MAK MA RAANGWAH NGINKONGSEN 12 - NIEMNYAN Naga NT (BSI)

Angurthong Khoakhêm Sokte Nginthakthô

¹ Erediko Jisu ma thinnâng nginthakthô demnâng thôkoh wah: Atema ngatwah, “Rekthenâng mihnyan wathema angur khiet lahma panma tûmhoan rewah, ngale angurti koakthin koan thienrãng hahkenthu rewah, ngale abemte tôngrãng humchoang hoan rewah. Erediko aroamrãng angurthongpa mihnâng mothukthien lahma atea hahtaang nâng chhoanwah.

² Angur chum lahma khôanpûn rangkuh hokphumma tângte pumma ate haa heh aroamrãng mothuktah heh tânâng ate thiak thârãng chienkatwah.

³ Aroamrãng moatte hehma haapa loatwah, ngale watlahma chenjô lekoh thangma ngakchien wênwah.

⁴ Erediko tângte pumma haahan wîenthe chienkatwah; phumma aroamrãng moatte hehma haa khokowat lahma rêsê rêphe hôanjôan wah.

⁵ Tângte pumma haahan wîenchien katwah, ngale erepemin thinma ritphewah; ngale ajahthem ahan hehnângmin thinma erohjô hôanjôan wah, khakako buh awat ngale khakapa ritphe rewakwah.

⁶ Tângte pumma nyahrãng hunlahma thieneka ate chha wathelolo peba machienkat dângwah. Khedithôan ko aroamrãng mothuktah heh tânâng ate chhapa chienkatwah. Atema ngatwah, ‘Ngama thonghun ekang, thin ngachha ran metkep echeiwak a.’

⁷ Phumma aroamrãng motah hehma thindede tungko jabmînwah, ‘Arepa tângte chhapa. Chepen atemin ritphe e, ephumma ate thiak aman heh nãngrãng edanga!’

⁸ Ephumma thinma lolahma ritphewah ngale ate phoangpa angurthong panlien nâng phekatwah.”

⁹ Jisu ma thinnâng thôngphâ wah. “Eroh medang ako, angurthong tângte pumma chenni rêmin a?” “Tângte pumma angurthong aroamrãng mothuktah heh ritphe lahma angurthong pa ahannâng emothuk a.

¹⁰ Linlin nema are Joban nyapraang pa weihtet a? ‘Humhôante ma achhih ngama petphe eka longpa chentô noma alemthôan rãng dangeka.

¹¹ Arepa Teso ma moatwah; nãngmit sokko patritli sên moeka!’ ”

¹² Jews khhepho phannang hehma Jisu loatkhhekrãng themawa wah, chenrãngma ngako Jisu ma are nginthakthô pa thin lelatnâng thôeka ngama thinma jetloatwah. Rohkomin thin a mihnyan heh rancheiwah, erohwah thinma Jisu phethien lahma chhoanwah.

Thãkhokoh junma Chhien

¹³ Jisu nâng ngin thongpha lahma bukrit thukrãng Farasi ngale Hirot mihnyan heh khuthe chienhokwah.

¹⁴ Thin Jisu tânâng hûlahma ngatwah, “Hethôte, nima ajet nanga mihnyan hehma manga hango ngamemin lesoang thangma toangtangko thôte. Ngale nangma mihnyan heh hennângjô adong arin roak ataokmin leweih thangma Joban nginpa toangtangma phoang hethôeko. Thôkoh tanhi, nãng Niem junko Roman Chofa nâng thãkho takoh ele takohmih a? Nima koh ele kohmih a?”

¹⁵ Phumma thinma themawa ekapa Jisu ma lienkhe lahma dânthâng wah, “Nema nga chenrãngma bukritthuk hun eha? Janngun wah kohtanha, ngama sûtan ang.”

¹⁶ Thinma janngun wanthe kohwah, ngale Jisu ma thinnâng chhienwah, “Arepa hen thhenphanga ngale henmîn raangeka?” Thinma, “Chofa,” ngama dânthâng wah.

¹⁷ Ephumma Jisu ma thinnâng ngatwah, “Eroh medang ako chenpa Chofa thiak a arepa Chofa nâng koh en, ngale chenpa Joban thiak a arepa Joban nâng koh en.” Phumma Jisu nginko thin bârit rewah.

Aritwah Ngakhîn junko Thôngpha

¹⁸ Erediko mihnyan ritwah ngakhinmah ngama ngatte Saduki khuthe Jisu tânâng hûlahma atenâng ngatwah,

¹⁹ “Hethôte, Mosa ma are Niempa nãngrãngma raangwah: ‘delawa wathe chha machhama merii ako, atema phethien eka janthoinyupa atenaa ma chhachhatrãng ngakkepmin, phumma erewanii pumma chhaeka naapa rit retahwa chha ngama ngatmin.’

²⁰ Rekthenâng chhepho waengit dângwah; Khhepho thôan pumma dihiak keplahma chha machhama ritwah.

²¹ Phumma medemwa pumma ere dihiaknyu pa kepwah, ngale atemin chha machhama ritwah. Phumma ere dikowah pummemin erohjô keplahma chha lechha thangma ritwah,

²² ngale ahan hehmin erohjô ritwah: Chhepho waengit latma dihiaknyu pa keplahma chha lechha ma tuta ritwah. Khedithôan ko dihiaknyu pemin ritwah.

²³ Phumma ritte heh phangtang ngakhîn jâko, dihiaknyu pa hen dihiak dângmin a? Waengit latma ate kepwah.”

²⁴ Jisu ma thinnâng dânthâng wah, “Nea nyahrãng athe! Ngale chenrãngma the eken a erepa nemajet en a? Nema Joban nyapraang ngale Joban chaanpa lejet junko the eken.

²⁵ Chenrãngma ngako chenthu ritte heh mengak hintahko thin a rangkhethung wah Joban ngintatte rãngrãng dângmin ngale dihiak dela lekepmîn tumin.

²⁶ Aritte heh ngakhîn junko: Mosa ma raangwah titabko wunbuk nâng wendô junko raangtahpa nema mathat weihne? Ereko Joban ma Mosa nâng ngalahma raangeka, ‘Nga a Abraham Joban, Isak Joban, ngale Jakob Joban.’

²⁷ Atea ahînte heh Joban, aritte heh Joban dangmah. Nea nyahrãng lâthetet!”

Joban wah Hôkum Dongthôan

²⁸ Eretheko Niemarang hethôte wathe dângwah, atema are ngin thômînpa tatwah. Ngale Jisu ma Saduki hehnâng senthemthem pundânthang lahma khewah, ephumma atema Jisu tânâng kalahma chhienwah: “Mosa Niem kowah chenpa alemthôan a?”

²⁹ Jisu ma dânthâng wah, “Alemthôanpa arepa: ‘Isrial heh tattan en! Teso nang Joban pelolo jôba Teso.

³⁰ Nang Teso Joban nâng nanghung nangrñ phangtang kohlohma hun o, ngale ju amoangmin phangtang kohlohma hun o, erediko nangchaan phangtang kohlohma hun o.’

³¹ Ere dikowah nyahrãng alemthôan hôkum pa arepa: ‘Nangtok akhungwah mihnyan hehnâng nang dedeko hunriieko rãngrãng hun o.’ Are wannii noma alem hôkum ahan ahotu.”

³² Niemarang hethôte pumma Jisu nâng ngatwah, “Hethôte, lasen jabtoh! nangma jab ekopa toangtang jôba, Teso lolojôba Joban, ngale joban ahan ahotu.

³³ Ngale nangma nang Joban nâng hung arin, chaan ahang phangtang kohlohma hun o; ngale Nangtok akhungwah mihnyan hehnângmin nang dedeko hunriieko rãngrãng hun o. Erepa Joban nâng ngem angah demnâng soam aroak nomemin ere wannii hôkum pa ajah alemli.”

³⁴ Niemarang hethôte pumma nginsen dângthângpa Jisu ma khelahma, atenâng ngatwah, “Nanga Joban Hahsông kowah taangmoh.” Ere diphumma Jisu nâng henmemin ngin ajah chinchhien tuho.

Misaia junma Thôngphâ

³⁵ Jisu ma Rangsoamhum nâng hethô poatko, atema ngin chhienwah, “Niemarang hethôte hehma Misaia pa Devit Chhu achha dângmin ngama chenroh jiennga eka?

³⁶ Asâthôanju ma Devit nâng jabthukwah: ‘Teso ma nga Teso nâng ngaeka: Ngama nangran heh nang daphâ khenko mathien thienkoh kiko nanga are nga dekchahko tongo.’

³⁷ Devit dedema atenâng ‘Teso’ ngama roowah; eroh medang ako Misaia pa Devit Chhu achha chenroh jiendângmin a?” Jahmõang mihnyan ma Jisu nang khuhah nâhah jetatwah.

Jisu ma Niemarang Hethôte hehnâng Achhih Ngat

³⁸ Jisu ma hethô poatko aroh ngatwah, “Niemarang hethôte hehwah jetletma dangen, thin a bôjat hehnâng khetlo dongpa pohlahma phoangkhoam lahma mihnyan hehma thin rancheichei rânjab hun eka,

³⁹ Thinma Sanagog nângmin thin tongthinpa châthien eka ngale kuhhôanthin nângmin tôngthinsen hunwak eka.

⁴⁰ Thinma janthoinyu heh helemrãng keplahma thin humpa longchhah rewak eka, ngale thinnâng ranglolili soamko lahma khesok eka. Erethã thinma ajahthem chêmchhih echoh a!”

Janthoinyu ma Ngunsek Koh

⁴¹ Rangsoamhum wah ngunsek bâkoat tâko Jisu tonglahma mihnyan hehma ngun sekhok pa sokwah. Techhu hehma ngunpa jahmõang sekhokwah;

⁴² erediko tangchhih janthoinyu hûlahma janngun wannii sekhokwah, erepa phanii ngun tôtha dângwah.

⁴³ Phumma Jisu ma ate dijunte heh khôanroo lahma thinnâng ngatwah, “Ngama linlinthôkoh eka, are tangchhih janthoinyu pumma Joban chohse ngun bâkoatko chentô noma ajahthôan sek eka.

⁴⁴ Chenrãngma ngako, ahan hehma thinnâng lephang leleng bâeka hehwah sekhû eka; rohkomin atea aretô tangchhih danglahma atenâng chentô tonga erepa janthoinyu pumma phangtang sekkoh eka.”