAK MA RAANGWAH NGINKONGSEN 5 - NIEMNYAN Naga NT (BSI)

Jisu ma Juchhih Lupte Delawa Wathe Sênsiet

¹ Jisu le ate dijunte heh Galili josi ranka wah Girasa hahnâng hokkhôam wah.

² Khôankho kowah Jisu jâkhôam rienrien mangruk wah loatwãng lahma mihwa wathe chohmînwah. Are mihnyan ko juchhih luplahma dângwah

³ ngale atea mangruk nâng sôngte dângwah. Henma min atenâng janru memin leta lokhhek dângwah;

⁴ Melâng deprãng ate dek ada khhek lahma thienwah, rohkomin roantang janrupa patsiet lahma ate dako chîkhihwat wah. Henmemin ate leta lothien dângwah.

⁵ Rangwo rangnyek phôangrak nungma pông apa chîrewah, ngale long hehma khihkhenrii lahma mangruk ngale hahkong heh tungko chîphoang khôamwah.

⁶ Chenthu atema Jisu lepkhe poatko atea roanchhe ataangnâng dângwah; ephumma chhoanka lahma Jisu mako dakuh thoka lahma khupjup wah,

⁷ ngale chaanmõang rakwah, “Jisu, choangthôanwah tôngte Joban Chha! nangma nganâng chennire hun ehanga? Joban mînko ngama nangnâng rosep eki, nga nekchêm thukhang!”

⁸ (Jisu ma, “Juchhihko, mihnyan kowah loatchhoan o!” ngatdi, atema arepa ngatwah)

⁹ Ephumma Jisu ma atenâng chhienwah, “Nangmîn chenroh a?” Mihnyan pumma, “Nga mînpa ‘Mob’ - nia jahmõang tonge!” ngama dânthâng wah.

¹⁰ Ngale atema Jisu nâng juchhih heh erethe kowah lechien chhoanrãng roatsep wah.

¹¹ Thin kêko wah hahkongkho ko wak jahmõang phhekchhah lemchhah lahma dangwah.

¹² Ephumma juchhih pumma Jisu nâng roatsep wah, “wak heh tânâng chienkat hi, ngale thinsek khennâng lupkathuk hi.”

¹³ Atema chhoan thukwah, ngale juchhih heh mihnyan kowah loatchhoan lahma wak hehnâng nyupkat wah. Wak heh phangtang tungkohahjatnii rãng dângwah - phumma ka pumma jâchhoan kawak lahma josiko mahlumjâ katwah.

¹⁴ Wak sokte mihnyan heh huhchhoan lahma nginpa thin hahdaang ngale thin kêanâ wah hahdaang hehnâng phoangthô kohwah. Phumma mihnyan heh chenni dangeka erepa sokrãng katwah,

¹⁵ ngale chenthu thin Jisu tâko hokko, juchhih jahmõang luplahma dangtah mihnyan pa chohkhe wah. Atea khet akhu keplahma senthemthem eko tonglahma dângwah; ephumma thin phangtang chei rewah.

¹⁶ Erekowah mitma khête hehma mihnyan hehnâng juchhih lupte mihnyan ngale wak hehnâng chenni dangtah a erepa thôkoh wah.

¹⁷ Ephumma mihnyan hehma Jisu nâng thindiak wah chhoan eko ngama roatsep wah.

¹⁸ Jisu khôankhoko chhangwâng thuko, juchhih luptah mihnyan pumma, “ngamin nang demnâng johchhôanrâng!” ngama roatsep wah.

¹⁹ Phumma Jisu ma johchhoan thuk ho. Rohkomin Jisu ma atenâng ngatwah, “Humnâng ngakwãng lohma nang humte tangkâ hehnâng Teso ma nangrãng chentôdông mokoh ehoa, ngale atema nangnâng chentô mînchen ehoa ereheh thôwãngkoh.”

²⁰ Ephumma mihwa pumma Jisu ma ate rãngma chenni mokotah a ereheh hahdaang wan echhilat dankhoam lahma thinnâng thôthien kohwah. Ngale ate ngin chohtatte heh phangtang bârit wah.

Jairas Chha Dihiaknya ngale Jisu Khetnâng Sahloatte Dihiaknyu

²¹ Jisu josi rankanâng thêngak katwah. Ere josi kêko jahmõang mihnyan heh ate tumlitko khôanhok wah.

²² Erehah Sanagog kowah adong Jairas hokkhôam hokwah, ngale chenthu tema Jisu kheko, Jisu dathongko kunjup katwah

²³ ngale Jisu nâng roatsep wah, “Ngachha dihiaknya pa nyahrãng khun eka. Mamwãng lohma nangdekma atenâng sahlo wãngmêngro, erohkoba ate akhun wah senlahma ehin a!”

²⁴ Ephumma Jisu ate demnâng johwângwah. Ngale Jisu demko jahmõang mihnyan johwãng lahma chentô sukma Jisu nâng sahchhô wah.

²⁵ Ereko dihiaknyu wathe heichhoan khoanchetma echhi pânii nyahrãng chêm lahma dângwah,

²⁶ Ajahthem doktor ma ate lâthat sûtah. Ngale ate ngun phangtang ereko thôanmet phetah, phumma sên renoma roantangma ajah jahba ngakchhih jâwah.

²⁷ Atema Jisu nginpa chohtatwah, ephumma loangchhangko Jisu tokdiko hokwah,

²⁸ ngale atedede ngatritwah, “Ngama ate khet kojô mesahlo takkomin nga esen ang.”

²⁹ Atema Jisu khetko sahloatwah, ngale ate hei chhoanpa lemlienma jekwah; ngale ate dedema sekkhen nâng ate khoanchet sênpa jetritwah.

³⁰ Lemlienma ate sekwah chaan loatchhoan pa Jisu ma jetritwah, ephumma atema loangchhang ko ngiaksûkat lahma, “Nga khetko henma sahlo eha?” ngama ngatwah.

³¹ Ate dijunte hehma dânthâng wah, “Nangma ajet nang tumlitko mihnyan pa chentôjah a; phumma nganâng henma sahlo eha ngama chenroh jienthôngphâ ehia?”

³² Rohkomin atenâng sahloattepa jetrãng Jisu ma tûmlit phoangsok wah.

³³ Dihiaknyu pumma atenâng chenni dangtah a erepa jetritwah, ephumma tiichei lahma Jisu dathongko dakuhtho lahma khupjup kalahma atenâng toangtang nginpa phangtang loatthô kohwah.

³⁴ Jisu ma atenâng ngatwah, “Ngachha, nang putedâlem junko sen eko. Khuhah nâhah chhoan o, ngale khoanchet kowah lâsentoh.”

³⁵ Jisu ma arepa ngatthuko, Jairas humwah nginmatte kalahma Jairas nâng thôkoh wah, “Nang chhapa riitah. Hethôtepa chenrãngma chêmsietwên tûea?”

³⁶ Jisu ma thin nginko nâletha thangma, atema Jairas nâng ngatwah, “Nekchei, Joban nâng putedâlem o.”

³⁷ Ephumma ate demko henjô johwãng thuk ho, piter, Jems, ngale ate pho Jon lolo johwâng thukwah.

³⁸ Thin Jairas humnâng hokkhôam hokko, Jisu ma mihnyan heh hahjam tijam ngale nyahrãng raksep waklahma khewah.

³⁹ Atema humkhen nâng wãng lahma thinnâng ngatwah, “Aroh chenrãngma phaangjaang eken a? Chenrãngma sep eken a? Naachha pa riimah - atea jupba reka!”

⁴⁰ Thinma Jisu nâng angit rewah, ephumma atema phangtang junloatwah, ate demko naachha nyong awanii ngale ate dijunte warempa, sietlahma naachha mang chêntah theko wângwah.

⁴¹ Jisu ma naachha dekko lolahma ngatwah, “Talitha, Koum,” ere ngaeka pa, “dihiak chha, ngama nangnâng toansatrãng chien eki!”

⁴² Phumma lemlienma toansat lahma tumlit phoangkhôam wah. (Ate rangpâ pa echhi pânii dângwah.) Arepa khelahma thin nyahrãng bâritwah.

⁴³ Phumma Jisu ma thinnâng arepa hennâng min nekthôkoh en ngama jektângwah. Erediko, “Atenâng chenni akomin phhekchhah thuk en” ngama chienwah.