MATHIU 27 - NIEMNYAN Naga NT (BSI)

Jisu Pilat tânâng Sietkat

¹ Rangkhah rangkhoma chentô soam aroakte adong ngale khhepho phannang hehma Jisu ritphe rãng themawa wah.

² Thinma janruma khhek lahma Roman Govono Pilat tânâng sietkat wah.

Juda Rit Ngin

³ Chenthu Jisu loatthukte Juda ma Jisu ritphe nginpa chohtat phumma ngakchhih thonghun lahma roakrem janngunpa soam aroakte adong ngale khhepho phannang hehnâng ngakwên kohwah.

⁴ Atema ngatwah, “Ngama toangtang mihnyan pa ritphethuk lekma pap lâmotek!” Thinma dânthâng wah, “Are nginpa nima chenni ejet ea?” “Arepa nangma jetthin ba!”

⁵ Juda ma ngunpa rangsoamhum ko petphethien kolahma ngakchhoan wah; erediko ate chhoan lahma chethietrit wah.

⁶ Phumma soam aroakte adong pumma ngunpa toansem lahma ngatwah, “Are ngunpa mihnyan heithã, erohwah nãng Niemarang junko are ngunpa Rangsoamhum kowah ngunsek bâkoatko leta sekmin.”

⁷ Phumma ngin pûnthômîn diko, thinma ere ngun pumma mihwun heh mangruk hôanrãng tithôante pit riakwah.

⁸ Erejunko thenep thejâ nângmin erepitko “Heima riakwah pit” ngama mîn eka.

⁹ Erediko Jirimia mõng ma jabtah nginpa toangtang dângwah: “Isrial mihnyan heh punthômîn lahma ate thãrãng kohtah roakrem ngunpa thinma kepwah,

¹⁰ Ngale Teso ma nganâng chienthang rãngrãng, thinma ere ngun pa tit hôante pit riakrãng kepwah.”

Pilat ma Jisu nâng Nginchhien

¹¹ Roman Govono mako Jisu chepwah, eko atenâng “Nanga Jews heh Lowang dangoa?” ngama chhienwah. “Nangma lâpun jabtoh” ngama Jisu ma dânthâng wah.

¹² Rohkomin soam aroakte adong ngale khhepho phannang hehma atenâng sekhâmko atema chennimin dânthangho.

¹³ Ephumma Pilat ma atenâng ngatwah, “Thinma nang lelatnâng are ngin thôeka heh nangma tatmohne”

¹⁴ Phumma Jisu ma khapthemin danthangho, phumma Govono pa nyahrãng patritwah.

Jisu Ritpherãng Ngin Pat

¹⁵ Adankhoam lokuh roakweih henpa nok atang hehma laangphe kohhi ngama ngaeka ere mihnyan pa Roman Govono ma phâtek wah chilaang phewah.

¹⁶ Ere rangkuhko anga ngama jetlahma phâtek nâng tôngte ate mînpa Jisu Barabas ngama wathe mihnyan dângwah.

¹⁷ Ephumma chenthu loangchhang pa khôanhok phumma, Pilat ma thinnâng thôngphâ wah, “Ngama henpa laangphêrãng nema hun eken a? Jisu Barabas pa laangphe ang ale, Misaia ngama ngaeka Jisu pa lângphe anga?”

¹⁸ Pilat ma senthemthem jetlahma dângwah, Jews heh khhepho phannang hehma Jisu nâng phetwan mitchek junko nganâng lohûkoh ehang ngama.

¹⁹ Metloatthin hum kowah tôngthinko Pilat tông thuko, ate dihiak pumma atenâng ngin matkatwah: “Are toangtang mihnyanko nangma chenjô nekre, chenrãngma ngako ate junma thepen metmãngnâng ngama nyahrãng chêmchoh ekang.”

²⁰ Soam aroakte adong ngale khhepho phannang hehma mihnyan hehnâng ngatwah, nema pilat nâng nga en, Barabas laangphe kohhi, ngale Jisu pa arittek reo, ngama.

²¹ Phumma Pilat ma mihnyan hehnâng thôngphâ wah, “Are wanii kowah henpa laangphekoh a?” Thinma “Barabas laangphe kohhi” ngama dânthâng wah.

²² Phumma Pilat ma thinnâng thôngphâ wah, “Eroh medang ako, ngama Misaia ngama rooeka Jisu ko chennire anga?” Thinma, “Arittek reo!” ngama dânthâng wah.

²³ Rohkomin Pilat ma thôngphâ wah, “Atema chenni chhihmotah a?” Ere diphumma “arittek reo!” ngama chaan chaanma danrak wenwah:

²⁴ Chenthu Pilat ma mihnyan heh demnâng ngin thamlek thômînpa sekhotu, ngale aroh metham thômîn angko rinba ekhahwak a ngama jetlahma, atema jo toanlahma thin mathahko atedek sâsoan lahma ngatwah, “Are mihnyan ritpa ngamet dangmah! arepa nemaba ritphe eken!”

²⁵ Mihnyan heh phangtangma dânthâng wakwah, “Are mihnyan ritthãpa ni ngale nichhu nichha heh khohnâng chendanga!”

²⁶ Erediko Pilat ma Barabas laangphewah; ngale atema Jisu nâng watlahma, rittekthuk rewah.

Sipâhi hehma Jisu nâng Jôannam

²⁷ Erediko Pilat sipâhi hehma Jisu Govono humnâng sietkatwah, ngale Jisu tumlitko mihnyan heh phangtang tumchepwah.

²⁸ Thinma Jisu khetpa koakphe wakko lahma, khetchek ngaklit pohkohwah.

²⁹ Erediko suhkãngwah khaphokrãng hôan lahma Jisu khoko phokkoh rewah, ngale Jisu dekchahko menthunpa semthuk rewah; erediko ate mako dakuhtho lahma, “Jews heh Lowang roandonglo dongo!” ngama ngawak lahma jôannam wah.

³⁰ Thinma atenâng thoakkahma thoak rewah, ngale thankah toan lahma ate khokowat rewah.

³¹ Chenthu thinma Jisu nâng joannam diko, khetchekpa ngakkoakphe kolahma ate khetpa ngakpoh kohwah. Erediko rittekrãng sietchhoan wah.

Jisu Rittek

³² Thin loatchhoan poatko, Kren hahwah mihnyan wathe ate mînpa Simon ngama lemko chohmîn wah, phumma sipâhi hehma atenâng Jisu ma peka bãngphakpa pêthukwah.

³³ Thin a Golgotha theko wângwakwah, arepa, “Khorã sekthinthe” ngama ngaeka.

³⁴ Eretheko thinma Jisu nâng angurti demko lihân akhahli saklahma jokthukwah; phumma atema thatliapdek lahma erepa jok ho.

³⁵ Thinma Jisu rittek diko, ate khetpa longkendoh nâng tan lahma phenkepwah.

³⁶ Erediko thinma eretheko tonglahma bemwah.

³⁷ Ate khotokko atenâng dûmmek nyapraang raang lahma bãngphakko betkohwah: “Are Jisu pa Jews heh Lowang” ngama raanglahma betkohwah.

³⁸ Erediko thinma Jisu demko ahuhte wanii, ate dekchah wathe ngale dekhitko wathe johrittek wah.

³⁹ Adankhôamte mihnyan hehma thinkho hek lahma Jisu nâng dûmmek wah:

⁴⁰ “Nangma Rangsoamhum pa chhihsiet lohma jârem khenko tangak hoan ang ngatohni! Joban Chha medang oko nangdede pepângriio! ngale bãngphak khokowah jâkhoam katanrõ!”

⁴¹ Ererãngrãngjô soam aroakte adong ngale Niemarang hethôte, erediko khhepho phannang hehma atenâng jôjêmwah:

⁴² “Atema mihhan heh pepâng eka, phumma atedede tape pângriimah! atea Isrial heh Lowang dangmahne? Ate bãngphak khokowah athângheh mejâkhoam karako, nãngmemin atenâng putedâlem e!

⁴³ Atema Joban nâng tok anaa lahma atedede Joban Chha ngarii eka. Thatsu tan e, athângheh Joban ma ate pepâng chenhun ale!”

⁴⁴ Ate demwah joh rittektah ahuh heh memin atenâng erohjô dûmmek wah.

Jisu Rit

⁴⁵ Sanhêmthah ko diaktangma koantarem rãng rangnyek dângwah.

⁴⁶ Wanrem sanpoat tôko Jisu ma chaanmõang hôngrakwah, “Eli, Eli, lama sabatthani” are ngaeka pa, “Joban, Joban, chenrãngma thinphe ehanga?” ngama ngaeka.

⁴⁷ Erekowah tôngte mihnyan hehma tat lahma, “Atema Ilija rooeka!” ngama ngatwah.

⁴⁸ Thinkhu tungwah wathe lemlienma chhoanka lahma jochhupli pongpe noappa angurti chhihnâng rûmka lahma thankah rako hetlahma atenâng jokthukrãng phungwah.

⁴⁹ Phumma ahan hehma ngatwah, “Mamêngtan, Ilija ate pepâng rãngma chenka ralema thatsutan e!”

⁵⁰ Eredikomin Jisu ma chaanmõang wientherak lahma rekthôansiet wah.

⁵¹ Jisu ritdiko Rangsoamhum wah khet tintahpa rangkhoh pumma daphang tôko khanii korãng khâjâwah. Erediko hahtii, longjan heh chhupjâ rewah,

⁵² Mangruk heh lângjâ rewah, ngale ajahthem Joban nâng putedâlemte mihnyan riitah heh ngakhîn rewah

⁵³ Thin a mangruk kowah loatchhoan wah, ngale Jisu ritwah ngakhîn diko Asâthôan Hahdaang Jeroselem nâng wângwakwah, eko ajahthem mihnyan hehma thin khewah.

⁵⁴ Chenthu Jisu bemte Sipâhi sahhab ngale ate demwah sipâhi hehma hahtii ngale ere sanpoat kowah chentô dangtah heh khelahma chei rewakwah, ngale thinma, “Linlinjo atea Joban Chha dângwah!” ngama ngatwah.

⁵⁵ Eretheko Jisu nâng hahtaangma sûlahma ajahthem dihiaknyu dângwah, thin a Galili wah Jisu diko atenâng chohsok rãng ngama junkhoam wah.

⁵⁶ Thinkhu chhangko Mariam Makdalani, Jems ngale Josepnii nyong Mariam, ngale Zibidi tangnyu heh dângwah.

Jisu Mangbîn

⁵⁷ Sanhêmthah ko Arimatha hahwah techhuwa wathe hokkhoam hokwah; atemîn pa Josep dângwah, ngale atemin Jisu dijunte dângwah.

⁵⁸ Atema Pilat tânâng wãng lahma Jisu mangpa thâwângwah. Pilat ma Jisu mangpa rûchhoan thukwah.

⁵⁹ Ephumma Josep ma mangpa jâtoan lahma khetnyan nâng doapwah,

⁶⁰ ngale atema longrãwah thutah ate mangruk nyanko rûkatwah. Erediko atema mangruk kenpa longkâsek ma sekthien lahma chhoanwah.

⁶¹ Mariam Makdalani, ngale ahan Mariam nima mangruk ngeko sûkat lahma tôngwakwah.

Mangruk Bêmte

⁶² Khedi jâpa Pientông rangwojâ dângwah, phumma soam aroakte adong heh ngale Farasi heh Pilat demnâng chohmînwah

⁶³ ngale thinma ngatwah, “Sir, nima chhemhun eki, are mothô wapa ahîn thuko, ‘nga a jârem diko ngakhîn rêmin,’ ngama ngatwah.

⁶⁴ Erohwah jârem maleleko ate mangruk pa senthemthem bemsokrãng chien o, eroh ledang kako ate dijunte hehma ate mangpa huhka lahma ngakhintah ngama ephoangthôa. Are athôan wah thôeka mothôpa khebângko thôtah nomemin achhih edanga”.

⁶⁵ Pilat ma thinnâng ngatwah, “Abemte sipâhi hehwah sietletma, mangrukpa senthemthem bemka en.”

⁶⁶ Ephumma thin chhoan lahma longkâsek pa lejien laangli tângmiem katwah, ngale abemte sipâhi hehnâng bemthuk rewah.