MOATLEM 20 - NIEMNYAN Naga NT (BSI)

Mesidonia ngale Akaia nâng

¹ Hahjâm jekdiko, Pol ma putedâlemte heh aroamma khôanroo lahma thinnâng hungdôngrãng rîn akhah thien lahma chhoan ekangjô ngama thôthien kohwah. Erediko ate chhoan lahma Mesidonia nâng katwah.

² Atema ere jaa phangtang nâng phoangkhoam lahma mihnyan hehnâng phoang rîn akhah thienwah. Erediko ate Akaia nâng katwah,

³ Ngale enâng jengrem tôngkatwah. Ate Siria nâng katrãng phûng poatko enângwah Jews heh ate lelatnâng chep eka ngama chohjetwah; ephumma atema Mesidonia ngema Siria nâng ngakwâng wah.

⁴ Biria wah Sopater chha Pirhus ate demnâng johwângwah; ngale Thisalonika wah Aristekas ngale Sikundus min johwângwah; erediko Dirbi wah Gaius min johwângwah; Tikikas ngale Trofimus nii Asia diakwah johwângwah; ngale Timothi min johwângwah.

⁵ Thin a khema nâng wãngla lahma Troas hahnâng ni bemlâwah.

⁶ Wichhi lesak pheban phhek lokuh diko ni Filipien wah jogari ma loatchhoan wah, ngale jâbangâ diko thin demnâng Troas nâng roamhokwah, enâng ni haptathe tôngthienwah.

Troas nâng Pol Athôan rãng Hokthien

⁷ Hunibat jâko rangjâ thahko ni phhekchhah roamchhahrãng khôanwah. Phumma Pol ma mihnyan hehnâng thôkoh wah ngale erepa rangpen mõng lândangroh thôkoh wah, chenrãngma ngako atea nènepko chhoante dângwah.

⁸ Rangkhohdâng kowah ni khôantongtih humko wentitmin jahmõang dôtoak lahma dângwah.

⁹ Paangmihpho wathe ate mînpa Itikus pa pôngkâ kâsek khoko tonglahma dângwah, phumma Pol ma nginthôkoh thuko Itikus nyahrãng jupmetrii lahma dângwah, phumma athôanko juplek lahma rangkhohdâng kowah dangrem pumma hahko jâkatwah. Chenthu thinma ate tôansiet katko atea riichoan tônglâwah.

¹⁰ Rohkomin Pol kalahma ate khohko kunjupka lahma atenâng khitkatwah, ngale atema mihheh nâng ngatwah, “Neksekmah en, atea ahînthu!”

¹¹ Erediko Pol rangkhohdâng ko ngakwãng lahma atema bankên pa chhupsiet lahma phênphhek wah. Thin demnâng ngin nyahrãng lekthômîn wah, rang lânworoh thômîn lahma, Pol loatchhoan wah.

¹² Thinma paangmihpho pa humnâng ahînma ngaksiet hokwah, ephumma thinhung ngaksênwah.

Troas Hahwah Militus Hahnâng

¹³ Ni jogari pumma Assos nâng katlâwah, ngale enângwah nima Pol jogari ma thehan nâng sietchhoan rãng ngatwah. Atea dakhôam lemma katrãng ngama nia jogari pumma katlâ thukwah.

¹⁴ Chenthu nidemnâng Assos nâng chohmîn phumma, nidemko jogari ko chhangthuk lihma Mitileni nâng sietkat wah.

¹⁵ Ni ereko chhang lihma eredijâko Kois hahnâng hokwah. Jâthe diko ni Samos hahnâng hokwah, ngale eredijâko Miletus hahnâng hokwah.

¹⁶ Phumma Pol ma Asia diaknâng lektôngthien lehuntû thangma Ifisus nângmin lejek tongthien thangma liangliang chhoanrãng thônghun wah. Atema metahû angko Pentikos rangwo mako Jeroselem nâng hokrãng thônghun wah.

Pol ma Ifisus wah Khhepho Phannang hehnâng Achhoan nemma Rânjab

¹⁷ Miletus wah Pol ma nginmatte Ifisus wah Asâthem khhepho phannang heh tânâng nga demnâng chenchohmîn wãnghang ngama chienkatwah.

¹⁸ Chenthu Ifisus wah khhepho phannang heh Pol tânâng hokphumma atema thinnâng ngatwah, “Nga Asia diakko benghok jâma nga sanpoat heh nedemnâng chenroh chhoanthuktek a erepa nemajet.

¹⁹ Jews hehma nga lelatnâng cheplahma nganâng chêmthukthang poatko nga a Teso haa rãngrãng danglekma chenroh mitphi honglekma numriitek a ereheh nemajet.

²⁰ Nemajet ngama nok atang heh chhangnâng ngale nekhu humhum nâng hûlekma phoangthô lekma hethôtah poatko nerãngma senli heh chenjô lethôkoh thangma huhriemho.

²¹ Jews le Jews ledangte hehnâng khoakthema nepap moatlem wah jekletma Joban tânâng ngakhûren ngale Teso Jisu nâng putedâlem en ngama thôkotah.

²² Adea ngama Asâthôanju ngin keplekma Jeroselem nâng kaekãng, phumma nganâng enâng chenni dângmin a erepemin jetmek.

²³ Asâthôanju ma chentô sumhah hehnâng phâtek ngale chêmchei ma Jeroselem nâng nang bemla lahma tonga ngama thôkohthang pa loloba jet ang.

²⁴ Rohkomin ngama ngadede roandông pa sekho ngama thonghun ekang; Joban mînchenchaan nginkongsen pa phoangthô rãng, Teso Jisu ma nganâng mothuk ehang moatlem pa râmoat loloba hun ekang.

²⁵ “Ngama Joban Hahsông Nginkongsen pa phoangthô lekma nekhu demnâng dângwah. Ngale ade phumma ngama jet ekang nekhu henmemin nga lechoh khetumin.

²⁶ Erohwah thejâ ngama nenâng sansanma loatthô koheka: nekhuwah kho lepete mehong enko, erepa ngamet dangmah.

²⁷ Chenrãngma ngako ngama Joban ngin ngale atema huneka heh nenâng phangtang thôkotah.

²⁸ Erohwah nedede min jetletma tongen, ngale Asâthôanju ma nenâng sûare thuk ehèn hehmin senthemthem sûare letma tongen. Saaksokte rãngrãng Joban nâng putedâlemte Asâthem heh sûare en, Atema ate chha hei junma aterãng hôanwak eka.

²⁹ Ngama ajet ngachhoan diko nekhu tânâng soanchhih ehûra, ngale thinma saak heh lekek thangma lebâmin.

³⁰ Nekhuchhang kowah mothôthô lahma putedâlemte heh thindemko lemchhih nâng sietchhoan sanpoat pa ehûra.

³¹ Erohwah jetletma dangen, ngale ngama nekhu anga nganâng pârem rãng chenni thôkotah a ereheh rangwo rangnyek, mitphi hongletma thonghun letma tongen.

³² “Ngale ngama ade phumma nekhua Joban deknâng, ate mînchenchaan nginkong junko chendangen ngama lâkohtah, Ere pumma nekhu eta rongsiet hèn ngale Joban ma ate mihnyan hehrãng thienkotah rangpa ekepen.

³³ Ngama henwahmin ngun akem ngale khet akhu hunmah.

³⁴ Nekhu dedema ajet nga ngale nga lemru hehma chenni lem ekia ereheh ngadede dekma molekma kepwah.

³⁵ Ngama nekhu nâng rongrup nâng aroh chaanriimo lihma aboan anaa hehnâng chohsokmin ngama khesoktah, Teso Jisu dedema jabtah jabkhab pa thonghuntan en, ‘Mihnâng chohkoh pa mihwah chohthâ reki nomemin ajahthem khuhahli.’”

³⁶ Chenthu Pol ma thôkoh diko thin demnâng dakuhtho lahma rangsoam wah.

³⁷ Thinma phangtang Pol nâng khit lahma sepwah, ngale aphânmîn rãng atenâng chupjok wah.

³⁸ Atema thinnâng nga nekhuma chenthumin chohkhetu mahha ngama ngatphumma ajahthem hungchhih wah. Ngale erediko thinma Pol jogari tôko johsênkatwah.