MATHIU 24 - NIEMNYAN Naga NT (BSI)

Jisu ma Rangsoamhum Chhihsiet junma Jab

¹ Jisu Rangsoamhum kowah khôamchhoan thuko ate dijunte heh hûlahma atenâng Rangsoamhum pa sûtan chentôsên a ngama khesokwah.

² “Edenga,” ngama atema ngatwah, “nema are heh sênmõang khe eken. Ngama nenâng arepa thôkoh eka: long phangthemin ate theko letongtumin; phangtang runjâ erea.”

Chêmchei ngale Mihma Chêmsiet

³ Jisu Oliv Hahhokho ko tôngpoatko, ate dijunte heh ate tâko mihnâng lejetrii thangma hokwah. Thinma Jisu nâng ngatwah, “Arepa chenthu dângmin a” erepa ninâng thôkohhi, “Ngale nang ngakkat sanpoat, erediko rangle hahtokkhoh thôan sanpoat pa khesokrãng chenroh dângmin a ngama chhienwah.”

⁴ Jisu ma dânthâng wah, “Ne jetletma tongen, ngale hennâng min nekdiap chhahrii en.

⁵ Ajahthem mihnyan ma ngamîn keplahma ehûra, ngale thinma ‘nga a Krista!’ ngama hûlahma ajahthem mihnyan heh ediapchhah a.

⁶ Nema ne kêanâ jêngkomin ngale hahtaang nângmin ranloatmîn ngin echohtat en; rohkomin neksekmah en. Athôan sanpoat hokmako eroh ebengdanga, rohkomin erepa athôan sanpoat pa dangmah.

⁷ Diakthe pumma Diakthe demko ran elongmîn a, ngale wanthe Hahsông pumma wanthe Hahsông demko longmîn erea. Rêmdong, ngale chentô therupnâng hah etiia.

⁸ Are chentôpa naachhatrãng wokchet wah rãngrãng edanga.

⁹ “Erediko nea khhek ere hèn, ngale chêmsiet lahma ritphe ere hèn. Mihnyan nyuchha chentôma nga junko echhihchoh hèn.

¹⁰ Ere sanpoatko ajahthem mihnyan hehwah putedâlem pa echhihjâa; Thinkhu tungko wathema wathe echen esãng mîn a, ngale chhihchohmîn erewak a.

¹¹ Erediko ajahthem mõngmõang heh hong lahma mihnyan heh ediapchhah a.

¹² Ererãngrãng achhihpa liamlahma ajahthem mihnyan wah hun achetmîn pa emahjâa.

¹³ Phumma henhen athôankotuk rongtêngtêng putedâlem eka ereheh meba khope chohmin.

¹⁴ Ngale are rangkhethung Hahsông Nginkongsen pa hahtokkhoh phangtang nâng chentô mihnyan nyuchha nâng phoangthôkoh mêngmin; erediko athôan sanpoat pa ehûra.

Nyahrãng Cheili

¹⁵ “Mõng Daniel ma thôtah nyahrãng acheili pa nema echohkhe en. Erepa Asâthôan theko ehonga.” (Arepa chenni nâng ngaeka erepa are nyapraang weihte hehma jetlo en!)

¹⁶ “Ere sanpoatko Judia wah sôngte mihnyan heh hahkong khonâng huhchhoan wângmin.

¹⁷ Ere sanpoatko humkho nâng koatwângte mihnyan heh humkhen wah ate sêmmak heh toankatrãng sanpoat lechohmin.

¹⁸ Pitnâng dângwah mihnyan heh memin ate humnâng wãng lahma sêmmak heh ngaktoanwâng sanpoat pa lechohmin.

¹⁹ Ngale ere sanpoat kowah naawunte dihiaknyu ngale naajeng nyong dângte dihiaknyu hehrãngma chentô cheili dângmin a!

²⁰ Ne huhchhoanjâ rangwopa rangpa nâng nekchen dangeka, ngale Pientông rangwo jânâng nekchen dangeka ngama Joban nâng rangsoam en!

²¹ Ere rangwojâ kowah chêmchoh pa rangbeng hahbeng thuwah athângheh tôko chêmeki kowahmin achhihthôan dângmin. Ngale ererãngrãng chêmpa khedi nângmin lethong dangtumin.

²² Phumma ere rangwopa Joban ma lâthoan siettah; Joban ma aroh lethoansiet nomeko henmin leta peminwah. Joban ma ren eka mihnyan hehrãng sênrãngma Joban ma ere rangwopa thoansiet eka.

²³ “Phumma ere sanpoatko nenâng henma akomin, ‘Sûtan Krista ako anã!’ ba ‘Atea ireko tonga!’ ngama menga hèn komin, atenâng nekpute en.

²⁴ Chenrãngma ngako, Misaia mõang ngale mõngmõang heh ehongwak a; Ngale Joban ma ren eka mihnyan heh meta diapchhah ekorãng ngama thinma nyahrãng patritli ngale bâritli moatlem heh emoa.

²⁵ Tat en! Nenâng ngama arepa ere chêmchoh sanpoat hokmako thôkoh eka.

²⁶ “Ngale mihnyan hehma ‘Krista pa ire sehahko tonga!’ ngamemin ethôkoh hèn - phumma eretheko nekwãng; ngale ‘atea areko huhtong lahma tonga!’, ngamemin engahèn, rohkomin atenâng nekpute en.

²⁷ Chenrãngma ngako Mihnyan Chha katpa rangdeng khiapda sankatma sannyup nâng rângdanliap arãngrãng katmin.

²⁸ “Chenko mang tongeka, eretheko mang phhekte wo heh ekhoanjâa.

Mihnyan Chha Ngakkat Ngin

²⁹ “Ere chêmchoh sanpoat pa thôan diko, lemlienma sanpa nyekjâ erea, dâmin leliat tumin, rangkho wah merit hehmin jârit erea, ngale rangkho wah chentô heh thinthe kowah jârit erewak a.

³⁰ Erediko Mihnyan Chha ngakkat sanpoat pa jetrãng rangkho nâng ajatjat hong lahma ekhe e; ngale Mihnyan Chhapa rangkho wah phoam khohko tonglahma chaan ahâng ngale phiakto phiakja katpa khelahma hah khohwah mihnyan heh phangtang esepwak a.

³¹ Poakpo rahdongpa merah mettahko, atema rangwah ate ngintatte heh hahtokkhoh ko sukbelii nâng echien chhoan a, phumma ngintatte hehma Joban ma ren eka mihnyan heh hahtokkhoh phangtang wah ekhôansiet a.

Phukbãng wah He

³² “Phukbãng ma chenhethô hèn. Chenthu phukbãng pa hinchîchî, noapjokjok, ngale bãngchhong chhongnyan mechhong tahko, nema rangcho lânam hûtha ngama rângjet en.

³³ Chenthu ngama nenâng thôkotah heh rãngrãng danglahma mekhe tetko, nema athôan sanpoat pa lânamtha, ngale lâhûera ngama jet en.

³⁴ Thonghun en, are chentôpa athângwah ahînte mihnyan heh phangtang târit mako edanga.

³⁵ Rangle hah eta chhihjâa, rohkomin Nga jabkhab pa chenthumin leta chhihjâmin.

Henmemin Rangwo ngale Sanpoat pa Tajetmah

³⁶ “Ere rangwo le sanpoat pa chenthu hokmin a erepa henmemin jetmah - rangkhethung wah Joban ngintatte hehmemin jetmah, ngale Chha memin jetmah; Wama loloba jet a.

³⁷ Mihnyan Chha ngakkat pa Noa sanpoatko chenroh dangtah a ererãngrãng dângmin.

³⁸ Jodôngma lummako, mihnyan heh jokphhek chhah lahma dângwah, ngale Noa khôankho khenko lupwângjâ tôkotuk dihiak dela kepmîn lahma dângwah;

³⁹ Jodông pumma malumlumko thinma chenni dangeka ere pejô lethonghun dângwakwah. Mihnyan Chha katjâ komin ererãngrãng dângmin.

⁴⁰ Ere sanpoatko mihnyan wanii pitnâng eroam moa: Phumma wathepa sietwên lahma wathepa ephethien a.

⁴¹ Dihiaknyu wanii chhahthut themko eroam thuwak a: Phumma wathepa sietwên lahma wathe ephethien a.

⁴² Erohwah jetletma dangen, chenrãngma ngako, chenre jâko ne Teso pa katmin a ere rangwopa nema jetmet.

⁴³ Hum tângtewa pumma ahuhte hok sanpoat pa mejet ako, atema bemtong lahma ahuhteko humpa lehuh thukmin.

⁴⁴ Erohwah nemin roantangma jetletma tongmin, chenrãngma ngako, Mihnyan Chhapa nema lechhemhun sanpoatko ekara.

Haasen ngale Haachhih Nginthakthô

⁴⁵ “Henpa dâlemli ngale jet ajien haa a? Atenâng ate tângte ma haa ahan hehnâng phhekchhah pa achhah sanpoatko chhahthukrãng ethien a.

⁴⁶ Chenthu tângtewa pa humnâng hokko, atema chenroh chientah a eroh molahma metongla ako haapa chentô khuhah dângmin a!

⁴⁷ Ngama nenâng nginlinlin thôkoh eka, ere haapa tângtewa pumma ate chhahkhem heh phangtang sokare rãng ethien a.

⁴⁸ Phumma ere haapa mihnyan chhih medang ako, nga tângte pa rangwo lorãng ngakhû mahra ngama ethonghun a,

⁴⁹ Phumma atema ate lemru haa ahan hehnâng buh awat erea, ngale ate rãngrãng mihnyan chhih heh demnâng mokjok mokchhah lahma etonga.

⁵⁰ Phumma ere haa tângtewa pa haa pumma lethonghun ngale lejet sanpoatko engak hûra.

⁵¹ Phumma tângtewa pumma haapa khihkhih nyahnyah khihdoak lahma ahuhkhoanglep heh demnâng ejoh chêmthuk a. Ereko atema asep nungma ate pâchupkek lahma etonga.