MAK MA RAANGWAH NGINKONGSEN 13 - NIEMNYAN Naga NT (BSI)

Jisu ma Rangsoamhum Chhihjâ junma Jab

¹ Jisu Rangsoamhum wah loatchhoan poatko ate dijunte wathema atenâng ngatwah, “Sûtan, Hethôte! Are Rangsoamhum kowah longheh chentôdông ngale sên a!”

² Jisu ma dânthâng wah, “Nangma are humdong heh khe ekoa? Long phangthemin ate theko letongtumin; phangtang runjâ rêmin.”

Chêmchei ngale Mihma Chêmsiet

³ Rangsoamhum rãnkawah Oliv hahhokho ko Jisu tonglahma dângwah, eko Piter, Jems, Jon, ngale Andru, lolo ate tâko hokwah.

⁴ Thinma ngatwah, “Arepa chenthu dângmin a erepa ninâng thôkohhi,” “ngale areheh dângrãng sanpoat pa lâthângtah ngama jetrãng chendângmin a erepa ninâng thôkohhi.”

⁵ Jisu ma thinnâng ngatwah, “Jetletma dangen, ngale hennâng min nekmok sietrii en.

⁶ Ajahthem mihnyan hehma ngamîn keplahma ehuwakra, thinma ‘nga a ate!’ ngama ngalahma ajahthem mihnyan heh emoksiet a.

⁷ Ngale ne kêanâ hehnângmin erediko hahtaang nângmin rantîn metat enkomin nekchei en. Erohpa metkep dângmin, rohkomin arepa athôan sanpoat pa hûera ngama dangmah.

⁸ Diakthe pumma diakthe demko emênmîn a; wanthe hahsông pumma wanthe hahsông demko khum apanmîn. Chentô thenâng hahtii, ngale rem edanga. Areheh naahôngrãng wok bângkekko chetwah rãngrãng edanga.

⁹ “Nededema jetletma dangen. Nea Sanagog hehnâng siethû lahma ewat hèn; ngale nema hahpênte ngale Lowang hehmako ngamînko chepletma thinnâng Nginkongsen pa ethôkoh en.

¹⁰ Rohkomin athôan sanpoat hokmako, Nginkongsen pa chentô mihnyan nyuchha nâng bengchoh thômêng kohmin.

¹¹ Ngale chenthu ne khhek lahma metloat thinnâng siethokko, nema chenroh dânthâng min a ngama ammama neksekmah en; chenthu sanpoat pa mehûthako, Joban ma chenni jabthuk ehèn a erepa dânthangen. Chenrãngma ngako nema jabmin jabkhabpa newah ledangmin; ereheh Asâthôanju ngewah ehûra.

¹² Mihnyan hehma thinpho anaa heh eritphethuk a, ngale wa hehmemin thinchha heh eroh eritphethuk a. Chha hehmemin thinnyong awa heh lelatnâng danglahma eritphethuk a.

¹³ Anga ngama ngajunma nenâng emitchek hèn. Rohkomin athôan tokokiet henhenpa dâlemsen danglahma lektong eka ere hehba khopemin.

Nyahrãng Cheili

¹⁴ “Nema ‘nyahrãng cheili thôanpa’ ate chepthin theko ledang cheplahma ekhe en.” (Arepa chenni nâng ngaeka erepa weihte hehma jet en!) “Erediko Judia wah mihnyan heh hahkong khonâng huhchhoan wângmin.

¹⁵ Humkho nâng dângte mihnyan pummemin humkhen nâng kalahma ate sêmmak heh ate demko johtôan chhoanrãng sanpoat pa lechhoan thukmin.

¹⁶ Pitnâng dângte mihnyan hehmin humnâng khet akhu toanrãng leta ngakwãngmin.

¹⁷ Ngale ere sanpoat kowah naawunte dihiaknyu ngale naajeng nyong dângte dihiaknyu hehrãngma chentô cheili dângmin a!

¹⁸ Areheh rangpen nâng nekchen dangeka ngama Joban nâng rangsoam en!

¹⁹ Chenrãngma ngako, ere sanpoat kowah chêmcheipa Joban ma rang ahah hôantah thuwah athângheh tôko hahtokkhoh ma chêmchoh eka kowah achhihthôanpa dângmin. Ngale arerãngrãng khedi nângmin chenthujô ledang tumin.

²⁰ Rohkomin Joban ma ere rangwopa thoansiet reka; Joban ma lethoansiet ngako, henmin kho leta peminwah. Atema ren eka mihnyan hehrãngma Joban ma ere rangwopa thoansiet eka.

²¹ “Ngale, henma komin nenâng, ‘Sûtan en, Misaia pa areko tonga!’ ba, ‘ireko tonga!’ ngama menga hènko - atenâng nekpute en.

²² Chenrãngma ngako, Misaia mõang ngale mõngmõang heh ehonga; Ngale Joban ma ren eka mihnyan heh meta diapchhah ekorãng ngama thinma nyahrãng patritli ngale bâritli moatlem hehmin emoa.

²³ Ne jetletma dangen! Ngama chentôpa sanpoat hokmako thôkoh eka.

Mihnyan Chha Hok

²⁴ “Ere chêmchoh sanpoat thôan diwah rangkuhko sanpa nyekjâ erea, ngale dâmin leliettûmin,

²⁵ rangkho wah merit heh jârit erea, ngale rangkho wah chentô kheki hehmin thinthe kowah emahjâa.

²⁶ Erediko Mihnyan Chhapa phoamkhohko tonglahma chaan ahang ngale phiakto phiakja ehongkara.

²⁷ Atema rangwah ngintatte heh hahtokkhoh sukbeliiko chienchhoan lahma Joban ma ren eka mihnyan heh sukthe ma sukthe kowah ekhoansiet a.

Phukbãng wah He

²⁸ “Phukbãng kowah chohjet en. Chenthu phukbãngpa hinchîchî, noapjokjok, ngale bãngchhong chhongnyan mechhong tahko, nema rangcho lânam hutha ngama rângjet en.

²⁹ Ererãngrãng chenthu ngama nenâng thôkotah heh danglahma mekhe tetko, nema athôan sanpoat pa lânamtha, ngale lâhuera ngama jet en.

³⁰ Thonghun en, are chentôpa athângwah ahînte mihnyan heh phangtang târitmako edanga.

³¹ Rangle hah eta chhihjâa, rohkomin Nga jabkhabpa chenthumin leta chhihjâmin.

Henmemin Rangwo Sanpoat pa Tajetmah

³² “Ere rangwo le sanpoat pa chenthu hokmin a erepa henmemin jetmah - rangkhethung wah Joban ngintatte hehmemin jetmah, ngale Chha memin jetmah, ere rangwo sanpoat pa Wa Joban ma lolobajet a.

³³ Jetletma dangen, ngale chep achã letma tongen, chenrãngma ngako sanpoat pa chenthu hokmin a erepa nema jetmet.

³⁴ Erepa mihnyan wathema ate humpa haa hehnâng phethien kolahma, ngale haa hehnâng mâmâ moatlem phenthienkoh, erediko kâsek bemteko senthemthem bemrãng thôthienkoh relahma ate humwah hahtaang nâng tongchhoanwah rãngrãng dângmin.

³⁵ Erohwah chep achã letma bembemjû tongen, chenrãngma ngako hum tângtewa pa chenthu hokmin a erepa nema jetmet - rangjâthah nângmin tahûra, ba rangpen mongtang nângmin tahûra, wowenkho nângmin tahûra, ba rangkhahkho nângmin tahûra.

³⁶ Nema lejetpoatko ate sitsiak mehong hûrako, ne juplek letma nekchen khehû ehèn.

³⁷ Ngama nenâng chenni ngaeka, erepa chentô nâng ngaekang: Chep achã letma bembemjû tongen!”