LUK MA RAANGWAH NGINKONGSEN 5 - NIEMNYAN Naga NT (BSI)

Jisu ma Khebângthôan Dijunte Roo

¹ Jâthe Jisu Ginisarat Josi kêmko cheplahma dângko mihnyan hehma atewah Joban ngin jetatrãng thinmîn lahma ate tânâng wângwah.

² Atema jophako khôankho phangnii sietthien lahma khewah; Ngahloatte heh khôankhopa phethien lahma thinchaak setphe lahma dângwah.

³ Phumma Jisu khôankho phangthenâng chhangwângwah - ere khôankho pa Simon thiak dângwah - ngale atema Simon nâng khôankho pa jopha kowah roanchhe taangthin kathang ngama ngatwah. Phumma Jisu khôankhoko tonglahma mihnyan hehnâng hethô wah.

⁴ Chenthu Jisu ma mihnyan hehnâng thôkoh diko, atema Simon nâng ngatwah, “Khôankhopa roanchhe jolunâng thoamkat hang, ngale nang erediko nang lemru nekhuma nechaak pa hatkat en.”

⁵ Simon ma dânthâng wah, “Hethôte,” “Nima penliangma phoanghattih rohkomin chenjô chohhatmih. Phumma nangma aroh menga oko, ngama nga chaakpa hatkat ang.”

⁶ Thinma hatkattah pa chaakjô lankhajâroh ngah jahmõang chohhatwah.

⁷ Ephumma khôankho han wah thinlemru hehnâng chohsûkahi ngama dekma jepwên wah. Thin lemru heh kalahma khôankho wanniinii joko lânthumjâroh ngah chõngchõng loatwah.

⁸ Chenthu Simon Piter ma arepa kheko, Jisu mathahko dakuhtho lahma khupjup lahma Jisu nâng ngatwah, “Teso! ngatâwah chhoan o, chenrãngma ngako nga a papi mihnyan!”

⁹ Thinma ngah jahmõang chohloat phumma Simon piter ngale ate demwah heh phangtang bâritwah.

¹⁰ Simon lemru Zibidi chha Jems le Jon niimin bâritwah. Jisu ma simon nâng ngatwah, “Nekchei; ade phumma nanga mihnyan loatte dângmin.”

¹¹ Thinma khôankho pa jophako sietwên wah, ngale thinma chentôpa phethien lahma Jisu didiko junchhoan wah.

Jisu ma Mihwa Wathe Mesiet

¹² Rekthenâng Jisu wanthe hahdaang nâng dângwah, ere hahdaangko angêm khoanchetma nyahrãng chêmlahma mihwa wathe dângwah. Chenthu atema Jisu kheko, atedede khupjup lahma Jisu nâng roatsep wah, “Hethôte, nangma mehun oko, nangma nga tasâsiet hang!”

¹³ Jisu ma ate dekpumma mihwako sahlo lahma ngatwah, “Ngama sâsiet huneki,” “Sâo!” phumma lemlienma mihwa kowah khoanchetpa sâwah.

¹⁴ Jisu ma atenâng ngatwah, “Mihnâng hennâng min nekthôkoh, soam aroakte tânâng tintin wângo ngale nangdede atenâng kherii wãngo; erediko anga ngama nanga angêm khoanchet wah lâsâtoh ngama jetrãng Mosa Niem junkowah soam aroak thinpa kohwên o.”

¹⁵ Rohkomin Jisu nginpa mihnyan hehma ajah jahba tatwah, ngale jahmõang mihnyan heh Jisu wah nginpa jetat erediko khoanchet hehwah sênrãng ngama hokwah.

¹⁶ Rohkomin mihnyan henjô aho thenâng Jisu rangsoam rãng chîchhoanwah.

Jisu ma Kôasôte Mihwa Sênsiet

¹⁷ Jâthenâng Jisu ma hethô poatko, Galilijaa chentôwah, Judia, ngale Jeroselem wah hûlahma Farasi ngale Niemarang hethôte heh tônghokwah. Ngale Jisu nâng khoanchette heh mesietrãng Teso wah chaanpa kohwah.

¹⁸ Mihnyan khuthema jupthinko kôasôte pelahma hokwah, ngale thinma humkhen nâng pewên lahma Jisu tâko thienhokrãng hunwah.

¹⁹ Mihnyan heh jahmõang dângjunko thinma humkhen nâng jienpewên ho. Ephumma thinma humkho nâng pewên lahma, suptok khopa rapdoak lahma, ate jupthinko jupthuk lahma mihnyan heh mongtung pumma Jisu tâko waangphe katwah.

²⁰ Jisu ma thinnâng putedâlem pa ajah khelahma, atema mihwako ngatwah, “Ngalemruchha, nangpap heh map lâkohtih.”

²¹ Niemarang hethôte ngale Farasi hehma thindede thonghunwah, “Joban thãsê jabkhab jabte are mihnyan pa hen a! Joban ma loloba pap heh map tâkohmin!”

²² Jisu ma thinhung nâng thonghun ekapa jetlahma thinnâng ngatwah, “Nehung nâng arerãngrãng heh chenrãngma thonghun eken a?

²³ Chenroh ngatpa ala a, ‘Nang pap heh map lâkohtih,’ ngama ngatpa ala ale, ‘Toanchep lohma khoam o’ ngama ngatpa ala a?

²⁴ Mihnyan Chha nâng are hahtokkhoh ko pap map kohrãng chaanwin, ngama nenâng ekhesok a.” Ephumma atema kôasôte mihwako ngatwah, “Ngama nangnâng chien eki, toanchep lohma nang jupthin pelohma humnâng wãngo!”

²⁵ Lemlienma mihwapa mihnyan heh tâkowah toanchep lahma ate juptah jupthinpa toanpe lahma Joban nâng rôlahma humnâng wângwah.

²⁶ Mihnyan heh phangtang nyahrãng bâritwah! ngale nyahrãng chei lahma Joban nâng rôwah, thinma ngatwah, “Thejâ nãngma chentô patritli chohkhe ekia!”

Jisu Ma Livi Roo

²⁷ Arediko Jisu loatchhoan lahma thãkho thâte ate mînpa Livi ate Ofic ko tonglahma khewah. Phumma Jisu ma atenâng “Ngadijun hang” ngama ngatwah.

²⁸ Phumma Livi toanchep lahma chentôpa phethien lahma Jisu dijunwah.

²⁹ Erediko Jisu nâng Livima ate humko phhekdong chhahdong ngetwah, ngale jokphhek chhahrãng rootah mihnyan heh chhangko thãkho thâte heh jahmõang dângwah, ngale mihnyan ahan hehmin dângwah.

³⁰ Thin demwah Farasi ngale Niemarang hethôte hehma Jisu dijunte hehnâng ngatwah. “Nema thãkho thâte ngale papi mihnyan heh demnâng chenrãngma roam phhekchhah eken a?.”

³¹ Jisu ma thinnâng dânthâng wah, “Khoanchet hote mihnyan ma doktor lemmah, khoanchette mihnyan hehma loloba doktor lemeka.

³² Ngama mihnyansen heh hunglitrang roorãngkat dangmek, papi mihnyan heh roorangba kaerâng.”

Lephhek Lechhah thangma Rangsoam rãngma Chhien

³³ Mihnyan khuthema Jisu nâng chhienwah, “Jon dijunte hehma roantang phhekchhah lechhah thangma rangsoam eka, ngale Farasi heh dijunte hehmemin erohjô soam eka; rohkomin nang dijunte heh jokphhek chhahroh re eka.”

³⁴ Jisu ma dânthâng wah, “Nemnyan wapa thin demnâng tôngpoatko nemnyansiet thinnâng jokphhek chhahrãng hûeka mihnyan heh chenjô lephhekchhah thangma etonga ngama thonghun eken a? Eroh tongmah!

³⁵ Rohkomin nemnyan wapa thin demwah sietchhoan rangwo ehûra, erediko ba thinma lejok lechhah thangma etonga.”

³⁶ Jisu ma are nginthakthô pemin thinnâng thôkoh wah: “Nema khetpã khohko petphinrãng khetnyan pa chiensietmet. Atema eroh mechiensiet ako, atema khetnyan pa chiensiet eka, phumma khetnyan chhuppa khetpã ko petphinrãng lesenmin.

³⁷ Roh akole henma akomin angurti anyan pa angurti thòpã ko ekien en a, chenrãngma ngako angurti anyan pumma angurti thòpã pa poakthuk erea, phumma angurti pa jenchhoan erea ngale thòpa chhihjâ erea.

³⁸ Erenoma, angurti anyan pa thònyan ko kienmin!

³⁹ Ngale henmemin angurti apã jokdiko angurti anyan jok lehun tumin. Chenrãngma ngako, nema ‘Apãpa asen,’ ngama ngaeken.”