MATHIU 28 - NIEMNYAN Naga NT (BSI)

Angakhîn

¹ Pientông rangwo dijâko, dobatjâ wowen khoko, Mariam Makdalani, ngale ahan Mariamnii mangruk nâng kalahma sokkatwah.

² Phumma lemlienma hahtii dong hôngtiiwah; rangkhethung wah Teso ngintatte kalahma long kâsekpa loangphe kalahma ere khohko tôngkatwah.

³ Ate thhenphãng pa rangdãng khiapda rãngrãng dângwah, ngale ate khetpa mien rãngrãng potutu dângwah.

⁴ Abemte sipâhi heh nyahrãng chei lahma atii rewakwah, ngale riichoan mihnyan rãngrãng dângwah.

⁵ Rangkhethung wah ngintatte ma dihiaknyu niinâng ngatwah, “Nekchei en,” “Ngama ajet nema rittek retah Jisu pa lemeken.

⁶ Ate aretheko ahotu; atema ngatah rãngrãng ngakhintah. Wãngletma ate thientah theko sûwãng tanrên.

⁷ Athângheh sitsiak wãngletma ate dijunte hehnâng thôkoh en, ‘atea ngakhintah, ngale ate athângheh nekhu mako Galili nâng wãnglaeka; enâng nema ate echohkhe en!’ Ngama nenâng chenni thôkotah a erepa thonghun en.”

⁸ Ephumma mangruk wah sitsiak loatchhoan wakwah, ngale cheimin rewakwah, erediko khuhah nâhah chhoanwãng waklahma ate dijunte hehnâng thôkoh wah.

⁹ Lemlienma Jisu thin demnâng chohmîn lahma ngatwah, “Khuhah nâhah dangen.” Phumma thinkhu Jisu tâko wãng lahma, ate dako lowãng waklahma rangsoam wah.

¹⁰ Jisu ma thinnâng ngatwah, “Nekchei en,” “Wãngletma nga naa hehnâng Galili nâng wângrãng thôkoh en, ngale enâng thinma nga echoh khewak hang.”

Mangruk Bemte hehwah Ngin

¹¹ Dihiaknyu heh wangthuko, mangruk bemte hehwah hahdaang nâng wãng lahma chenni dangtah a ereheh phangtang soam aroakte adong hehnâng thôkoh wah.

¹² Soam aroakte adong heh khhepho phannang heh demnâng chohmîn lahma thômîn wah; Ngale thinma sipâhi hehnâng jahmõang ngun kohwah

¹³ Ngale thinma ngatwah, “Nema aroh thô en, ni rangpen jupthuko ate dijunte heh hûlahma mangpa huh pechhoan tah ngama.

¹⁴ Are nginpa Govono ma metat ako, nima atenâng ethôkoh e, ererãngma ne chenjô sekmah patritthin aho nima epânga.”

¹⁵ Sipâhi hehma ngunpa tha lahma thinnâng chenroh thôkotah a ererãngrãng thôwakwah. Ngale erohwah, thenep thejâ nângmin jews hehma nginpa eroh phoangthô eka.

Jisu Ate Dijunte heh tânâng Hôngloat

¹⁶ Jisu ma thinnâng wângrãng thôkotah Galili wah hahhoko ate dijunte echhi wathe pa wângwah.

¹⁷ Chenthu thinma Jisu chohkheko atenâng rangsoam wah. Rohkomin khuka pumma lepute dângwah.

¹⁸ Jisu thintâko hehka lahma thinnâng ngatwah, “Nganâng Rangkhethung le hahtokkhoh kowah chentô Chaanpa lâkoh thang.

¹⁹ Erohwah chentô mihnyan nyuchha, ngale chentô thenâng chhoan en, ngale ngadijunte rãng dangthukwak en: Ngale Wa mînko, Chha mînko, erediko Asâthôanju mînko baptijem koh en,

²⁰ Ngale ngama nenâng chentô thôkotah ngin heh keprãng hethô en. Ngale nga nedemnâng roantang roanjêngma athôan kotuk ejoh tonga.”