MOATLEM 28 - NIEMNYAN Naga NT (BSI)

Malta Hahnâng

¹ Chenthu ni sâran nâng senthemthem pehok diko, nima jotungwah hahpa Malta hah ngama jetwah.

² Ere hahwah mihnyan heh nidemnâng nyahrãng asen dângwah. Phumma rangpat hongpat lahma rangchhông dângwah, erohwah thinma wenthhek lahma ninâng wenko tôngrãng roowah.

³ Phumma Pol ma chan roapthe khôantoan lahma wenko thhek thuko akham junko chan kowah pû hongloat lahma Pol dekko depwah.

⁴ Ere hahwah mihnyan hehma Pol dekwah dep eka pûpa khelahma jabmînwah, “Are mihnyan pa mih ritphete dângmin dede, atea jowahjô mepe akomin, khengraang pumma atea lehinthuk tumin.”

⁵ Rohkomin pû pumma atenâng lekek thangma Pol ma wenko jâhekwah.

⁶ Thinma Pol nâng aphîn ba lemlienma hahko loangrii lahma eriia ngama thônghun wah. Rohkomin ajahthem sanpoatsok dikomin Pol nâng chenjô ledang khe phumma thinma ngakthônghun lahma ngatwah, “Atea Joban!”

⁷ Erethe kowah chentô letaangko erehah kowah adongthôan Publius pit dângwah. Atema ninâng nyahrãng khuhah nâhah tãngroo lahma ate humnâng jârem tôngthienwah.

⁸ Publius wa pa khun ngale heichhoan ma ate jupthinko dângwah. Pol ate jupthinko wãng lahma, ate khohko dekma sahlo lahma rangsoam kolahma mesietwah.

⁹ Chenthu erepa sen phumma, jotungwah hah wah ahan khunte chentôpa hûlahma mesiet wah.

¹⁰ Thinma ninâng hînhô jahmõang kohthi, ngale chenthu ni enângwah jogari ma chhoanrãng chepko, nima lemko chenlem ekia ereheh thinma jogari ko sekkohthi.

Malta Hahwah Rom nâng Hok

¹¹ Jengrem diko Alenxendra wah, “Joban wanii,” ngamemin eka jogari pumma ni chhang chhoanwah, erepa jotungwah hahko rangpa pa tôngkatwah.

¹² Ni Sirakas hahko hûlihma enâng jârem tôngthienwah.

¹³ Erethe kowah wienchhoan lihma Rigium hahko hokwah. Eredijâko dekhit wah pông hôngpông hokwah, ngale jânii khenko ni Putioli hahko hokwah.

¹⁴ Enâng nima putedâlemte mihnyan roanche chohmin lihma thin demnâng haptathe johtôngrãng rosepthi. Eroh relihma ni Rom nâng hokwah.

¹⁵ Rom wah putedâlemte hehma ni ngin tatlahma Apius hahwah phin athã sengthe ngale Hum Dângrem ngaeka hah tôko kalahma nidemnâng chomîn katwah. Chenthu Pol ma thin khe phumma, atema Joban nâng dangkoh a ngatwah ngale nyahrãng hungdôngwah.

Rom nâng

¹⁶ Chenthu ni Rom nâng hokphumma, sipâhi hehma bem lahma Pol atelolo songthukwah.

¹⁷ Jârem diko Pol ma enângwah Jews khhepho phannang heh ngoangthun rãng roowah. Chenthu thin khôanhok phumma, Pol ma thinnâng ngatwah, “Ngalemru Isrial heh, ngama nãng mihnyan hehrãngmin chenjô lechhihmo ngale nãngte nãngwa heh niemarang min lechhihsiet nâng, Nga Jeroselem phâtek nâng khhek lahma Roman mihnyan heh deknâng koh ehang.

¹⁸ Nganâng nginthôngpha diko, Roman hehma nga thinphe hunwah, chenrãngma ngako thinma nga lanrit pheroh chenmin chhihmo lekma chohkhe mahthang.

¹⁹ Rohkomin chenthu erepa Jews hehma dan phumma, Ngama Chofa nâng roatsep wah, rohkomin arepa ngama nãng mihnyan heh lelatnâng chhihngatrãng dangmah.

²⁰ Erohwah Ngama nang demnâng chohmîn lekma jabmîn hunwah. Rohkomin linlinko, nga are janruko khhekrii ekangpa Isrial hehma putedâlem eka mihnyan rãng khhekrii ekang.”

²¹ Thinma Pol nâng ngatwah, “Nima Judia wah nangrãngma chenni sitijô chohmih, ngale enângwah ni mihnyan kawak era hehmemin chenni nginjô thôkat mahra, ngale nangnângmin chenjô chhihthô mahho.

²² Rohkomin nangma chenthônghun eko erepa nima chohtat huneki, chenrãngma ngako nima ajet chentô thenâng mihnyan hehma are nang johrôam eko heh lelatnâng chhhihjab eka.”

²³ Ephumma thinma Pol demnâng rangwo kahtok hôanwah, ngale ere rangwo jâko Pol tongeka theko jahmõang mihnyan hokwah. Rangkhah khowah rangnyek kotuk Pol ma thinnâng Joban Hahsông nginkongpa thôkoh wah, ngale atema Mosa Niemarang ngale Mõng hehma raangwah Joban ngin hehwah thakthô lahma mihnyan hehnâng Jisu junma thôkoh wah.

²⁴ Khaka ma ate nginpa putedâlem wah, rohkomin khaka hehma putedâlem ho.

²⁵ Ephumma thindede tungko nginthun lejut thangma dângwah, phumma thin phanchhoan mako, Pol ma thinnâng are jabkhab khabthepa ngatwah: “Asâthôanju junma Mõng Isaia ma nete newa hehnâng chentôsên ngatwah a!

²⁶ Atema aroh ngatwah, ‘Chhoan lohma are mihnyan hehnâng thôkoh: Nema atatpa etat en, rohkomin lejet tatmin; Nema asokpa esuen, rohkomin lekhemin,

²⁷ chenrãngma ngako are mihnyan heh hungpa bajâ tah, ngale thinnâpa hap rewak eka ngale thinmitpa thup rewak eka. Eroh ledang ngako, thinmitma khemin wah, ngale thinnâ memin tatmin wah, ngale thinhung memin chenjettah, ngale thin a ngatânâng ngakhû lahma, Joban ma ngaeka, ngama sênsiet minwah.’ ”

²⁸ Ngale pol ma jekthôwah: “Nema arepa jet en, Joban ngewah khope nginpa Jews ledangte hehnâng matchhoan eka. Thinma ejetat a!”

³⁰ Pânii rãng Pol ma thãkoh lahma erethe kowah hum wanthenâng sôngwah, ngale ere humko ate demnâng chohmîn hokte anga nganâng nyahrãng khuhah nâhah tângroo wah.

³¹ Atema Joban Hahsông ngin ngale Teso Jisu Krista nginpa, lechei thangma ngale lesoang thangma phoang hethô wah.