MOATLEM 21 - NIEMNYAN Naga NT (BSI)

Pol Jeroselem nâng Kat

¹ Nima thinnâng chhoan ekijô ngama rânjabthien lihma chhoanwah. Nima jogari pumma jo tintin danlihma Kos hahnâng hokwah; Ngale eredijâko Rodes hahnâng hokwah, ngale erehah kowah Patara hahnâng katwah.

² Eretheko nima Fonikia nâng katte jogari chohwah, ephumma eko chhangka lihma chhoanwah.

³ Sipras hah khekat theko hûlihma, erethe kowah dekchah ngenâng chhangka lihma Siria hah ngenâng katwah. Ngale nia Tair jopha ko jâkka lihma, jogari pumma sêmmak heh jâlakwah.

⁴ Enâng nima putedâlemte heh khuthe chohmîn lihma thin demnâng haptathe johtông thienwah. Juchaan junma thinma Pol nâng Jeroselem nâng nekka ngama thôkoh wah.

⁵ Phumma thin demnâng niroamtông sanpoat pa thôan phumma thintâwah ni loatchhoan wah. Thinkhu phangtang ngale thin tangnyu heh erediko thinchha hehmin roamlahma thinhah kowah nidemnâng jopha tôko johkat wah, phumma eretheko nikhu phangtang dakuhtho lihma rangsoam wah.

⁶ Erediko nima phan ejô ngama rânjabmîn lihma phânwah, ngale nia jogari ko chhangkatwah ngale thinmin humnâng ngakwâng wah.

⁷ Ni Tair hahwah chhoan lihma Polimais hahnâng chhangkat wah, phumma erehah wah putedâlemte heh demnâng rânjabmîn lihma thin demnâng jâthe johtông thienwah.

⁸ Eredijâko Polimais hahwah chhoan lihma Kasaria hahnâng hokwah. Phumma nia erehah kowah Ivengelist Filip humko tôngwah, Filip pa Jeroselem nâng chohsokte rãng waengit mihnyan rentah kowah wathe dângwah.

⁹ Ate chha janchhô wabelii dela nâng lewãng thangma Joban ngin phoangthô lahma dângwah.

¹⁰ Thin demnâng ni melâng rangwo johtôngwah, phumma erepoatko Judia wah mõng ate mînpa Agabus hokwah.

¹¹ Erepa nitânâng hûlahma atema Pol roamdit pa toanlahma roamdit pumma atedede dek ada heh khhekritwah, ngale atema ngatwah, “Asâthôanju ma aroh ngaeka: Are roamdit tângte pa Jews hehma Jeroselem nâng aroh khhekmin, ngale thinma Jews ledangte heh deknâng ekoh a.”

¹² Nima are nginpa tatphumma, ni ngale enângwah ahan hehmemin Pol nâng Jeroselem nâng nekka ngama roatsep wah.

¹³ Rohkomin atema dânthâng wah, “Ne chenrãngma sep eken a, nema aroh sepletma ngahung chhâsiet hun eken a? Nga Jeroselem nâng khhekrit rãngmin cheimek, ngale Teso Jisu rãngma enãng ritmin tarii ang.”

¹⁴ Nima ate leta jektang phumma, letangtu thangma, “Teso hung junko chendanga” ngama ngatwah.

¹⁵ Enâng poatthe tôngthien diko, nima sêmmak heh khoakhem lihma Jeroselem nâng wângwah.

¹⁶ Phumma Kasaria wah dijunte khuthe nidemnâng johwãng lahma ni johtôngrãng wãngeki mihwa humko sietwênwah - ere mihwa pa Sipras hahwah ate mînpa Manson dângwah, atea khema thuma putedâlemte dângwah.

Pol Jems tânâng Chohmînhok

¹⁷ Chenthu ni Jeroselem nâng hokphumma, enângwah putedâlemte hehma khuhah nâhah tângroo wah.

¹⁸ Eredijâko Pol nidemnâng Jems chohmînrãng katwah; ngale eko chentô Asâthem khhepho phannang heh dângwah.

¹⁹ Pol ma thinnâng rânjab lahma Joban ma ate moatlem junma Jews ledangte hehnâng chenni motah a ereheh phangtang thôkoh wah.

²⁰ Thinma Pol ngin chohtat diko, chentôma Joban nâng rôwah. Erediko thinma ngatwah, “Pol, nangma akhe chentô hahjat Jews hehma Joban nâng putedâlem eka, ngale thinma Mosa Niemarang hehmin nyahrãng kepeka.

²¹ Jews ledangte heh diaknâng sôngte Jews hehnâng nangma Mosa Niemarang heh phe en, ngale thin chhuchha hehnâng khoenkhen niem nekhôantu en, ngale Jews niemarang heh nekkeptu en ngama phoang hethôeko ngama thinnâng thôwak koheka.

²² Thinma nanga Jeroselem nâng hûtha ngama metkep tatmin. Phumma nima chenni remin a?

²³ Nangma aroh moat pa asen edanga ngama thonghun eki. Ako wabelii mihnyan toamsem lahma tonga.

²⁴ Thin demnâng seksâsiet thinnâng johka lohma thin niemhôan thãpa nangma thumkoh; erediko ba thinma kho eta lokchhun a. Eroh koba thinnâng nangjun ma chentô nginchhih thôkotah heh wanthemin linlin dangmah, ngale nanga Mosa Niemarang junko jôba song eko ngama thinma ejet a.

²⁵ Phumma Jews ledangte wah putedâlemte rãng dangeka hehnâng nima moangachaang nâng kohwah phhekchhah heh nekphhek chhah en, hei nekphhek en, erediko bohkorep lahma ritphewah ngem nekphhek en ngale dihiak dela kaamchhih nekmo en ngama nginpat hôan lihma sitiraang lihma matkattih.”

²⁶ Ephumma Pol ma mihnyan heh sietlahma eredijâko seksâsiet niem pa thin demnâng hôanwah. Ngale erediko Rangsoamhum nâng wãng lahma chenthu seksâsiet niemhôan pienpa râeka, eko thin chentôma soam aroakthin kephokmin ngama thôkoh wah.

Pol Rangsoamhum wah Loatkhhek

²⁷ Phumma jâengit jâpa thôanrãng ngatko, Asia diakwah Jews hehma Rangsoamhum nâng Pol lepkhewah. Phumma thinma mihnyan heh phangtang chepsiet lahma Pol loatkhhekwah.

²⁸ Thinma rakwah, “Isrial heh!” “Chohsûhi! Are mihnyan pumma chentô thenâng chhoan lahma Isrial mihnyan heh lelatnâng, ngale Mosa Niemarang erediko Rangsoamhum lelatnâng phoangthô eka. Ngale athângheh atema Jews ledangte heh Rangsoamhum kêko siethû lahma arethesâ pa ngeksiet eka!”

²⁹ (Thinma are ngaeka pa Ifisus wah Trofimus pa Pol demnâng Jeroselem nâng khewah, ngale atemin Pol ma Rangsoamhum nâng lâsietwên thêmtah ngama thônghun wah.)

³⁰ Jeroselem wah mihnyan heh phangtang chepwah, ngale mihnyan heh aroamma chhoanka lahma, Pol loka lahma, Rangsoamhum kowah sietphewah. Erediko lemlienma Rangsoamhum kâsekpa tangsek rewah.

³¹ Erekowah mihnyan hehma Pol ritphe rãng hunwah, rohkomin Jeroselem phangtang nâng hahjam eka ngama Roman sipâhi adong nâng ngin chohmat hokwah.

³² Lemlienma sipâhi sahhabdong pumma ate lemru sahhab khuthe ngale sipâhi sietlahma mihnyan heh tânâng katwah. Chenthu mihnyan hehma sahhabdong pa ate sipâhi demnâng khe phumma Pol nâng watpa jekwah.

³³ Sipâhi sahhabdong pa Pol tânâng kalahma Pol loatkhhekwah, ngale janru runiima khhek en ngama chienwah. Erediko atema, “Arepa hen a, ngale atema chenre tah a?” ngama chhienwah.

³⁴ Mihnyan hehma khaka pumma lithe ngale ahan hehma lihân hôngrakwah. Phumma sipâhi sahhab pummemin chenni dangeka erepa senthemthem jienjet loho, ephumma ate sipâhi hehnâng Pol sipâhi heh tôngthin nâng sietwên en ngama chienwah.

³⁵ Pol demko thin hihthodâng tôko johkatwah, phumma mihnyan heh nyahrãng cheili rinkhah junko sipâhi hehma Pol ape rewah.

³⁶ Mihnyan heh phangtang Pol diko junka lahma, “Aritphe rêmin!” ngama rakwah.

Pol ma Nok atang hehnâng Nginthôkoh

³⁷ Sipâhi hehma thin tôngthin nâng Pol sietkat rãng ngatko, Pol ma sahhabdong ko ngatwah: “Ngama nangnâng chenkomin tathôkoh ea?” Sahhab pumma “Nangma Griik jab jienjab ole?” ngama chhienwah.

³⁸ “Eroh medang oko nanga khema wah wathe Igip mihnyan ma hahjat belii mihnyan wentho demnâng sehahkho nâng mihngoanrãng sietchhoante pa nang dangoni?” ngama chhienwah.

³⁹ Pol ma dânthâng wah, “Nga Jews jat, Kilika wah Tarsus hahnâng chhatwah, ngale alemthôan hahdaangko sôngte. Nga mihnyan heh demnâng mamjabmîn thukhang.”

⁴⁰ Phumma sahhabdong pumma jabmîn thukwah, ephumma Pol hihtho khoko cheplahma mihnyan hehnâng kihchepchep tongmêngen ngama dekma thak amak katwah. Chenthu mihnyan heh kihtông phumma Pol ma thinnâng Hibru jabma thôkoh wah: