MATHIU 15 - NIEMNYAN Naga NT (BSI)

Nãngte Nãngwa hehma Hethô wah Niemarang

¹ Erediko Farasi ngale Niemarang hethôte heh Jeroselem wah kalahma Jisu nâng chhienwah,

² “Chenni rãngma nang dijunte hehma nãngte nãngwa hehma hethô wah Niemarang heh lekep re eka? Thinma phhekchhah chhah mako dek senthemthem soanmah!”

³ Jisu ma dânthâng wah, “Nema chenni rãngma Joban nginpa lekep thangma nededema thôeken junko dangekena?

⁴ Chenrãngma ngako, Joban ma aroh ngaeka, ‘Nang nyong nangwa nginkepkep dango,’ ngale ‘henhenma mâmâ nyong awa nâng tem athoak eka, arepa ritphe rêmin.’

⁵ Phumma nema mâmâ nyong awa nâng chohsok thiakpa, ‘Joban nâng lâkohtih’ ngama hethô eken,

⁶ Ephumma thinma thinnyong awa ngin keptumah. Eroh nema Joban nginpa chhihsiet letma nededema thôeken junko songtong eken.

⁷ Ahuhkhoanglep heh! Isaia ma nerãngma profisi hôantahpa toangtang dângwah!

⁸ Joban ma ngaeka, ‘Are mihnyan hehma nganâng thunma loloba soamtô ehang, Phumma thin hungpa linlinko nga tâwah ataangnâng.

⁹ Thinma nganâng soamtô pejô mahto nâng soamtô wak ehang, chenrãngma ngako, thinma mihnyan ma hôaneka niemarang heh nganiem ngarang rãngrãng hethôeka!’ ”

Mihnyan Hung Ngeksiet thin Sêmmak

¹⁰ Erediko Jisu ma mihnyan heh ate tânâng roolahma thinnâng ngatwah, “Tat en, ngale jetlo en!

¹¹ Mihnyan thunko chenni chhahwen eka erepumma niemarang junko ate ngeksiet mah; ate thunwah chenni loatchhoan eka ere pummeba ngeksiet eka.”

¹² Erediko dijunte heh ate tânâng hûlahma Atenâng ngatwah, “Nangma jet ekole, nangma chennijab eko erepumma Farasi heh hungnâng chet reka?”

¹³ Jisu ma dânthâng wah, “Rangkhethung wah Ewa ma lekhiet bãng chentôpa phuphe rêmin,”

¹⁴ “Thinrãngma neksekmah en! thin a mitdoak, ngale mitdoak heh lemsênte; ngale chenthu mitdoak wathema ahan mitdoak lem mesen ako waniinii jongnâng ejâriiwak a.”

¹⁵ Piter ma dânthâng wah, “Are nginpa ninâng senthemthem thôkoh tanhi.”

¹⁶ Jisu ma thinnâng ngatwah, “Nea athângheh min ahan heh noma chhin achhiak dangmetne.

¹⁷ Nema jetmetne? mihnyan thunko chenni chhahwên eka, arepa ate woknâng kaeka, ngale ate phoangwah loatchhoan reka.

¹⁸ Phumma mihnyan thunwah loatjab ekapa ate hungkhen wah loatjabwên era, ngale ere jabkhab pumma mihnyan pa ngeksiet eka.

¹⁹ Chenrãngma ngako, ate hungkhen wah buthi mongthem chhih hongeka, erejunko atema mihritphe, mihtangnyu demnâng kaamchhih moat, ngale lirup kaamchhih moat; mihwahnyen, mothô khoanglep, erediko mihphoang chhihthô.

²⁰ Ereheh meba mihnyan pa ngeksiet eka. Phumma, thinma ngaeka rãngrãng nema deklesoan thangma chhahrãngma mihnyan pa ngeksiet mah.”

Dihiaknyu Putedâlem

²¹ Jisu erethe kowah loatchhoan lahma Tair ngale Sidon hah ngenâng katwah.

²² Ere diaknâng sôngte Kananet dihiaknyu ate tânâng hûlahma raksepwah, “Devit Chha!” “nganâng mammînchen hang! echha dihiaknya sekko juchhih lupeka, phumma nyahrãng cheili chêmeka.”

²³ Rohkomin Jisu ma Atenâng khabthemin rânjabho. Phumma ate dijunte heh ate tâko wãng lahma roatsep wah, “Dihiaknyu pa chienchhoan eko! Atema nãngdidi ko junkhoam lahma are chentôpa chaptin eka!”

²⁴ Ephumma Jisu ma dânthâng wah, “Nga a amahkhôamte saak rãngrãng Isrial mihnyan mahhâm eka heh tânâng loloba chienkat ehang”

²⁵ Ephumma dihiaknyu ma Jisu dathongko khupjup kalahma ngatwah. “Teso, nganâng mamchoh sûhang!”

²⁶ Jisu ma dânthâng wah, “Leta heh phhekchhah pa hu hehnâng joakli dangmah.”

²⁷ Dihiaknyu ma dânthâng wah, “Teso erepete edanga,” “rohkomin thin tângtewa ma jâphe eka chempha heh hu hehma rângchhah a.”

²⁸ Ere diphumma Jisu ma Atenâng dânthâng wah, “Nanga putedâlem dong dihiaknyu! nangma chenni hun eko erepa edang kohho.” Phumma ere sanpoat poatko ate chhapa mewah.

Jisu ma Mihnyan Jahmoang Mesiet

²⁹ Jisu erethe kowah loatchhoan lahma, Galili josi ngenâng katwah. Phumma hahhokho ko kowâng lahma tôngwâng wah.

³⁰ Mihnyan hehma ate tânâng dakò, mitdoak, dekke dake, aba jabmuh, ngale lihân khoanchetma chêmte heh siethû lahma ate dathongko thienhok wah, phumma atema mesiet wah.

³¹ Aba jabmuh jienjab, dekke dake heh sen, dakò heh jienkhoam, ngale mitdoak hehma jienkhe rewah; erepa khelahma mihnyan heh bârit wah; ephumma thinma Isrial heh Joban nâng dangkoh a ngalahma choangpe wah.

Jisu ma Hahjat belii Mihnyan nâng Phhekchhah thuk

³² Jisu ma ate dijunte heh roolahma ngatwah, “Ngama are mihnyan hehnâng nyahrãng mînchen ekang, chenrãngma ngako, nga demnâng jârem lâjohkhoam wakthang, ngale ade phumma thinnâng phhekchhah thin chenmin ahotu. Chenmin lephhek chhahthuk thangma chienchhoan hunmek, chenrãngma ngako thin humnâng wânglemko bôanrit môangrewak a.”

³³ Dijunte hehma Atenâng chhienwah, “Are hahran khokowah aretô mihnyan hehnâng lanle phhekchhah thukroh chenwah phhekchhah chohmin a?”

³⁴ Jisu ma thinnâng chhienwah, “Nenâng bankên chentô tonghèn a?” Thinma dânthâng wah, “Ninâng bankên wanengit, ngale, ngah arinchha heh roanche tonghi.”

³⁵ Ephumma Jisu ma mihnyan hehnâng hahko tongen ngama chienwah.

³⁶ Erediko Jisu ma bankên wanengit ngale ngah heh semlahma Joban nâng dangkoh a ngat rangsoam soamlahma chhupsiet wah, erediko atema dijunte hehnâng kohwah; ngale dijunte hehma mihnyan hehnâng phenkoh wah.

³⁷ Thin chentôma phoatphoat phhekchhah wah. Erediko dijunte hehma bâachâ heh phâengit chõngchõng khôantôan wah.

³⁸ Erekowah phhekchhahte mihnyan heh dihiak ngale leta lechhih heh leweih thangma hahjat belii dângwah.

³⁹ Erediko Jisu ma mihnyan heh chienchhoan lahma, atea khôankhoko chhangka lahma Magadan diaknâng katwah.