MOATLEM 17 - NIEMNYAN Naga NT (BSI)

Thesalonika nâng

¹ Pol le Silas nii Amfipolis ngale Apolonia heh dankhoam lahma Thesalonika wah Sanagog nâng katwah.

² Jâhan wah rãngrãng Pol Sanagog nâng katwah. Ere hahko Pientông rangwo jârem johtongthien lahma mihnyan heh demnâng Joban ngin heh thômîn thienwah,

³ ngale thinnâng Joban nyapraang wah thôkolahma Misaia ma chêmchohmin ngale ritwah ngakhînmin ngama khesokwah. Pol ma ngatwah, “Are ngama nenâng thôkoh eka Jisu pa,” “Misaia.”

⁴ Thin khuwah khaka hehma putedâlem lahma Pol le Silas nii demnâng johdângwah; Erohjô hahdaang niemarang junko adongjat dihiak hehwah ngale Joban nâng soam atôte Griik hehwahmin jahmõang johdângwah.

⁵ Rohkomin Jews hehma mitchek lahma lemjêng jêngwah mihnyan chhih heh khôansiet lahma thin lelatnâng dângwah. Thinma hahdaang phangtang phoangjamsiet lahma Jason hum lônghokwah, ngale Pol le Silas nii lo lahma nok atang tânâng siethok rãng hunwah.

⁶ Phumma thinma Pol le Silas nii lechoh dâng phumma Jason ngale ahan putedâlemte heh lolahma hahdaang wah thôte jabte heh tânâng siethû lahma rakwah, “Are mihnyan hehma chentô thenâng phoangjamsiet eka! Athângheh nãng hahnâng hûwak era,

⁷ phumma Jason ma ate humnâng thienwak eka. Thinma Lowang ahan tonga, atemin pa Jisu, ngama phoangthô lahma chentô Chofa niemarang heh chhihsiet eka.”

⁸ Aroh thôlahma thinma hahdaang wah mihnyan heh ngale thôte jabte heh chapsiet eka.

⁹ Thôte jabte hehma Jason ngale ate lemru hehwah ngun cheng lahma chhoanthuk wah.

Biria Hahnâng

¹⁰ Rangnyek rienrien putedâlemte hehma Pol le Silas nii Biria nâng chienkatwah. Chenthu thin Biria nâng hokphumma Sanagog nâng wângwah.

¹¹ Biria wah mihnyan heh Thesalonika wah mihnyan heh nomemin hungsen rinsen jat dângwah. Thinma Joban nginkongsen ko nyahrãng hung arin kohlahma jetatwah, ngale Pol ma chenni thôkkoh eka ereheh linlin dang ale dangmah a ngama jetrãng rangwo roakweih thinma Joban nyapraang heh weih lahma dângwah.

¹² Phumma ajahthem Jews mihnyan hehma putedâlem wah, ngale ajahthem Griik jatwah hahdaang niemarang junko adongjat dihiak, dela anga ngama putedâlem wah.

¹³ Phumma chenthu Thesalonika wah Jews hehma Pol ma Joban jabkhab pa Biria nângmin phoangthôkoh eka ngama tatphumma, thin enâng kalahma Biria wah mihnyan heh chepsietka lahma jamsietwah.

¹⁴ Phumma enângwah putedâlemte hehma Pol lemlienma josi kahnâng chienkatwah; rohkomin Silas le Timothi nii Biria nâng tôngwah.

¹⁵ Pol sênkatte mihnyan heh Athens nâng lanhuroh johkatwah, ngale erediko Pol ma thinnâng Silas le Timothi nii sitsiak ngatânâng chenkara ngama thôko lahma Biria nâng ngakchien wênwah.

Athen Hahnâng

¹⁶ Athen nâng Pol ma Silas le Timothi nii bemthuko atema Athen hahko ledangli joban moangachaang heh jahmõang khelahma nyahrãng hungchhihwah.

¹⁷ Ephumma Pol ma Sanagog nâng kalahma Jews le Jews ledangte ma Joban nâng soamte heh demnâng thômîn katwah, ngale rangwo roakweih phîn athã sengthinthe hehnâng hokte mihnyan heh demnâng ereheh junma thômîn wah.

¹⁸ Ipikurien le Stonik hethôte hehmin ate demnâng chhiakmîn wah. Atenâng chhienwah, “Are aba pumma - chenni thôthiak thôeka?” Ahan hehma dânthâng wah, “Atema mihdiak Joban ngin thôkoh ehi.” Thinma are jab ekapa, Pol ma thinnâng Jisu ngale ate ritwah ngakhînwâng ngin heh thôkoh junko jabwah.

¹⁹ Ephumma thinma erehah kowah Ariopagas ngama ngaeka ngoang awang heh tânâng siethû lahma ngatwah, “Nangma are niem anyan hethô ekopa nima jet huntanki.

²⁰ Are nangma thôeko ngin heh nima anyan tat eki, ngale nima areheh chenni nâng ngaeka erepa jethun eki.”

²¹ (Chenrãngma ngako Athen nok atang ngale mihdiak wah hokte chentô hehma phangtang are ngin nyan hongeka junma thômîn lahma thin sanpoat pa chhoanthuk wah.)

²² Pol ma erehah kowah ngoang awang heh mako toanchep lahma ngatwah, “Ngama Athen wah mihnyan heh rongrup nâng joban nâng soam atôte rãngrãng kheka.

²³ Chenrãngma ngako, ngama ne hahko phoangkhoam lekma chentô ne rangsoam thinthe hehnâng phoangsokko, nema rangsoam eken hehnângmin, ‘Lethatjet joban nâng,’ ngama raangletma kheka. Phumma nema lethatjet thangma soam eken Joban pa ngama nenâng thôkoh eka.

²⁴ Are hahtokkhoh têm atiakte ngale chentô têm atiakte Joban pa, rangkhethung le hahtokkhoh Teso, ngale atea mihnyan dekma hôanwah rangsoamhum nâng tongmah.

²⁵ Ngale nãng dekma aterãng molihma atenâng chenjô kohhok hunmah, chenrãngma ngako ate dedema nãngnâng reksietthuk ehi ngale roandông kohehi, erediko anga nganâng chentôpa atema kohehi.

²⁶ Atema mihnyan wathe wah chentô mihnyan nyuchha jat apat heh phangtang hôanehi, ngale hahtokkhoh phangtang nâng phoangphan songthuk ehi. Ngale chenre sanpoatko erediko chenre hahko thin sôngmin a ereheh atema khemama them athak lahma thienwah.

²⁷ Arepa Joban ma mihnyan hehma chenlem hang, ngale lemsû lahma chenchohkhe hang ngama hôanwah. Eroh komin linlinko Joban pa nangkhu tâwah hen tâwahmin taangnâng dangmah;

²⁸ mihnyan wathema aroh jabwah, ‘Ate junma nãngkhu hin ajo lihma songtong eki, ngale moaka lihma nyanki.’ Nesê nângmin aroh ngaeka, ‘Nãngkhu min ate chhuchha jôba.’

²⁹ Erohwah nãnga Joban chhuchha dâng phumma, nãngma atea mihnyan makwa hehma thin dekma hôanwah ngun akem, ngale longwah hôanwah moangachaang rãngrãng lethong hunmin.

³⁰ Khemako mihnyan hehma Joban lejet sanpoat wahpa Joban ma lâlien sûtah, rohkomin ade phumma chentô thewah mihnyan hehnâng thin kaamchhih hehwah hungngaklit rãng chieneka.

³¹ Ade phumma atema renlahma thieneka mihnyan pumma hahtokkhoh pa toangtangma rênrãngma rangwo kahtok lahma thieneka. Are nginpa linlin ngama chentô nâng jetthuk rãng atema ere mihnyan pa ritwah ngakhinthuk lahma khesok eka!”

³² Chenthu Pol ma ritwah ngakhînwâng nginthô lahma thinma tatphumma, khaka hehma Pol nâng jõjêm lahma dûmmek wah, rohkomin, khaka hehma ngatwah, “Nima are nginpa ngakchohtat hunki.”

³³ Ngale ere phumma Pol thin tâwah loatchhoan wah.

³⁴ Khaka hehma Pol nginko putedâlem lahma Pol demnâng johruwah, ere putedâlemte heh chhang wah wathepa ngoangwa ate mînpa Dionisias dângwah; ngale dihiaknyu min wathe dângwah ate mînpa Damaris dângwah, phumma ate memin putedâlem wah, ngale ahan khuthe memin putedâlem wah.