MAK MA RAANGWAH NGINKONGSEN 15 - NIEMNYAN Naga NT (BSI)

Jisu Pilat Mathah nâng Chep

¹ Rangkhah rangkhoma soam aroakte adong heh khhepho phannang, Niemarang hethôte, ngale ngoang awang heh demnâng ngin pûnthômîn wah. Thinma Jisu janruma khhek lahma Pilat nâng siethok kohwah.

² Pilat ma atenâng thôngphâ wah, “Nanga Jews heh Lowang ne?” Jisu ma dânthâng wah, “Nangma lâpun jabtoh.”

³ Soam aroakte adong hehma Jisu nâng jahmõang athe loatwah,

⁴ Ephumma Pilat ma atenâng wîen thôngphâ wah, “Nangma ledanthang minne? Thinma nang lelatnâng thôeka heh tattan!”

⁵ Erekomin Jisu ma chenjô dânthangmah, phumma Pilat bârit rewah.

Jisu Ritpherãng Nginpat

⁶ Adankhoam lokuh roakweih mihnyan hehma henpa lângphe kohhi ngama thaeka mihnyan pa Pilat ma phâtek wah chîlaang phewah.

⁷ Ere sanpoatko mihwa wathe ate mînpa Barabas ngama mihritphete heh demnâng roamlahma phâtek nâng dângwah.

⁸ Chenthu mihnyan heh khôan lahma jâhanwah rãngrãng Pilat wah thâko,

⁹ Pilat ma thinnâng thôngphâ wah, “Ngama Jews heh Lowang pa laangphekoh a?”

¹⁰ Pilat ma senthemthem jetlahma dângwah, soam aroakte adong hehma Jisu nâng khûsê mitchek junko nganâng lohûkoh ehang ngama.

¹¹ Phumma soam aroakte adong hehma mihnyan hehnâng Barabas laangphe kohhi ngama thârãng thôkoh wah.

¹² Phumma Pilat ma mihnyan hehnâng wîenthe ngakchien katwah, “Eroh medang ako, nema Jews heh Lowang ngama nga ekenko ngama chenre anga?”

¹³ Thinma, “Arittek reo!” ngama dânthâng wah.

¹⁴ Pilat ma thôngphâ wah, “Roh medang ako atema chenni chhihmotah a?” Phumma thinma, “Arittek reo!” ngama ajah chaanrak wah.

¹⁵ Pilat ma mihnyan heh rinmethuk hunma atema Barabas laangphê kohwah. Erediko atema Jisu nâng watlahma rittekthuk wah.

Sipâhi hehma Jisu nâng Dûmmek

¹⁶ Sipâhi hehma Jisu Govono hum thakhoko sietwênwah, ngale thinlemru ahan hehmin roowah.

¹⁷ Thinma Jisu nâng khetchekpa pohkoh rewah, ngale suhkãngwah khaphok hôan lahma ate khoko phokkoh rewah.

¹⁸ Erediko thinma atenâng jôjêm nungma: “Jews heh Lowang roanlo hin o!” ngama ngatwah.

¹⁹ Thinma ate khoko thankahma wat rewah, thoakkahma thoak relahma thin dakuhtho lahma atemako khupjup wah.

²⁰ Chenthu thinma atenâng dûmmek diko, khetchekpa ngakkoakphe kolahma ate khetpa ngakpoh kohwah. Erediko rittekrãng sietchhoanwah.

Jisu Rittek

²¹ Thinma lemko mihwa wathe chohmînwah, ate mînpa Simon dângwah, atea thindiak wah sumhah nâng katdângwah. Phumma sipâhi hehma atenâng Jisu bãngphakpa pêthukwah. (Simonpa Kren diakwah dângwah, ngale atea Alexandra ngale Rufus wa dângwah.)

²² Thinma Jisu Golgotha theko sietwênwah, are ngaeka pa, “Mangkhora sekthe” ngama ngaeka.

²³ Eretheko thinma Angurti pa Myrh ngama ngaeka phem demko seklahma Jisu nâng jokthukwah, phumma Jisu ma erepa jok ho.

²⁴ Erediko thinma Jisu rittekwah, ngale ate khetpa henma chenre chhuppa chenchoh ea ngama longkendoh nâng tan lahma phenkepwah.

²⁵ Thinma Jisu rittektah sanpoat pa rangkhah wanekhu sanpoat nâng dângwah.

²⁶ Jisu nâng sekham nyapraangpa: “Jews heh Lowang.” Ngama raangkohwah.

²⁷ Thinma Jisu demko ate dekhitko wathe ngale dekchah wathe ahuhte wanii johrittek wah.

²⁹ Erekowah dankhoamte mihnyan hehma thin kho heklahma Jisu nâng jôjêmwah: “Ha! Nangni Rangsoamhum pa runsiet lohma jâremko ngakhôante pa!

³⁰ Bãngphak khokowah jâkhoam kalohma nangdede pepângriio”

³¹ Ererãngrãngjô soam aroakte adong ngale Niemarang hethôte hehma Jisu nâng jôjemwah, thinma wathema watheko jabmînwah, “Atema mihhan heh tapepâng eka, phumma atedede tapângrii mah

³² Isrial heh Lowang, Misaia pa bãngphak khokowah jâkhoam katpa sûtan e, ephumma nãngmemin atenâng epute e!” Ngale Jisu demwah wanii johrittektah niimemin Jisu nâng jôjêmwah.

Jisu Rit Ngin

³³ Sanhêmthah ko diaktang rangnyek tungtung dângwah, erepa koantarem rãng leknyekwah.

³⁴ Wanrem sanpoatko Jisu chaanmõang raksepwah, “Eloi, Eloi, Lama Sabatthani?” are ngaeka pa, “Nga Joban, Nga Joban, nangma nga chenrãngma thinphe ehanga?”

³⁵ Erekowah mihnyan hehma ate rakseppa tatlahma ngatwah, “Tattan en, atema Ilija rooeka!”

³⁶ Thinkhuwah wathe chhoanka lahma jochupli pongpe noap pa angurti chhihnâng rumkat lahma thankah rako hetwah. Erediko atema Jisu thunkhoap ko tupsuhwên kolahma ngatwah, “mamêngtan! Thatsûtan e, Ilija kalahma bãngphak khokowah chenjâpe karale!”

³⁷ Jisu chaanmõang raksep lahma ritwah.

³⁸ Jisu ritdiko Rangsoamhum kowah khet tintahpa rangkhoh pumma daphang tôko khaniirãng khâjâwah.

³⁹ Bãngphak mathah ngekowah cheplahma dangtah Sipâhi sahhab pumma Jisu chenroh riitah a erepa khewah. “Are mihnyan pa linlinjô Joban Chha dângwah!” ngama atema ngatwah.

⁴⁰ Dihiak khuthe hahtaangma sûlahma dângwah. Are dihiaknyu heh, Mariam Makdalani, Jems le Josepnii nyong Mariam, ngale Salomi dângwah.

⁴¹ Jisu Galili nâng dângpoatko thinma Jisu diko junkhoam lahma atenâng chohsok wah. Ajahthem dihiaknyu ate demko Jeroselem nâng johkatah hehmin dângwah.

Jisu Mangbin

^42-43 Sanhêmthah ko Arimatha wah Josep hokkhôam hokwah. Atea Jews heh Ngoang awang chhangko dâlemli mihnyan dângwah, ngale atema Joban Hahsôngpa chenthu hokmin a ngama bemla lahma tôngte dângwah. Erejâpa khoakhêm rangwojâ dângwah (erepa Pientông majâpa dângwah), Ephumma Josep lechei thangma Pilat tânâng wãng lahma atewah Jisu mangpa thâwângwah.

⁴⁴ Jisu riitah ngama tatlahma Pilat patrit rewah. Atema sipâhi dong heh roolahma Jisu ritpa taangtahne ngama thôngphâ wah.

⁴⁵ Sipâhi dong hehwah ngin chohtat diko Pilat ma Jisu mangpa tape chhoan o ngama ngatwah.

⁴⁶ Josep ma khet kephû lahma mangpa jâtôanwah, ngale khetko doap lahma longrãwah thutwah mangrukko rukatwah. Erediko atema mangruk kenpa long kâsekma sekwah.

⁴⁷ Mariam Makdalani ngale Josep nyong Mariam niima Jisu mangthien ekapa jesokwah.