MOATLEM 27 - NIEMNYAN Naga NT (BSI)

Jogarii ma Pol Rom nâng Chhangkat

¹ Chenthu nia Jogarii ma Itali nâng katrãng ngatko, thinma Pol ngale ahan phâtek nâng tôngte heh Julius, “Chofa Regimen” ngamemin eka Roman regimen sahhab nâng kohwah.

² Nia Adramitiem wah jogari ko chhangwah, erepa Asia diakwah jogari chepthin thenâng katrãng cheplahma dângwah, ngale erepumma ni chhoanwah. Thisalonika wah Mesidonia mihnyan Aristakus, pa nidemko dângwah.

³ Eredijâko nia Sidon hahnâng hokwah. Julius pa Pol demnâng asen dângwah ngale ate lemru heh demnâng Pol chohmînchhoan thukwah, ngale atema chenni lemeka erehehmin chohkoh thukwah.

⁴ Nia Sidon hahwah loatchhoan wah, ngale pôngpa ni ngenâng metwah, pông lemetthe jotungwah Sipras hah ngenâng katwah.

⁵ Nima Kilikia ngale Pamfalia wah josi heh danlihma Likia wah Mira hahnâng katwah.

⁶ Eko sipâhi sahhab pumma Alexendra wah Itali nâng katte jogari chohwah, ephumma atema ni ereko chhangthukwah.

⁷ Jogari pumma rere chhama melâng rangwo chhoan lihma Nidas hahnâng hokwah. Phumma nia ere ngenâng pôngma wãngthuk tuho, ephumma Salomi hah danlihma, pông lepongthe jotungwah Kret hah ngenâng katwah.

⁸ Nima jokông kôngma nyahrãng chêmlihma jogari pechep thinthe ngama ngaeka theko hokwah, erethepa Lasia hahwah chentô letaangko dângwah.

⁹ Eretheko nia rangwolo tôngthienwah, ephumma nia jogari ma chhangchhoan pa nyahrãng acheili dângtuwah, ngale ere sanpoat pa Jews hehma lejok phhekchhah thangma rangsoam sanpoat pa lienchoan dângwah. Ephumma Pol ma thinnâng aroh thôkoh wah:

¹⁰ “Mihnyan heh, ngama nãng arethe kowah loatchhoan pa nyahrãng acheili khekãng; Jogarii ngale sêmmak hehmin ajahthem eta chhihjâa, ngale nãngmin eta mahriie.”

¹¹ Rohkomin sipâhi sahhab pumma jogari kepten ngale tângte nii ngin keplahma, atema Pol nginlekep dângwah.

¹² Erethepa rangpa ko jogari cheprãng lesen dângwah; erohwah chentôma jogari pa ere thekowah loatchhoan lahma Fonik hahnâng hokkat hunwah, meta dangako, rangpa pa enâng tônghun wah. Fonix pa Kret diaknâng jogari chepthinthe, erethepa dekhit wah sannyup ngale dekchah wah sannyup nângmin ama tuta ngiak lahma dângwah.

Josi Mongnâng Pôngdong Patdong

¹³ Dekhit wah pông bângwut hokwah, ngale mihnyan hehma nãngma huntih pa eta danga ngama thônghun wah, ephumma thinma jogari chepbenthin janphak pa putphe waklahma Kret hah kekema repkatwah.

¹⁴ Phumma lemlienma pôngchaan mõang - “Dekchah ngewah pông” - ngama ngaeka pa jotungwah hah kowah pônghokwah.

¹⁵ Erepông pumma jogari ko metwah, ngale jogari pa pôngthunko amanâng leta wãngtu dâng phumma, lechêm thatreptu thangma pôngma chennâng metchhoan eka eroh metchhoan thukwah.

¹⁶ Nima jotungwah Kauda hah arinchha pa danlihma pông lemetthe roanche chohwah. Eretheko, nima jogari kowah khôankho pa, chaanma mampesiet wah.

¹⁷ Thinma jo khôankho pa jogari ko sekwên lahma ruma jogari ko kitkit khhekwah. Thinma jogari pumma Lidia jowah senâng matunglih o ngama cheiwakwah, ephumma jogari kowah pông pûnwutthin pa numsiet lahma pôngma chenroh metchhoan eka eroh metchhoan thukwah.

¹⁸ Pôngpa lejek thangma nyahrãng cheili pôngwah, ephumma khedi jâko thinma Jogari kowah sêmmak khaka toanphewah,

¹⁹ ngale eredijâ komin thinma jogari sêmmak heh wahmin khaka patphewah.

²⁰ Melâng rangwo nima sanmin, ngale meritmin chohkheho, ngale pông pemin lejek thangma nyahrãng chaanpôngwah. Nimin bâmpe tumih ngama thônghun wah.

²¹ Jogari kowah mihnyan heh lephhekchhah thangma melâng rangwo dângdiko, Pol thin mathahko toanchep lahma ngawah, “Mihnyan heh nema ngangin kepletma Kret wah leloatchhoan nomako; nãngma are sêmmak hehmin lemahphe minwah ngale lechhihmin wah.

²² Rohkomin ngama nenâng rosep eka, hung nekchha en! nekhu henmin leriimin; jogari loloba echhihjâa.

²³ Thepen Ngama soam ekang ngale Nga aterãng hin ekang Joban ngintatte ngatânâng kalahma

²⁴ nganâng thôkoh ehang, ‘Nekchei, Pol! Nanga Chofa tâko metkep chepmin. Ngale Joban ma nangnâng mînchen lahma nangdemwah jogari kowah johchhangte hehmin epesiet a.’

²⁵ Mihnyan heh! erohwah hung nekchha en, Ngama Joban nâng putedâlem ekang, Nganâng chenroh thôkoh thanga erohjô edanga.

²⁶ Rohkomin nãnga jotungwah hahnâng emethûhi.”

²⁷ Echhi pen beliijâ rangpen ko, nia pôngdong pumma Mediteranien josiko ditmetwah. Phumma rangpen mongko jogari repte pumma jokah lâhû themtih ngama thônghun wah.

²⁸ Ephumma thinma runâng athakthin khhek lahma joko chentôlu dangeka pa jetrãng chaamphe katwah. Phumma jopa roak belii mitatlu dângwah; Chuthe dikomin thatthak tahpa roakrem mitatlu dângwah.

²⁹ Thin a jogari pumma longnâng matunglih o ngama chei wah, ephumma jogari tokdi nge pumma janphak wanbelii joko chaamphe katwah ngale rangwo rãng rangsoam wah.

³⁰ Erediko arepte heh jogari kowah huhchhoanrãng phungwah; thinma jogari kowah khôankho pa joko jâsiet katlahma jogari khema ngema janphak heh chaamphekat e ngama diapdâng wah.

³¹ Phumma Pol ma sipâhi sahhab ngale sipâhi hehnâng ngatwah, “Arapte heh jogari ko letong kako, ne leta pemin.”

³² Ephumma sipâhi hehma khôankhoko thiet eka ruheh patdoak lahma khôankho pa chhoanthuk wah.

³³ Rangwo nemnemko Pol ma thinkhu anga nganâng chenni komin phhekchhah en ngama roatsep wah: “Thejâ tôko nema echhi jâbelii rangwo lâbemtet, eretô rangwo ko nema chenmin lephhekchhah ma lâdangtet.

³⁴ Erohwah, ngama, nenâng tâhînrãng; chenkomin phhekchhah en ngama rosep eka. Newah khochoo lathemin lemahmin.”

³⁵ Pol ma aroh ngatdiko, atema bankên roanche toanlahma, thin anga nga mathahko Joban nâng dangkoh a ngat rangsoam soam lahma, atema chhupsiet, lahma phhekwah.

³⁶ Thinhung dôngwah, ngale thinkhu anga ngama phhekchhah roanru chhahwah.

³⁷ Nia jogari ko phangtang tungko 276 rãng chhang lihma dângwah.

³⁸ Anga ngama phoatphoat phhekchhah diko, thinma jogari pa chenchãa ngama chhah heh phangtang joko phekatwah.

Jogarii pa Chhihjâ

³⁹ Rangwo komin arepte hehma jopha pa jetloho, rohkomin thinma jotungnâng chihthienwah jopha lepkhewah, phumma meta dangako, thinma jogari pa eretheko chepthukrãng thônghun wah.

⁴⁰ Ephumma thinma ruheh patdoak lahma janphak heh joko thumjâkat thukwah, ere demdemko jogari pûnchhoan thukrãng ama ngeko khhek ekaru hehmin jânwah. Erediko pôngma jogari pa ama ngenâng chenmetwên a ngama pông pûnmetthin pa ama ngeko laanglihma, jophanâng repwênwah.

⁴¹ Rohkomin jogari pumma sekhohnâng tunglahma mânritwah; phumma ama ngepa chhihjâ lahma lejien phongtu dângwah, ngale khedi nge pemin jowaak chaan pumma chhupchhup chhachha lândangroh chhihsiet wah.

⁴² Phumma akhhekte heh sârannâng danju lahma môang huhchhoan a ngama sipâhi hehma phangtang ritphe rãng thônghun wah.

⁴³ Rohkomin Sipâhi sahhab pumma Pol pepâng hunwah, erohwah atema leritphe thuk wah. Enoma henhen jojûjet a ereheh jogari kowah jâtoakka letma sârannâng bengdãn juwãngen ngama chienwah;

⁴⁴ khaka hehma bãngkha hehnânglo, erediko jogari wah chhupjâeka hehnâng lolahma jûnjû wângwah. Ngale eroh relihma nikhu anga nga sârannâng pehokwah.