MATHIU 8 - NIEMNYAN Naga NT (BSI)

Jisu ma Mihnyan Mesiet

¹ Jisu hahhokho wah jâkhoamkat rienrien, mihnyan heh jahmõang ate diko junkhoam wah.

² Eko angêm khoanchetma chêmte wathe ate tâko hûlahma dakuh thohû lahma ngatwah, “Teso nangma mehun oko, nga eta sensiet hang.”

³ Jisu ma atedek loatsiet lahma angêm wako sahloatwah, ngale atema ngatwah, “Ngama sensiet huneki,” “sen o!” phumma lemlienma angêm khoanchet kowah senwah.

⁴ Erediko Jisu ma Atenâng ngatwah, “Tattan! hennângjô nekthôkoh, tintin wãnglohma soam aroakte nâng khesok wãngo, atema chenthatsû tanho; ngale nanga sentoh ngama anga ngama jetrãngma, Mosa ma chienwah soam aroak thinpa kohwen o.”

Jisu ma Roman Sipâhi Haa Mesiet

⁵ Chenthu Jisu Kaparnam hahnâng hokko, Roman sipâhi sahhab chohmînhû lahma Jisu nâng chohsok rãng roatsep wah:

⁶ Atema ngatwah, “Teso, ngahaa pa kôasô ma cheili chêmlahma jupthinko tonga.”

⁷ Jisu ma ngatwah, “Ngama wãnglekma ate emesiet wãngang.”

⁸ Sipâhi sahhab ma dânthâng wah, “Teso, eroh dangmah, ngama nanga ehumkhenko tâsiet hoktô mihnyan dangmek, jabkhab melolo chien o, ekojô ngahaa pa esen a.

⁹ Ngamin nganoma sahhabdong khenko moekang, ngale ngakhen komin sipâhi heh tonga, wathe nâng ngama, ‘kao!’ menga angko, ate rângka a, ngale wathe nâng ‘wãngro, ngama meroo angko, ate rângwãngra! ngahaako,’ arepa mo o, ngama mechien angko, atema rângmoa.”

¹⁰ Chenthu Jisu ma erepa chohtatko, ate bârit rewah, erediko Jisu ma ate diwah junkhôamte hehnâng ngatwah, “ngama linlin thôkoh eka, Isrial diak khenko are mihnyan rãngrãng dâlemsen machohkhe ekang.

¹¹ Ngama linlin thôkoh eka, jahmõang mihnyan sankat ngewah, sannyup ngewah hûlahma Abraham, Isak, ngale Jakob demnâng rangkhethung wah Joban Hahsông theko aroamma ephhekchhah wak a.

¹² Rohkomin Joban Hahsông thenâng tôngte jatlinlin heh rangnyek khennâng petphê katmin, eretheko pâchupkek lahma seplahma etongwak a.”

¹³ Erediko Jisu ma sipâhi sahhab wako ngatwah, “humnâng wãngo, nangma chenroh dâlem eko ererãngrãng edang kohho.” Ngale ere sanpoatko sipâhi sahhabwa haapa mewah.

Jisu ma Mihnyan Jahmõang Mesiet

¹⁴ Jisu piter humnâng wãng lahma piter tangnyu nyong pa chetloatma jupthinko khunlahma khehokwah.

¹⁵ Jisu ma ate dekko sahloatko khoanchet pa mewah. Ephumma atema toansat lahma Jisu nâng khoakhêm wah.

¹⁶ Chenthu rangjâthah hokko, mihnyan hehma Jisu tâko juchhih lupte mihnyan heh siethokwah. Jisu ma juchhih heh jabkhab ma junloatwah, ngale chentô khoanchette heh mesiet rewah.

¹⁷ Atema ere moatlem pa Isaia mõng ma jabtah pa toangtang dângkatrãng moatwah, “Ate dedema nãngkhun atam pa kep eka, ngale nãng khoanchet pa sahèn phetah.”

Hen Jisu dijunte Tâdângmin a

¹⁸ Jisu ma ate tûmlitko mihnyan heh jahmõang khelahma, ate dijunte hehnâng joranka nâng danwâng rãng chienwah.

¹⁹ Niemarang jettema ate tâko kalahma ngatwah, “Hethôte, nang chennângjô medang okomin nga nangdem demko ejoh chhoan e.”

²⁰ Jisu ma atenâng dânthâng wah, “Hien hehnâng thin tôngrãng ken tonga, ngale wo hehnâng thinrãng arup tonga, rohkomin Mihnyan Chharãng chenkojô ate boantông rãng the aho.”

²¹ Dijunte ahan wathema ngatwah, “Hethôte, khebengko ngakka lekma ngawa mang rukamêng ang.”

²² Jisu ma dânthâng wah, “Nangma ngadijun hang, mangpa mang rôande chenrumîn a.”

Jisu ma Pông Apat Mesiet

²³ Jisu khôankhoko chhangwah, ngale ate dijunte hehmin ate demko johchhoan wah.

²⁴ Lemlien ma pôngdong patdongma josiko metlahma khôankho pa thumjâ nemnem dângwah. Ere sanpoatko Jisu juplek dângwah.

²⁵ Dijunte heh ate tânâng kalahma satsiet katwah, thinma ngatwah, “Teso pânghi!” “nia lâmahrii eki!”

²⁶ Jisu ma dânthâng wah, “Ne chenrãngma aretô patrii eken a? nenâng dâlempa atôrînne!” erediko Jisu toanchep lahma pông apat pa jeksietwah, phumma kihchepchep jekwah.

²⁷ Anga ngama barii lahma ngatwah, “Arepa chenni mihnyan a? pôngpat memin ate nginkep eka!”

Jisu ma Juchhih Lupte Mihnyan Wanii Sênsiet

²⁸ Chenthu Jisu josi ranka wah Gadara diaknâng hokko, enângwah mihnyan wanii mangruk kenwah loatwãng lahma chohmîn wah. Ere mihnyan waniiko juchhih luplahma nyahrãng cheili dângwah, ngale erelem pumma henjô lechin dankhoam dângwah.

²⁹ Lemlien ma thinma hongrak lahma ngatwah, “Joban Chha, nangma ninâng chenni rehun ehia? sanpoat mathângma nichêmsiet rãng kaeroa?”

³⁰ Erekowah chentô letaangko wak jahmõang phhekchhah joaklahma dângwah.

³¹ Ephumma juchhihma Jisu nâng roatsep wah, “nangma ni mejunlo hiko, irewak chhangko lupkathuk hi”

³² Jisu ma thinnâng ngatwah; “Ka en,” phumma mihnyan kowah loatchhoan lahma wak chhangko lupkatwah. Erediko wak heh phangtang ka pumma jâchhoan kalahma josiko mahritkat wah.

³³ Wak heh sok arête mihnyan heh huhchhoan lahma hahdaang nâng wângwah, erediko thinma nginpa phangtang loatthôkoh wah, ngale juchhih lupte mihnyan heh nginpa thôkoh rewah.

³⁴ Ephumma hahdaang kowah chentô mihnyan heh Jisu chohmînrãng hokwah; chenthu thinma Jisu kheko, Atenâng nihah kowah chhoan o, ngama roatsep wah.