MATHIU 13 - NIEMNYAN Naga NT (BSI)

Chhahli Wênte Nginthakthô

¹ Erejâjâko Jisu hum wah loatchhoan lahma josi ngenâng kalahma hahko tonglahma hethô wah.

² Ate tumlit ko khôanhûtah mihnyan heh jahmõang dângjunko khôankhoko chhangkat wah, ngale mihnyan heh jophako chepwah.

³ Jisu ma nginthakthô keplahma thinnâng ajahthem ngin thôkoh wah. Atema ngatwah, “tat en, rekthenâng mihnyan wathema chhahli wênchhoan eka.

⁴ Atema pitnâng chhahli wênko, wanwanthe chhah pa lemkôngko chatjâeka, phumma wo heh hûlahma tuphhek eka.

⁵ Wanwanthe chhahpa longrã khohko chatjâeka. Phumma hahpa alu ledang dângjunko chhahpa sitsiak koat eka.

⁶ Phumma san chaanhông rienrien koatnyan chhahpa sanma ritsah eka; chenrãngma ngako, chhahrin pa alu lesut dângjunko sitsiak choakjâeka.

⁷ Wanwanthe chhahpa suhbuk mongnâng chatjâeka, phumma suhbuk pa donglahma chhahpa tahbuk eka.

⁸ Rohkomin, wanwanthe chhah heh hahsen nâng chatjâ lahma chhahbãng pumma chhahri hongrieka; wanwanthe ma châthe, wanwanthe ma roak erok, ngale wanwanthe ma roakrem chhahri hongrieka.”

⁹ Ngale Jisu ma athôanko, “Nenâng nâ metong hènko tat en!” ngama ngalahma jekthô wah.

Nginthakthô pa chenni rãngma Thôwah a

¹⁰ Erediko dijunte heh hûlahma Jisu nâng chhienwah, “mihnyan heh demnâng jabmîn poatko nangma nginthakthô pa chenni rãngma kep ekoa?”

¹¹ Jisu ma dânthâng wah, “rangkhethung Hahsông nginpa thinnâng ledang nenâng jetthuk rãng kepekãng.

¹² Hen mihnyan ma chenni komin cheieka, ere mihnyan ko ajah lêkohmin, erohkoba atenâng lephang leleng edanga; phumma hen mihnyan nâng chenjô aho dangeka, ere mihnyan kowah atema chenni cheieka erepemin tôanchhoan rêmin.

¹³ Thin demnâng jabmîn poatko ngama nginthakthô kep ekangpa, thinma esûwak a, rohkomin khemah, ngale thinma ejetat wak a, rohkomin jettatmah, ba jetlomah.

¹⁴ Erohwah Isaia mõngma thôtah nginpa thin khohnâng toangtang dangkaera: ‘Are mihnyan hehma chentojô mejetat akomin, lejet tatmin; thinma chentôjô mesû akomin, lejet khemin,

¹⁵ Chenrãngma ngako thinhung thinrin pa batah, thinnâ memin tattumah, ngale mitmemin khetumah. Joban ma ngaeka, ‘Eroh ledang ngako, thin mitma chenkhetah, ngale nâma chentattah, Ngale thin hungma chenjetlotah, ngale ngatânâng chenngak hûwaktha, Joban ma ngaeka, ngale ngama thin chenme siettek.’

¹⁶ “Phumma ne chentô khengraangsen a! nemitma khe eken, ngale nâmemin tat eken.

¹⁷ Ngama nenâng nginlinlin thôkoh eka, ajahthem mõngama hehma ngale toangtang mihnyan hehmemin, nema chenni khe eken a, erepa khehun eka, rohkomin thinma chohkhe mah, ngale nema chenni tat eken a, erepa chohtat huneka, rohkomin thinma chohtatmah.

Jisu ma Chhahli Wênte Nginthakthô pa Ngaksên Thôkoh

¹⁸ “Tat en, chhahli wênte nginthakthô pa chenni nâng thakthô eka, ngale ekowah he en.

¹⁹ Hen akomin rangkhethung Hahsông nginpa chohtat lahma lejetlo dangeka, ere mihnyan heh lemkông nâng chatjâte chhah rãngrãng. Juchhih hûlahma thinhung nâng Joban ngin wêntah heh nyen chhoan eka.

²⁰ Longrã khohnâng chatjâte chhah rãngrãng pa, henma komin Joban nginpa chohtat rienrien khuhah nâhah kepte heh.

²¹ Rohkomin erengin pa thinhung khennâng lulitlit lupmah, erohwah thin lekrõngmah. Erohwah, chenthu Joban jabkhab junma chêmchei ba mihma chêmthukko, thinma lemlienma ethinphea.

²² Suhbuk mongnâng chatjâte chhah rãngrãng heh dangeka, Joban nginpa chohtat lahma hei angem roandông rãng sekmah patritte mihnyan heh, thin hungko chhu alu dânghun pumma Joban nginpa tangbuk eka, erohwah thinma ari hongrimah.

²³ Ngale hahsen nâng wênte chhah rãngrãng heh dangeka, Joban nginpa chohtat lahma jienjet loatte mihnyan heh: wawathe ma châthe, wawathe ma roak erok, ngale wawathe ma roakrem hongri eka.”

Hin Nginthakthô

²⁴ Jisu ma thinnâng ahan nginthakthô min thôkoh wah: “Rangkhethung Hahsông pa arerãngrãng. Mihwa pumma ate pitko chhahli lisen wênkat eka.

²⁵ Jâthe rangpen nâng anga nga jup diko, ran hûlahma chhah heh demko hin johwênthien kolahma ngakchhoan eka.

²⁶ Chhahbãng pa donglahma chhahpo chhahri riiphûngko, hin pemin hôngphoak wah.

²⁷ Ere mihwa haapa wãng lahma Atenâng ngatwah, ‘Tângte, nangma nang pitko chhahli lisen wênwah dangmohne; chenwah are hinheh hongphoak eka?’

²⁸ Atema dânthâng wah, ‘Arepa ran hehma wênhû eka’, phumma haa hehma Atenâng ngatwah, ‘nima hinheh phuphe kaea?’

²⁹ Tângtewa ma dânthâng wah, ‘nekphu pheka en,’ ‘chenrãngma ngako, nema hinheh phuphe poatko chhahmin hinheh demnâng môangjoh phuphe en.

³⁰ Chhah pa mamun munko, chhah ngale hinnii aroamma chendonga. Erediko ngama chhah khente hehnâng hinpa bângphuphe lahma roapkhhek lahma wennâng thhekrãng echien ang. Ngale erediko chhah pa khen lahma pumnâng sekthien rãng ethôkoh ang.’ ”

Jokangken Nginthakthô

³¹ Jisu ma thinnâng eredikomin ahan nginthakthô thôkoh wah: “Rangkhethung Hahsông pa arerãngrãng. Mihnyan wathema jokangken keplahma ate pitnâng wênkat eka.

³² Are jokangken pa chentô wah kenrinthôan, rohkomin ere kenpa mehongphoak tahko chentô noma adongthôan dangeka. Bãng rãngrãng danglahma ate phak hehnâng wo heh memin arup rupeka.”

Wichhi Nginthakthô

³³ Jisu ma eredikomin thinnâng ahan nginthakthô thôkoh wah: “Rangkhethung Hahsông pa arerãngrãng. Dihiaknyu wathema wichhi pa toak roakbelii pheban demko sakmîn lahma pheban pa phangtang mabiet bietja thien eka rãngrãng.”

Jisu ma Nginthakthô Demnang Thôkoh

³⁴ Jisu ma mihnyan hehnâng chentôpa nginthakthô demnâng thôkoh wah; Atema nginthakthô demnâng ledangma chenmin thôkohho.

³⁵ Arepa atema mõng hehma jabtah nginpa toangtang dângrãng moatwah: “Nga thin demnâng jabmînko nginthakthô demnâng ejabmîn ang; Rangbâng hahbâng thuwah lelep jetthin heh ngama thinnâng ethôkoh ang.”

Jisu ma Hin Nginthakthô pa Ngaksên Thôkoh

³⁶ Chenthu Jisu loangchhang pa phethien lahma humkhen nâng lupwângko, ate dijunte heh ate tânâng junwãng lahma Atenâng ngatwah, “Pitwah hin nginthakthô pa chenni nâng ngaeka erepa ninâng ngaksen thôkohhi.”

³⁷ Jisu ma dânthâng wah, “Chhahli lisen wênte pa Mihnyan Chhapa;

³⁸ Pitpa are hahtokkhoh pa; chhahli lisen pa rangkhethung Hahsông nâng tâchoh wângte mihnyan heh; hinpa Juchhih rãng dângte mihnyan heh;

³⁹ ngale hinken wênkohte ranpa joak ajo heh. Chhah pômûn pa rangle hahkho thôan sanpoat pa, ngale chhah munchoan khênte heh Joban ngintatte heh.

⁴⁰ Chenroh hinheh khôanphu lahma wennâng thhek eka, ererãngrãngjô rangle hah thôan sanpoat komin dângmin:

⁴¹ Mihnyan Chhama ate ngintatte heh ate Hahsông khen wah mihnâng pap phoangmoat thukte ngale ahan chentô kaamchhih moatte heh khôansiet rãng echien chhoan a,

⁴² ngale thinma ereheh pap wendô khohko ephekat a, phumma eretheko thin asep nungma pâchupkek lahma etongwak a.

⁴³ Erediko Joban chha heh thin Wa Hahsông theko sanphiak rãngrãng phiak lahma etonga. Nenâng nâ metong hènko arepa tat en!

Ahuhriem wah Ngun Nginthakthô

⁴⁴ “Rangkhethung Hahsông pa arerãngrãng. Mihnyan wathema pitnâng huhriem wah ngun choh eka. Phumma atema erepa ngak huhriem lahma, nyahrãng rinroan bahsa wãng lahma ate chhahkhem chentô heh sengwâng wah, ngale erediko atema ngakka lahma ere pitpa riieka.

Litpha Nginthakthô

⁴⁵ “Rangkhethung Hahsông pa arerãngrãng min dângmin. Mihnyan wathema litpha phasen lemeka,

⁴⁶ Chenthu tema asenthôanpa mechohtahko, chhoan lahma ate chhahkham heh phangtang senglahma ere litphapa riieka.

Chaak Nginthakthô

⁴⁷ “Rangkhethung Hahsông pa arerãngrãng min dângmin. Ngahloatte mihnyan pumma ate chaakpa josiko hatkat lahma jatrup ngah loeka.

⁴⁸ Chaakko mênchong memen tahko, thinma bamko chaakpa sietwên lahma, hahko tonglahma ngah heh renwak eka: asen senpa thin tõngko sekwak eka, ngale achhih chhihpa petphe rewak eka.

⁴⁹ Rangle hah thôan sanpoat komin erohjô dângmin: rangwah Joban ngintatte heh chhoan lahma mihnyan chhih heh mihnyansen chhang wah ekhôansiet a

⁵⁰ ngale ereheh pap wendô khohko ephekat a, enâng thin asep nungma pâchupkek lahma etonga.

Toangtang Nyan ngale Toangtang pa

⁵¹ “Nema are heh jet ekenle?” Ngama Jisu ma thinnâng chhienwah. Thinma, “Jet eki” ngama dânthâng wah.

⁵² Ephumma atema thinnâng dânthâng wah, “Are ngaeka pa chentô, niemarang hethôte hehma rangkhethung Hahsông dijunte rãng dangwak eka, erepa hum tângte wama ate pum wah chhahkhem anyan ngale apã aroamma loatsiet rãngrãng dangeka.”

Nazarat nâng Jisu Thãsê

⁵³ Jisu ma nginthakthô heh tathô kolahma erethe kowah loatchhoan wah

⁵⁴ ngale ate songtah hahdaangko ngakhok wah. Atema Sanagog nâng hûlahma hethô wah, ngale ate ngin chohtatte heh bârit rewakwah. Thinma thôngphâ wah, “Atema are ngin ariat pa chenko wah chohjet eka?” “ngale are patritli moatlem heh chenroh jienmo eka?

⁵⁵ Atea khoangtekte chha ledangne? Mariam pa ate nyong ledangne? ngale Jems, Josep, Simon, ngale Juda heh ate naa ledangne?

⁵⁶ Ate naa dihiaknya heh anângwah sôngte heh ledangne? phumma atema are chaanpa chenwah choh eka?”

⁵⁷ Ere diphumma thinma ate thãsê wah. Jisu ma thinnâng dânthâng wah, “Mõng pa chentô thenâng toaksân wakeka, rohkomin thinnok ahah ngale ate humkâ kololoba toaksân mah.”

⁵⁸ Thinma leputedâlem junko, atema enâng ajahthem patritli moatlem moho.