MATHIU 16 - NIEMNYAN Naga NT (BSI)

Apatritli Moatlem Khesokrãng Chien

¹ Farasi ngale Saduki Jisu tânâng hutah hehma Jisu bukritthuk rãng hunwah, ngale Joban pa ate demnâng ngama jetrãngma, ninâng patritli moatlem molohma khesok hi ngama chienwah.

² Phumma Jisu ma dânthâng wah, “Chenthu sannyup katko, nema rângnga en, ‘rangsen edanga, chenrãngma ngako rangpa cheksoaksoak.’

³ Ngale rangkhahko rangpa cheksoaksoak ngale rangkhu dângko, ‘rang epat a’ ngama rângnga en. Nema rangnâng sûletma rangchhih rangme pa jetlo eken, rohkomin nema athângwah sanpoat pa jienjet lomet!

⁴ Areroan wah mihnyan heh achhih ngale Joban nâng putedâlem wakmah! nema nganâng patritli moatlem khesok rãng chien eha? khesokmah! Nenâng khesokthin pa Jona patritli petah peloloba khesok eka.” Ere diphumma thin tâwah ate loatchhoan rewah

Farasi ngale Saduki heh Wichhi

⁵ Chenthu dijunte heh josi ranka nâng dânko, thinma phhekchhah lekphe lahma dânwakwah.

⁶ Jisu ma thinnâng ngatwah, “Jetletma dangen, Farasi ngale Saduki heh wichhi wah ataangnâng dangen.”

⁷ Phumma thindede tungko jabmîn wah, “Atema are ngaeka pa nãngma phhekchhah lekep dângjunko ngaehi.”

⁸ Jisu ma thin jabmîn ekapa jetlo lahma ngatwah, “Nedede tungko phhekchhah aho junko chenrãng jabmîn eken a? nenâng putedâlem atô rînne!

⁹ Nema athâng nângmin mata jetlo ekenne? Ngama bankên wanbangâ pa hahjat bangâ mihnyan nâng phhekchhah thuktekpa thonghun metne? ngale phâmerôan bâlahma nema khôantoan tet a?

¹⁰ Ngale bankên wanengit kowah hahjat belii mihnyan hehnâng phhekchhah thuktekpa thonghun ekenle? Ngale phâmeroan bâlahma khôantoan tet a?

¹¹ Ngama nenâng bankên lekep junko ngat dangmahhi ngama chenrãngma lejet reken a? Farasi ngale Saduki heh wichhi hehwah jetletma dangen!”

¹² Erediko dijunte hehma pheban nâng rêmthin wichhi kowah taang ngat dangmahhi, rohkomin Farasi ngale Saduki hehma hethôeka niemarang chhih hehwah taangrãng ngaehi ngama jetloat wah.

Piter ma Jisu Ahin Joban Chha ngama Loatjab

¹³ Jisu Kasaria Filipi kêwah hahnâng hûlahma ate dijunte hehnâng ngatwah, “Mihnyan Chha ko mihnyan hehma hen edanga ngama ngaeka?”

¹⁴ Thinma dânthâng wah, “wawathema Jon baptis ngaeho, Ilija ngamemin ngaeho, ngale wawathema Jirimia, erediko hen akomin mõng ngamemin ngaeho.”

¹⁵ Phumma atema thinnâng chhienwah, “Nema chenroh ngaeken a?” “Nema nga hen edangang ngama ngaeha?”

¹⁶ Simon Piter ma dânthâng wah, “Nanga Krista ahîn Joban Chha.”

¹⁷ Jisu ma dânthâng wah, “Jona chha Simon, nanga rangkepte!” “chenrãngma ngako, are toangtang jabkhabpa mihnyan nyuchha hei angem hungwah hongjab dangmoh, rangkhethung wah tôngte Ewa Joban ma nangnâng hongjab thuk eho.

¹⁸ Ngale piter, ngama nangnâng thôkoh eki: “nanga longrã, are longrã khohko ngama nga Asâthem pa ehoan ang, ngale arepa ritchaan memin leta jienmin.

¹⁹ Ngama rangkhethung Hahsông kowah sâbipa nangnâng ekoh e; nangma hahtokkhoh ko chenpa tãng eko, arepa rangkhethung nângmin tângmin, ngale nangma hahtokkhoh ko chenpa letãng dangeko arepa rangkhethung nângmin letãngmin.”

²⁰ Erediko Jisu ma ate dijunte hehnâng atea Krista ngama hennâng min nekthôkoh en ngama ngatwah.

Jisu ma Ate Chêmchei ngale Arit junma Hôngjab

²¹ Ere sanpoat phumma Jisu ma ate dijunte hehnâng laangthôkoh wah, “Nga Jeroselem nâng metkep katmin, phumma khhepho phannang, soam aroakte adong, ngale Niemarang hethôte hehma echêmsiet hang. Nga ritphe ere hang, rohkomin, jârem diko ngakhîn ereang.”

²² Phumma Piter ma sietchhoan lahma Jisu nâng ritngat wah. “Teso! Joban ma arepa ledang thukmin!” ngale “Arepa nangnâng chenthumin ledangmin!”

²³ Jisu ma tokdi litphong lahma Piter nâng ngatwah, “joak! ngatâwah taangchhoan o nanga nga lemnâng tângbâng thukte, chenrãngma ngako nangma are thonghun ekopa Joban wah dangmah, mihnyan hei angem hungwah thonghun eko”

²⁴ Erediko Jisu ma ate dijunte hehnâng ngatwah, “Hen akomin nga demnâng chhoan mehun enko, atedede lekpherii lahma, ate bãngphak pa pelahma nga dijunmin.

²⁵ Chenrãngma ngako, henhenma atedede roandôngpa pêsietrit huneka, erepumma mahphe erea; rohkomin henhenma atedede roandôngpa ngarãng mahphe eka, erehehma echoh a.

²⁶ Nema rangkhen hahtok pa phangtang tachoh letma nedede roandôngpa memahphe enko nema chenni echoh ena?

²⁷ Chen-rãngma ngako, Mihnyan Chhapa ate Wa chaan keplahma rangkhethung wah ngintatte heh demnâng ekara, ngale erediko anga nganâng mâmâ moatlem junko atema thã ekoh a.

²⁸ Ngale ngama nenâng linlin thôkoh eka, Mihnyan Chhapa Lowang danglahma kat lekhe thangma ako leriite mihnyan tongen.”