LOATKHESOK 7 - NIEMNYAN Naga NT (BSI)

144,000 Isrial Mihnyan heh

¹ Arediko Ngama rangkhethung wah Joban ngintatte wabelii pa hahtokkhoh sukbelii ko cheplahma sukbelii ngewah hahtokkhoh ko pongwut hûeka pa hahtokkhoh nângmin, erediko josi nângmin ngale chenni bãngachhong hehmin nekchenmet eka ngama tãngthin lahma khewah.

² Ngale sankat ngewah ahan rangkhethung wah Joban ngintattema ahîn Joban mîn tûngthin pa semlahma kalahma wîenkhe wah. Joban ma hahtokkhoh ngale josi heh chhihsietrãng chaan kohtah Joban ngintatte wabelii ko chaanmõang rakroowah.

³ Ngintatte pumma ngatwah, “Nima Joban haa hehnâng thin khengko Joban mînpa matungtung ekiko nema, hahtokkhoh ngale josi erediko bãngachhong heh nekchhihsiet en.”

⁴ Ngale khengko Joban min tûngte mihnyan heh 144,000 dângmin ngama thôkoh wah. Thin a echhi jatnii Isrial mihnyan hehwah dângmin,

^5-8 Chentô jat wah echhi hahjatniiru dângwah: Juda, Riuben, Gad, Asher, Napthali, Manasi, Simion, Livi, Isekar, Zibulun, Josep, ngale Banjamin jat hehwah dângwah.

Lephang Weihtô Loangchhang Dong

⁹ Arediko Ngama sûtekpa, loangchhang dôngmõang khewah - ere mihnyan heh henmemin lephangleng roakweihtô dângwah! Thin a chentô mihnyan nyuchha jat apat, diak akan, jab ajâ, hehwah dângwah, ngale thin a khetpo pa kep ngale thin dekko pam bãngdek heh semlahma Saakchha tôngthin mathahko cheplahma dângwah.

¹⁰ Thinma chaanmõang rakwah: “Nãng Khope pa tôngthin kowah tôngte nãng Joban ngale Saakchha ngewah kaera!”

¹¹ Rang-khethung wah Joban ngintatte chentô heh, khhepho phannang heh, ahîn ngem wanbelii heh, tôngthin tumlitko chepwah. Erediko thin dedema tôngthin mathahko thhen pa hahko kunkat lahma khupjup lahma soamtô wah,

¹² thinma ngatwah, “Amen! Rô, mîndông, buthi mongthem, dangkoh a ngat, toak asân, chaan ahang, ngale chentô chaan ahang pa roantang roangjêng rãng nãng Joban ngenâng tonga ngama ngatwah! Amen!”

¹³ Khhepho phannang hehwah wathema Nganâng chhienwah, “Are khetpo kepte mihnyan heh hen a, ngale thin a chennge wah hûera?”

¹⁴ Ngama dânthâng wah, “Hethôte, Ngama jetmek, nangma jet ole.” Atema Nganâng ngatwah, “Are mihnyan heh dangeka thinma nyahrãng cheli chêmchoh lahma khope lahma wângte mihnyan heh. Thinma thin khet pa Saakchha heinâng lâposettah.

¹⁵ Eroh-wah thinma Joban tôngthin mathahko cheplahma atenâng rangwo rangnyek ate rangsoam humko soamtô eka. Tôngthin kowah tôngte pumma thin demnâng danglahma epesiet a.

¹⁶ Thin chenthumin rêm lerii tumin, ngale jolânmin lerii tumin; san memin ngale chenni akhamli mejô thinnâng lekham tumin,

¹⁷ chenrãngma ngako tôngthin mongtang kowah tôngte Saakchha pa thin sokarete dângmin, ngale thinma Saakchha ma roandông chohthin jomitko esiethûa. Ngale thinmit wah chentô mitphi heh Joban ma ehutphe koh a.”