MOATLEM 8 - NIEMNYAN Naga NT (BSI)

¹ Ngale Sol memin Stifen ritphe pa asen ngama ngatwah. Erejâ phumma Jeroselem wah Asâthem hehma nyahrãng chêmchhih bengchohwah. Putedâlemte heh phangtang Judia ngale Samaria diaktang nâng phoangphân chhoanwah, moattat chhoante heh loloba lephanchhoan thangma tôngwah.

Sol ma Asâthem heh Chêmsiet

² Joban nâng senthemthem soamte khuthema nyahrãng raksep nungma Stifen mangpa bînchhoanwah.

³ Sol memin Asâthem heh chhihsiet rãng phungwah; humhumnâng phoangchhoan lahma putedâlemte dihiak dela phangtang phoangsiet chhoan lahma, ereheh phâtek nâng sekhokwah.

Samaria nângmin Joban Nginkongsen pa Thôkoh

⁴ Putedâlemte phanchhoantah hehma chentô thenâng Joban nginkongsen pa thôchhoan wah.

⁵ Filip Samaria nâng katwah ngale Samaria nâng kalahma enângwah mihnyan hehnâng Misaia nginkongpa thôkoh wah.

⁶ Mihnyan heh nyahrãng namhû lahma Filip nginko jetat wah, ngale atewah ngin jettat demko atema patritli moatlem moeka hehmin khewah

⁷ Ajahthem mihnyan wah juchhih min chaanmõang raksep lahma loatchhoan wah, ngale ajahthem kôasô khoanchette ngale dakò hehmin sênwah.

⁸ Ephumma erehahko nyahrãng khuhah nâhah dângwah.

⁹ Erehahko Simon ngama mihnyan wathe dângwah, phumma atema poatthe rãng Samaritan mihnyan hehnâng ate ngewah jâdu pumma hôanlahma bâritthuk wah. Simon ma atemin wanthe adong ngama rângthôrii lahma dângwah,

¹⁰ ngale erehah kowah chentôma, adong arin anga ngama, ate nginko hungkoh lahma jetatwah. “Atenâng ‘Joban chaan adongthôan chaanpa,’” ngama thinma ngatwah.

¹¹ Simon jâdu pumma melâng rangpâ thin lekbârit thuk junko mihnyan hehma ate ngin pa kepwah.

¹² Roh komin chenthu thinma Filip wah Joban Hahsông nginkongsen le Jisu Krista nginpa chohtat phumma, dihiak dela phangtang baptijem kepwah.

¹³ Simon memin ere nginko putedâlem wah; ngale baptijem kepdiko, Filip kêkêko namhokwah, ngale chenthu Filip ma nyahrãng patritli le bâritli heh moat khelahma atemin bâritwah.

¹⁴ Jeroselem wah moattat chhoante hehma Samaria wah mihnyan hehmemin Joban jabkhab pa keptah ngama chohtat phumma thinma Piter le Jon nii thin tânâng chienkatwah.

¹⁵ Chenthu thin Samaria nâng hokkat phumma, enângwah putedâlemte hehma Asâthôanju chohrãngma rangsoam kohwah.

¹⁶ Chenrãngma ngako thinnâng hennâng min Asâthôanju maka dângwah; thinma Teso Jisu mînko lolo baptijem bengkep dângwah.

¹⁷ Erediko Piter le Jon niima thin khohko dekma sahloatwah, ngale erediko thinma Asâthôanju chohwah.

¹⁸ Piter le Jon niima putedâlemte heh khohko dekma sahloatko Jupa chohlahma khephumma, Simon ma ngun kohlahma Piter le Jon niinâng

¹⁹ ngat-wah, “Nga nângmin are chaanpa kohha, ngamemin henhen khohnâng nga dekma sahlokoh ekanga ereheh ma Asâthôanju chenchoh a.”

²⁰ Phumma Piter ma atenâng dânthâng wah, “Nangma Joban wah hînhô pa ngunma târiakli ngama thônghundi nangngun nechhe pap wendô nâng ekaen!

²¹ Nangma are ni moatlemko tajoh momahhi, chenrãngma ngako nang hungpa Joban mathahko achhih.

²² Nangma are achhih themawa eko hungpa litlohma Teso nâng rangsoam o, erohkoba nangma are achhih thonghun ekopa Joban ma map ekohho.

²³ Chenrãngma ngako, nanghung pa achhih akhah le mihphetwan lolo, erediko nanga papma khhekthien lahma kheki.”

²⁴ Simon ma Piter le Jon niinâng ngatwah, “Are nechhema jabeken heh nganâng lechatrãng, nechhema Teso nâng rangsoam mêngkohha.”

²⁵ Piter le Jon niima Samaria wah mihnyan hehnâng atenii ma Joban moatlem moatpoat wah ngin heh thôkoh, erediko Teso nginkongsen heh thôkoh diko atenii Jeroselem nâng ngakwâng wah. Thin ngakwâng lemkomin melâng Samaria hahdaang hehnâng Joban nginkongpa thôthien kohwah.

Filip ngale Ithopia wah Sahhab

²⁶ Rangwah Teso ngintattema Filip nâng ngatwah, “Cheplohma dekchah nâng wãngo Jeroselem wah Gaza nâng katlemko kao.” (Thenep thejâ arelem pumma khoamtumah.)

^27-28 Ephumma Filip toanchep lahma chhoanwah. Eko Ithopia wah delawa wathe atea lengtênchhoan dela dângwah, ngale atea Ithopia Wangcha ngun thiente sahhab dângwah, phumma ate Jeroselem nâng rangsoam rãng kalahma ate mokgari pumma humnâng ngakwâng dângwah. Ngale mokgari ko chhang nungma atema Isaia mõng titab kowah weihlahma dângwah.

²⁹ Asâthôanju ma Filip nâng ngatwah, “Wãng lohma mokgari ko chhang wãngo, ngale ate kêko tongwãngo.”

³⁰ Phumma Filip wãng lahma Isaia mõng titab kowah weihlahma tatwah. Filip ma atenâng chhienwah, “Nangma weih ekopa jet ekole?”

³¹ Ere sahhabwa pumma dânthâng wah, “Arepa nganâng henma komin lethôkoh hangko ngama chenroh ejienjet anga?” Phumma atema Filip nâng mokgari ko nga tâko chhangwãngro ngama roowah.

³² Joban nyapraang kowah atema weih tahpa arepa weihwah: “Atea ajoatrãng sietchhoan eka saak rãngrãng, ngale saakchha ma ate baan khenpoatko lesep rângdanga rãngrãng. Atema khabthemin loatjabmah.

³³ Atenâng thãjô lembe hôanjôan wah, ngale atea toangtang medang komin erejunko ledangwah. Ngale henmejô ate liala junma lejien thômin, chenrãngma ngako, are hahtokkhoh kowah ate roangdong pa thôantah.”

³⁴ Sahhabwa pumma Filip nâng chhienwah, “Arepa mõng ma hennâng ngaeka erepa nganâng thôkohhang? Atedede junma jab ekale mihhan nâng ngaeka?”

³⁵ Ephumma Filip ma atenâng thôkoh wah; Atema weihtah Joban nyapraang pumma bengthô kolahma Jisu nginkongsen heh phangtang atenâng thôkoh wah.

³⁶ Atenii lemko katjenjenko, jo roanche tônglâwah, phumma sahhabwa pumma ngatwah, “Are theko jo roanche tonga. Ngama baptijem keppa chennima tâtângmin a?”

³⁸ Sahhabwa pumma mokgari pa chepthuk wah, ngale Filip le sahhabnii joko jâkhoam kalahma atenâng Filip ma baptijem kohwah.

³⁹ Chenthu thin jokowah loatwângko, Teso Juma Filip tôansiet chhoanwah. Erediko sahhabwa pumma Filip thengak khetuho, rohkomin sahhabwa pa khuhah nâhah ate humnâng wângwah.

⁴⁰ Filip atedede Azotus hahnâng hônghokwah; phumma atea Kasaria nâng wângwah, ngale ate wânglemko chentô hah hehnâng nginkongsen pa phoangthô kohwah.