MATHIU 25 - NIEMNYAN Naga NT (BSI)

Janchhô Waechhi Nginthakthô

¹ “Ere sanpoatko rangkhethung Hahsông pa arerãngrãng dângmin. Rekthenâng janchhô waechhi ma thin wentit semlahma nemnyanwa chohmînrãng chhoan wakwah.

² Phumma wabangâ pa nokba dângwah, ngale ahan wabangâ pa jet ajien dângwah.

³ Nokba wabangâ pumma wentit keplahma thin demnâng wentien abâm kepmah,

⁴ Phumma ahan wabangâ pumma thin demnâng wentien abâm kepwah.

⁵ Phumma nemnyanwa hokpa lektong lahma thin a jupmetrii lahma juplek wakwah.

⁶ “Rangpen mongtãngko hôngrakwah, ‘Nemnyanwa lâhûtha! hûren ate demnâng chohmîn hûren!’

⁷ Phumma janchhô waechhi pa toansat lahma thin wentit pa dôrepwah.

⁸ Ephumma nokba wabangâ pumma jet ajien wabangâ ko ngatwah, ‘Ne wentien kowah roanruto nêmthuk mênghi, chenrãngma ngako, ni wentien thôan lahma wentit pa lâmuttah.’

⁹ ‘Jiennêm thukmah,’ ngama jat ajien hehma dânthâng wah, ‘nãngkhu anga ngarãng lemah. Chhoan letma nerãng richhoan en.’

¹⁰ Ephumma nokba heh wentien riakrãng chhoanwah; ngale thin chhoan diko nemnyanwa pa hokwah. Ephumma jet ajien wabangâ pa nemnyanwa demko phhekchhah chhah thinnâng johwângwah, ngale thinwâng diko kâsekpa sekwah.

¹¹ “Khediko ahan wabangâ pa hûlahma, ‘hethôte, hethôte!’ nimin akhennâng lupwãng thukhi, ngama raksepwah.

¹² Nemnyanwa pumma ‘lupwãng thukmah, ngama ne jetmah’ ngama dânthâng wah.”

¹³ Athôanko Jisu ma ngatwah, “jetletma dangen, chenrãngma ngako, nema rãngwo sanpoat pa jetmet.

Haa Warem Nginthakthô

¹⁴ “Ere sanpoatko rangkhethung Hahsông pa arerãngrãng dângmin. Rekthenâng mihnyan wathema ate hum phethien lahma hahtaang nâng chhoanwah; phumma ate haaheh roolahma ate chhahkhem heh sokare thukthien wah.

¹⁵ Atema haa chentô nâng mâmâ tôtô moatlem kohthien wah: Wathenâng hahjat bangâ ngun kohthien wah, ahan watheko hahjatnii ngun kohthien wah, ngale ahan watheko hahjatthe ngun kohthien wah. Erediko tângte pa chhoanwah.

¹⁶ Hahjat bangâ kohtah haapa lemlienma chhoan lahma ahan hahjat bangâ ngun chohbi wah.

¹⁷ Ererãngrãngjô hahjatnii kohtah haa pummemin ahan hahjatnii ngun chohbi wah.

¹⁸ Phumma hahjatthe kohtah haa pumma chhoan lahma ate tângtewa ngunpa hahken thulahma bînthien wah.

¹⁹ “Melâng rãngpâ diko tângtewa pa ngakhû lahma ate haaheh demnâng atema kohthientah ngunheh phensietmîn wah.

²⁰ Hahjat bangâ kohtah haapa hûlahma atema chohbitah ahan hahjat bangâ pemin kohwah. Haa pumma ngatwah, ‘Tângte nangma hahjat bangâ kohthang.’ ‘Sûtan! phumma ngama ahan hahjat bangâ chohbila ekang.’

²¹ Tângtewa pumma haako ngatwah, ‘lâsenmotoh, nanga asen ngale dâlemli!’ ‘nangma are amãnchha ngun pumma senthemthem jienmo eko, erohwah ngama nangnâng ngun jahmõang ethienthuk e. Wãngro nga demnâng khu johhah wãnghang!’

²² Erediko hahjatnii ngun kohtah haapa hûlahma tângtewa ko ngatwah, ‘nangma nganâng hahjatnii ngun kohwah, phumma sûtan tângte! ngama ahan hahjatnii chohbila ekang.’

²³ Tângte pumma haako ngatwah, ‘lâsenmotoh, nanga asen ngale toangtang, nangma amãnchha ngun pumma senthemthem jienmo eko, ngama nangnâng jahmõang ngun ethienthuk e. Wãngro nga demnâng khu johhah wãnghang!’

²⁴ Erediko hahjatthe kohtah haapa hûlahma tângtewa ko ngatwah, ‘Tângte, ngama jet nanga nyahrãng mihchhihjat; nangma lekhiet leliwah khôanhente, ngale nangma chhahthong lemowah chhah khôankhente.

²⁵ Nga nangran cheilekma nang ngunpa hahkennâng bînthien wah. Sûtan! nang ngunpa ana’.

²⁶ Ate tângtewa pumma haako ngatwah, ‘nanga achhih ngale ajõ’, ‘nangma jet dangwah, dangale rohkole, nga a, ngama lekhiet leliwah khôanhente, ngale ngama chhahthong lemowah chhah khôankhente ngama?

²⁷ Nangma nga ngunpa ngunthien humnâng sek lohmeko, nga ngakhokko ngunchha demnâng ngakchohmîn wah.

²⁸ Atewah ngunpa thaletma hahjat echhi chohte wako koh en ngama ngatwah.

²⁹ Chenrãngma ngako, hennâng roanchhe tongeka ereko lephang lelãng chendanga ngama ajah lêkohmin; rohkomin, hennâng chenjô aho dangeka, atenâng roanchhe tongeka pejô ngaktôan chhoan rêmin.

³⁰ Are sekho haapa rangnyek khenko petphekat en; ereko asep nungma ate pâchupkek lahma chentonga.’

Athôan Khope Rên

³¹ “Chenthu Mihnyan Chhapa rangkhethung wah ngintatte heh phangtang demnâng Lowang danglahma katko, atea Lowang tôngthinko etonga,

³² ngale chentô diak akan wah mihnyan heh ate mathahko ekhôanhûa. Erediko kien chhangwah saak rângrephea rãngrãng, mihnyan heh atema khunii korãng ephansiet a.

³³ Atema toangtang mihnyan heh ate dekchahko etongthuk a, ngale ahan heh ate dekhitko etongthuk a.

³⁴ Erediko Lowang pumma ate dekchahwah mihnyan hehnâng enga a, ‘wãngrên, nenâng nga Wama rang lâkohthen! rangbâng hahbâng thuwah nerãng khoakhem kohthen Hahsông pa kepwãngrên.

³⁵ Nga rêmritko nema chhahthuktha, ngale jolân ritko nema jo jokthuktha; nga mihwun dângpoatko nema nehumnâng jekthuktha,

³⁶ nga boangloang dângko nema khet kepthuktha; nga akhun poatko nema chohsûtha, ngale phâtek khennâng dângpoatko nema chohsûtha.’

³⁷ Erediko toangtang hehma edânthanga, ‘Teso, nima chenthu nang rêmrit khelihma chhahthuktih a, roh akole jolânrit khelihma jokthuktih a?

³⁸ Chenthu nanga mihwun khelihma nihum nâng jekthuktih a, roh akole boangloang khelihma khet kepthuktih a?

³⁹ Chenthu nanga akhun khetih a, ngale phâtek nâng tonglohma chohsû hûtih a?’

⁴⁰ Phumma Lowang pumma edânthanga, ‘Ngama nenâng thôkoh eka, chenthu nema ngadijunte arinthôan wathe nâng chohsûtet a, arepa nganâng chohsok wah!’

⁴¹ “Erediko atema ate dekhit wah hehnâng enga a, ‘nga tâwah taangen, nea Joban wah achhih chohte! Joak le ate ngintatte hehrãng khoakhem kotah roantang roanjêng khâmthin wendôko ka en!

⁴² Nga rêmritko nema chhahthuk mahtha, ngale jolân ritko jo jokthuk mahtha;

⁴³ Nga mihwun dângpoatko ne humnâng jekthuk mahtha, ngale boangloang dângpoatko nema khet kepthuk mahtha; nga khun poatko ngale phâtek nâng tongpoatko nema chohsû mahtha.’

⁴⁴ Erediko thinma atenâng edânthanga, ‘Teso, nima nang rêmrii lohma chenthu khetih a, ngale chenthu jolânrit khetih a, ngale mihwun danglohma khetih a, rohkole boangloang khetih a, ngale khun khetih a, rohkole phâtek nâng khelihma lechohsû dangtih a?’

⁴⁵ Ephumma Lowang pumma edânthanga, ‘Ngama nenâng thôkoh eka, chenthu nema arinthôan wathe nâng lenyoak chohsû dangtet a, arepa nganâng lenyoak chohsû dangeha.’

⁴⁶ Ereheh roantang roanjêng chêmchoh thinnâng chienkatmin, phumma toangtang heh roantang roanjêng roandông chohthin nâng wângthukmin.”