MOATLEM 6 - NIEMNYAN Naga NT (BSI)

Waengit Chohsokte

¹ Khediko lele, dijunte heh jahwâng rienrien, Griik jabma jabte Jews heh Hibru jabma jabte ahan Jews heh demnâng chhihchohmîn wah. Griik jabma jabte Jews hehma thin janthoinyu heh rangwo roakweih phhekchhah phenko chohmah ngama ngatwah.

² Ephumma echhi wanii moattat chhoante hehma phangtang aroamma khôanroo lahma ngatwah, “Nãngma Joban ngin phoangthônâng hung lekoh thangma ngun akem nâng sêmpa senmah.

³ Erohwah, lemruchha heh, nekhuchhang wah Asâthôanju mênchong dângte ngale hungkhem rinkhem mihnyan hehwah waengit mihnyan ren en, phumma nãngkhuma thinnâng areheh phên asên moatlem mothuk e.

⁴ Ephumma nãngkhu sanpoat phangtang rangsoam ngale Joban ngin phoangthônâng koh e.”

⁵ Moattat chhoante heh nginko putedâlemte heh phangtang hungsên wah, ephumma thinma putedâlem asente ngale Asâthôanju mênchong dângte heh rênwah, erepa Stifen, Filip, Prokoras, Nikanor, Timon, Parmena, ngale khemako Judiejem rãng litdangte Antiok wah Jews ledangte Nikolas rênwah.

⁶ Putedâlemte hehma areheh moattat chhoante hehnâng siethok kohwah, phumma moattat chhoante hehma ere mihnyan heh khohko dekma sahlo lahma rangsoam kohwah.

⁷ Ngale ephumma Joban nginpa lejektû thangma jêngjah jahphoangthô rewakwah. Erediko Jeroselem nâng putedâlemte hehmin jêngjah jahhong rewah, ngale soam aroakte hehmemin ajahthem ma putedâlem wah.

Stifen Loatkhhek

⁸ Stifen nâng Joban ma nyahrãng rangkoh wah, ngale atenâng Joban chaan mênchong dângwah, atema mihnyan heh tâko nyahrãng patritli le bâritli moatlem heh moatwah.

⁹ Rohkomin Mihhaa dângwah jeklahma Sanagog nâng johdângte mihnyan hehma atenâng jektângwah (ereheh nâng eroh ngatwah), Areko Kren wah Jews heh ngale Alexandra wah heh dângwah. Thin demko Kilikia ngale Asia diakwah Jews ahan hehmin johroam lahma Stifen demnâng chhiakmîn wah.

¹⁰ Rohkomin Stifen nâng Juma chohsû lahma atema ngin heh chhemlala hôngjabwah, phumma ere Jews heh ate demnâng tachhiakmîn tuho.

¹¹ Ephumma thinma mihnyan khuthe nâng aroh jab en ngama huhngatwah, “Atema Mosa le Joban lelatnâng jablahma nima tattih!”

¹² Eroh mothô thôwak lahma thinma mihnyan heh phangtang, erediko khhepho phannang heh, ngale Niemarang hethôte heh Stifen lelatnâng chepsietwah. Ephumma thinma Stifen lolahma ngoang awang heh tânâng siethokwah.

¹³ Thinma Stifen lelatnâng mothô thôrãng min mihnyan khuthe siethokwah. Thinma ngatwah, “Are mihnyan pumma roantang nãng Rangsoamhum Asâthôan lelatnâng jabeka.

¹⁴ Nazarat wah Jisu ma are Rangsoamhum pa erunsiet a, ngale Mosa ma hethôthi niemarang hehmin elitsiet a, ngama atema jablahma tattih!”

¹⁵ Ngoang awang heh chhangwah tôngte chentôma thinmitpa Stifen nâng sokwênwah, ngale thinma Stifen thhenphãng pa rangkhethung wah Joban ngintatte heh thhenphãng rãngrãng khewênwah.