MAK MA RAANGWAH NGINKONGSEN 11 - NIEMNYAN Naga NT (BSI)

Tajien Lahma Jeroselem nâng Hok

¹ Thin a Jeroselem nâng hunemnem dângko, Batphas ngale Bathani hah wah Oliv hahhoko wângwah. Phumma Jisu ma ate dijunte wanii khema nâng chienwên lâwah

² Jisu ma aroh ngatwah: “Nema kowah hahdaangko wãngen. Ereko ne hokwâng rienrien, Gado chha henjô mathat chhang thiet lahma etongla a. Erepa jânletma anâng sietkatren.

³ Ngale henma komin chenrãng sietchhoan eken a ngama mechhien hènko, Hethôtema lemeka, sitsiak engak sietwênkoh e ngama thôkoh en.”

⁴ Ephumma thin wãng lahma Gado chhapa lemkah wah hum kâsekko thietlahma chohkhe wah. Thinma erepa jân poatko,

⁵ erekowah chepte hehma thinnâng chhienwah, “Nema chenre eken a, Gado chhapa chenrãng jân eken a?”

⁶ Thinma chenroh Jisu ma thôkotah a eroh dânthâng wah, ephumma mihnyan hehma chhoanthuk wah.

⁷ Thinma Gado chhapa Jisu tâko sietkat kohwah, ngale thin khet heh Gado khohko kêmko lahma Jisu chhangthuk wah.

⁸ Jahmõang mihnyan hehma thinkhet heh lemko kêmkoh rewah, ngale ahan hehma pitwah bãngphak doak lahma lemko kêmkoh rewah.

⁹ Jisu diama kowah johkhôamte mihnyan hehma, “Joban nângrôe! Teso mînko hoktenâng Joban ma rangkoh eka! ngama rakwah.

¹⁰ Joban ma ahokmin wah nãngwa Devit Lowang Hahsôngko rangkoh eka! Joban nângrôe!”

¹¹ Jisu Jeroselem nâng hûlahma Rangsoamhum nâng wângwah, ngale atema chentôko tumlit phoangsok wah. Phumma nyahrãng sanhêmthah dangchoan dâng phumma, ate dijunte echhi wanii demnâng Bathani hahnâng katwah.

Jisu ma Phukbãng nâng Têm Athoak

¹² Eredijâko, thin Bathani wah ngakwângko, Jisu rêmritwah.

¹³ Jisu ma roanchhe ataang manko Phukbãng dek jahmõang demnâng khekatwah, phumma phukri machohlek o ngama Jisu kalahma sokkatwah. Bãngthongko hûka lahma phoangsokko atema bãngdek loloba chohkhe wah, chenrãngma ngako ere rangkuhpa phukriri rangkuh ledangwah.

¹⁴ Phumma Jisu ma Phukbãngko, “Henmemin nangwah phukri lechoh chhahtumin!” ngama ngatthien wah. Ere ngatpa ate dijunte hehma leptatwah.

Jisu Rangsoamhum nâng Wâng

¹⁵ Thin Jeroselem nâng hokdiko, Jisu Rangsoamhum nâng wãng lahma chentô phinsâng thãsengte heh junloatwah. Ngale ngun litmînte heh khoang heh dâthinphe rewah, erediko phariwo sângte tôngthin heh rephekoh rewah,

¹⁶ Ngale Jisu ma Rangsoamhum thakho ma hennâng min chenjô danpe thuktuho.

¹⁷ Erediko Jisu ma mihnyan hehnâng hethô wah: “Joban nyapraang nâng Joban ma aroh ngalahma raangeka, ‘Nga Rangsoamhum pa chentô diak akanwah mihnyan hehrãngma Rangsoamhum ngama ngatmin.’ Phumma nema ahuh heh huhtong thinrãng hôan eken!”

¹⁸ Soam aroakte adong ngale Niemarang hethôte hehma erengin pa chohtat lahma, thinma Jisu chenrohma jienritphe ea ngama lemkhô lêmsokwah. Thin Jisu ranchei dângwah, chenrãngma ngako mihnyan heh phangtang atema hethôeka junko bârit rewah.

¹⁹ Sanhêmthah phumma Jisu le ate dijunte heh erehah kowah loatchhoan rewah.

Phukbãng wah Chohjet

²⁰ Eredijâ rangkhah rangkhoma, thin lemko khôam jenjenko phukbãngpa lepkhewah. Ere phukbãngpa phak ara ma bãngrin tôkotuk choakjâ lahma dângwah.

²¹ Piter ma chhemthonghun lahma Jisu nâng ngatwah, “Sûtan, Hethôte, nangma temtoh phukbãngpa choakjâtah!”

²² Jisu ma thinnâng dânthâng wah, “Joban nâng putedâlem en.

²³ Ngama nenâng linlin thôkoh eka, henma komin ate hungnâng letûngmaang thangma are hahkongko nangdede josiko rutjâkao, ngama chien lahma atema jab ekapa metkep edanga, ngama meputedâlem ako, erepa metkep erutjâa.

²⁴ Erohwah ngama nenâng thôkoh eka: Chenthu nema rangsoam letma chenni komin metha enko, erepa lâchohtih ngama putedâlem en, ngale nema chenni thaeken a, erepa nenâng ekohhèn.

²⁵ Chenthu nema toanchep letma rangmesoam enko, nema hen demnâng komin chenrãngma komin chhihchohmîn letma lelat metong hènko erepa map bângkoh mêngen, erohkoba nema chenni chhihmotet a erepa rangkhethung nâng tôngte ne Wa Joban ma map ekohhèn.”

Jisu Chaanpa Chenwah Choh eka ngama Thôngphâ

²⁷ Jisu le ate dijunte heh Jeroselem nâng ngakhok wah. Phumma Jisu Rangsoamhum khenko phoangkhôamko, soam aroakte adong, Niemarang hethôte, ngale khhepho phannang heh Jisu tâko hûlahma

²⁸ atenâng thôngphâ wah, “Nangnâng areheh moatrãng chenwah chaantong ehoa? Are chaanpa henma koh ehoa?”

²⁹ Jisu ma thinnâng dânthâng wah, “Ngama nenâng ngin wanthelolo chhien a, phumma nema arepa mejien dânthang hako, ngama areheh chenwah chaanma tamo ekanga erepa nenâng thôkoh a.

³⁰ Nganâng thôkoh tanha, Jon ma chenwah chaanchoh lahma baptijem kohwah a: Erepa Joban wah chohwah ale, mihnyan wah chohwah a?”

³¹ Phumma thindede tungko chhiakmîn wah: “Nãngma chenroh dânthangea? ‘Joban wah choheka’ ngama medânthang eko, ‘Atema, eroh medang ako, chenrãngma nema Jon nâng lepute dangeken a ngama engahi?’

³² Phumma nãngma, ‘mihnyan wah...’ ” (Thin mihnyan heh ranchei rewah, chenrãngma ngako, anga ngama Jon pa mõng ngama thônghun wah.)

³³ Ephumma thinma Jisu nâng, “Nima jetmih” ngama dânthâng wah. Jisu ma thinnâng ngatwah, “Eroh medang ako ngamemin chenwah chaanma areheh tamo ekanga erepa nenâng thôkomah.”