MAK MA RAANGWAH NGINKONGSEN 16 - NIEMNYAN Naga NT (BSI)

Angakhîn

¹ Pientông rangwo râdiko, Mariam Makdalani, Jems nyong Mariam, ngale Salomi hehma tientumli heh Jisu mangko hutkat kohrãng riakwah.

² Dobatjâ rangkhah rangkho, sanhông rienrienko, thin mangruknâng katwah.

^3-4 Thin lemko jabmînwah, “Mangrukken wah longkâsek pa henma laangphê kohmin a?” (Erepa long dôngmõang dângwah.) Erediko thinma sûwên tahpa longpa loangphechoan khewah.

⁵ Ephum-ma thin mangruk kenko lupka tahpa dekchah ngeko mihwa khetpo keplahma tonglahma khewah - ngale eko thin patrit rewah.

⁶ Atema ngatwah, “Nekpatrii en,” “Ngama ajet, nema rittek retah Nazarat wah Jisu pa lemsû eken. Atea areko ahotu - ate ngakhintah! Sûtan en, atea aretheko thienwah.

⁷ Wãngletma are nginpa ate dijunte hehnâng thôkoh en, ngale piter nângmin thôkoh en: ‘Atea nemako Galili nâng ewãngla a; atema nenâng chenroh thôkohthen a ererãngrãng nema enâng ekhe en.’”

⁸ Ephumma hungnâng tungmaang ngale chei, nungma mangruk wah loatchhoan wah. Thinma hennâng min chenjô thôkoh ho, chenrãngma ngako, thin chei rewah.

NGINKONG SEN APÃ PA THÔANTHÔ (16.9-20) Jisu Mariam Makdalani Tâko Hongwah

⁹ [Jisu ritwah ngakhîn diko, Dobatjâ rangkhah rangkhoko atema juchhih wanengit junlo kotah Mariam Makdalani tâko khebâng thôan hôngwah. Dihiaknyu heh piter ngale ate lemru heh tânâng wãng lahma thinma khetah heh roanche thôkoh wah.

¹⁰ Mariam Makdalani wãng lahma ate dijunte hehnâng thôkoh wah. Thin sep ajoang lahma dângwah; Arediko Jisu ate dedema Asâthôan ngale roantang roanjêng ahîn khope Nginkong pa ate dijunte heh junma sankatma sannyup nâng phoangthô chhoanthuk wah.]

¹¹ ngale chenthu thinma Mariam Makdalani wah Jisu ahîn, ngale ate memin khetah ngama chohtatko, thinma atenâng pute ho.

Jisu ate Dijunte Wanii Tâko Hongwah

¹² Arediko, ate dijunte waniipa thin diaknâng wâng lemko atenii demnâng khemawah rãngrãng ledang hôngwah.

¹³ Ate niima ngakka lahma ahan hehnâng thôkoh wah, phumma erehehma atenii nângmin pute ho.

Jisu Echhi Wathe Tâko Hôngwah

¹⁴ Khedithôan ko, Jisu ate dijunte echhi wathepa phhekchhah chhahthuko thintâko hôngwah. Atema thinnâng ritngatwah, chenrãngma ngako, thinnâng putedâlem aho dângwah, ngale atea ahînma khetih ngama thôkohte hehnângmin lepute thangma thinhungpa chehjâwah.

¹⁵ Atema thinnâng ngatwah, “Hahtokkhoh phangtang nâng chhoanletma nginkongsen pa chentô mihnyan hehnâng phoangthôkoh en.

¹⁶ Henhenma putedâlem lahma baptijem kep eka ereheh khope chohmin; henhenma lepute dangeka ereheh kho lepemin.

¹⁷ Putedâlemte hehnâng patritli moatlem moatrãng chaan kohmin: thinma ngamînko juchhihmin junloatmin; ngale thinma ajatjat jabmemin ejabwak a;

¹⁸ thinnâng pûma mekak akomin, ngale bîmejô memen akomin letâmin; thindekma khunte hehnâng sahlo lahma rangmesoam koh ako khunte heh esen a.”

Jisu Rangkhethung nâng Toansietwên

¹⁹ Teso Jisu thin demnâng jabmîn diko, atea rangkhethung nâng toansietwên lahma Joban dekchahko tôngwãngwah.

²⁰ Dijunte heh chhoan lahma chentô thenâng Joban nginkongsen pa phoangthô chhoanwah, ngale thin demnâng Teso Juma johmoatwah, ngale thinma patritli moatlem moeka junko thinma phoangthô eka Nginkongsen pa toangtang nginkong ngama putewah.