MOATLEM 19 - NIEMNYAN Naga NT (BSI)

Pol Ifisus Hahnâng

¹ Apolo Korint nâng dângthuko, Pol ma Ifisus nâng katlem wah chentô hahdaang hehnâng khoamthien lahma Ifisus nâng hokwah. Enângmin atema dijunte khuthe hôngsiet thienwah

² ngale thinnâng chhienwah, “Ne putedâlemte dângdiko Asâthôanju mechoh enle?” Thinma, “Nima Asâthôan Jupa atatjô mathat chohtat eki,” ngama dânthâng wah.

³ “Eroh medang enko chenrãngrãng baptijem kaptet a?.” Ngama Pol ma thôngphâ wah. Thinma, “Jon ma koheka baptijem pa kepwah,” ngama dânthâng wah.

⁴ Pol ma thinnâng ngatwah, “Jon baptijem pa papi mihnyan heh thinpap moatlem wah hung lângaklittih ngama khesokrãng kep eka; ngale atema Isrial mihnyan hehnâng ngadi kowah kaerako putedâlem en ngama thôkoh wah - erepa Jisu nâng putedâlem en ngama thôkoh eka.”

⁵ Chenthu thinma erengin pa tatphumma Teso Jisu mînko baptijem kepwah.

⁶ Pol ma thinkhoko ate dekma sahloatkoh phumma thin khohnâng Asâthôanju katwah; erediko thinma ajatjat jabma jienjab wah ngale Joban nginkongpa phoangthô wah.

⁷ Thin phangtang tungko echhi wanii dângwah.

⁸ Pol ma Sanagog nâng hûlahma mihnyan heh demnâng jengrem lechei thangma thômîn wah, ngale thin demnâng thômînko atema Joban Hahsông ngin thôkoh eka hehnâng putedâlem en ngama ngatwah.

⁹ Rohkomin khuka heh hung pa longrãngrãng chehjâ lahma leputedâlem wah, ngale mihnyan heh phangtang mako thinma Teso nâng putedâlem junma nginchhih hehmin jabwah. Ephumma Pol ma putedâlemte heh ate demko sietlahma thin tâwah chhoanwah, ngale jâroakweih Tarannas ngama ngaeka nyapweih thin humko ate thin demnâng thômîn wah.

¹⁰ Pol ma aroh pânii moatwah, ephumma Asia diakwah sôngte chentô Jews ngale Jews ledangte hehma phangtang Teso jabkhab chohtat wah.

Skeva Chha heh

¹¹ Pol junma Joban ma lethat kheli patritli moatlem heh moatwah.

¹² Pol ma ranglemti hutphethin khetchhup pemin khunte heh tânâng mekep hûkoh ako thin khoanchet heh asen rewah, ngale thinwah juchhih hehmin chhoanwah.

¹³ Juchhih junlo lahma phoangkhoamte Jews hehmemin Teso Jisu mîn keplahma juchhih heh thatphoang junloatwah. Thinma juchhih nâng ngatwah, “Ngama Pol ma thôeka Jisu mînko chhoan o ngama chien eki.”

¹⁴ Arepa Jews heh Soam aroakte adongthôan chha chhepho waengit ma moatwah.

¹⁵ Rohkomin juchhih pumma thinnâng ngatwah, “Ngama Jisu jet ang, ngale Pol min jet ang; phumma nea hen a?”

¹⁶ Juchhih luptah mihnyan pumma thinkhohko toakka lahma thinnâng nyahrãng buhawat lahma jienwatwah. Ngale ate humkowah buh awatmãn demnâng huhchhoanwah, erediko khet akhu heh chiensietrii lahma huhchhoanwah.

¹⁷ Are nginpa Ifisus wah sôngte chentô Jews le Jews ledangte phangtangma chohtatwah; ngale thin phangtang chei lahma Teso Jisu mînpa ajah dôngthukwah.

¹⁸ Ajahthem Putedâlemte hehma nok atang heh mako thinma chenni chhihmo tah a ereheh loatthô ngale khesok rewah.

¹⁹ Ngale ajahthem jâdu hôante hehma thin titab heh aroamma kephû lahma nok atang heh mako wennâng rokthhekwah. Thinma titab heh thãpa thatroakweih tahpa hahjat roak bangâ nguntha dângwah.

²⁰ Teso jabkhab pa eroh chaan demnâng jêngjah jahchhoan ngale jêngdong dongwãng rewah.

Ifisus nâng Hahjâm

²¹ Are ngin heh eroh dângdiko, Pol ma thonghun lahma Mesidonia le Akaia heh danlahma Jeroselem nâng katwah. Ngale atema ngatwah, “Nga enâng katdiko, Rom nângmin katmin.”

²² Ephumma atenâng chohsokte Timothi ngale Irastas nii Mesidonia nâng chienkatwah, ngale ate ajahpa Asia diaknâng tôngwah.

²³ Ere sanpoatko Teso nâng soamtô junko Ifisus nâng nyahrãng chêmlahma dângwah.

²⁴ Jan tupte atemin pa Dimitris ngama wathe dângwah, phumma atema janwah Artimis joban rangsoamhum rãngrãng hôanwah, ngale ere hôaneka kowah atema ngun nyahrãng chohbîwah.

²⁵ Ephumma atema phangtang khôanroo wah ngale thinrãngrãng hôante ahan hehmin khôanroo lahma thinnâng ngatwah, “Mihnyan heh nemajet nãngma arekowah chohbi chhahki.

²⁶ Phumma athângheh nedede memin lâkhetet ngale lâtattet are Pol pumma chenni moeka erepa. Atema ngaeka dekma hôaneka joban pa joban dangmah, ngale atema anâng Ifisus wahmin ngale Asaia diak phangtang wah mihnyan heh ajahthem hunglâlit thuktah.

²⁷ Are nãngma ngunbî moatlem moeki pemin chhihjâ lâthangtah, ngale erepa lolo ledang Artimis joban rangsoamhum ngale Artimis joban nâng lesoamtu emahjâa, are joban ko Asia diaktang ngale hahtokkhoh wah phangtangma soamtô eka!”

²⁸ Mihnyan hehma are nginpa tatlahma nyahrãng rinkhah lahma, “Ifisus wah joban Artimis pa jôba adong!” ngama rakwakwah.

²⁹ Erepa hahdaang phangtang nâng phoangjamwah. Thinma Mesidonia wah mihnyan wanii Pol demnâng johkhôamte Gais le Aristekas nii lolahma thin demnâng ngoangthun thinnâng sietwênwah.

³⁰ Pol ate dedema mihnyan hehmako wângrãng hunwah, rohkomin Joban nâng putedâlemte hehma wãngthukho.

³¹ Ngale erediak kowah khhepho Pol lemruchha hehma ngoangthun thinnâng nekloat khoamhûro ngama ngin matkatwah.

³² Ngale ngoangthun poatko nyahrãng jamjâ lahma dângwah: Khuthema lithejab, ngale khuthema lihân hongjab rewah, chenrãngma ngako, ajahthem mihnyan hehma chenrãngma khôanhûkia pemin lejet dângwah.

³³ Khakama Alexendra ma chenjet a ngama ate khohnâng phewah, ngale Jews hehma nok atang heh mako chepwâng thukwah. Phumma Alexendra ma thinnâng kihchepchep tongen ngama dekma hakkatwah, ngale atema mihnyan hehnâng nginsenma thôkoh wah.

³⁴ Phumma chenthu mihnyan hehma atea Jews jat ngama jetphumma mihnyan hehma, “Ifisus wah Joban Artimis pa jôba adong!” ngama koantanii rãng rakwah.

³⁵ Athôanko hahdaang kowah nyap khôanraangte pumma mihnyan heh kihtông thukwah. Atema ngatwah, “Nga lemru Ifisien wah mihnyan heh!” “Anga ngama jet Ifisus wah mihnyan hehma adongthôan Artimis rangsoamhum pa sûareki ngale rangwah jâkatha longpa khoakhem eki.

³⁶ Henmemin areko dangmah tangamah. Erohwah kihmêngen ngale ledangli heh nekmo en.

³⁷ Thinma nãng rangsoamhum kowah min chenjô huhmah, ngale nãng joban nângmin achhih mangaeka, eroh akomin nema are mihnyan heh anâng siethû eren.

³⁸ Dimitris le ate moatlem moatte hehma hennâng komin chenni ngatthin metong akomin, nãng thôte jabte hehmin tonga, ngale jengreko ereheh taphen thômin e; are sanpoatko thinnâng tasekham e.

³⁹ Rohkomin ere nomemin nema ajahthem ngatthin metong hènko, erepa jengrewah nok atang heh ngoangthun sanpoatko phenthômin e.

⁴⁰ Phumma thejâwah junko medang ako, hahpa nãngma jamsiet eki ngama nãngnâng sekhamthin môangtonga. Are hahjam eka hehrãngma map lekohmin, ngale nimemin senthemthem lejien phensietmin.”

⁴¹ Atema aroh ngalahma ngoangthun pa jeksietwah.