LOATKHESOK 21 - NIEMNYAN Naga NT (BSI)

Rangkhethung Nyan le Hahtokkhoh Nyan

¹ Erediko Ngama rangkhethung nyan le hahtokkhoh nyan pa khewah. Khebeng wah rangkhethung le khebengwah hahtokkhoh nii amahjâ rewah, ngale josi hehmin amahjâ rewah.

² Ngale Ngama Asâthôan Hahdaang pemin khewah, erepa nemnyannyu pa ate tangwa demnâng chohmînrãng rângsôa arãngrãng sôa lahma Jeroselem nyan pa rangkhethung wah Joban tâwah jâka lahma khewah.

³ Ngama tôngthin kowah chaanmõang rakjab katlahma tatwah: “Ade phumma Joban humkâ pa mihnyan heh demnâng lâdangtah! Atea thin demnâng ejohsonga, ngale thinmin Joban mihnyan edanga. Joban atedede min thin demnâng ejohdanga, ngale atea thin Joban edanga.

⁴ Joban ma thinmit kowah mitphi heh ehunphekoh a. Ereko aritmin lerii tumin, sep ajoang, ngale chet akhup min ahotu dângmin. Apã heh lâmah jâtah.”

⁵ Erediko tôngthin kowah tôngte pumma ngatwah, “Ngale ade phumma Ngama chentôpa anyan rãng lâhôantek!” Atema Nganângmin ngatwah, “Arepa raango, chenrãngma ngako are jabkhab pa toangtang ngale dâlemli thôan jabkhab.”

⁶ Ngale atema ngatwah, “Arepa lâta dangtah! Nga a khekhothôan, ngale khedithôan, abengthôan ngale athôanpa. Henhen jolan riieken a, ereheh nâng Ngama thãhoma roandông chohthin jo ejokthuk ang.

⁷ Henhenma tajien eka erehehma arepa Nga ngewah chohmin: Nga a thin Joban edangang, ngale thinmin Ngachhu Ngachha edangwak a.

⁸ Rohkomin chephoat, mihchen sengte, kaamchhih moatte, mihritphete, dihiak dela kaamchhih moatte, jâdu hôante, moang nâng soam atôte, ngale chentô mothô khoanglep heh - thin tôngthin thepa salfar demnâng wendô ekako tôngmin, erepa thinrãng depnii rãng ngakrit pa dângmin.”

Jeroselem Nyan

⁹ Wanengit ngintatte hehma wanengit titko athôan wah khoanchet heh chongchong sêmte hehwah Ngatânâng wathe kalahma ngatwah, “Wãngro, Ngama nangnâng Sakchha tangnyu nemnyannyu pa khesok e.”

¹⁰ Jupa Nga demnâng danglahma ngintatte pumma Nga a nyahrãng hahkong choangthôan khonâng sietwênwah. Atema Nganâng Asâthôan Hahdaang Jeroselem pa rangkhethung wah Joban tâwah jâka lahma khesokwah

¹¹ ngale Joban phiak pumma phiakjâ lahma dângwah. Ere hahdaang pa thãchaan jat long, jaspar rãngrãng phiak lahma dângwah, erediko sîsa khenwah jokhîn rãngrãng dângwah.

¹² Ere hahdaangko pan dôngmõang ngale chôangmõang dângwah, erediko pankâsek echhi wannii dângwah, ngale ere echhi wannii pa ngintatte echhi wanii ma bemlahma dângwah. Pankâsek hehnâng Isrial mihnyan hehwah echhi jatnii mînpa raanglahma dângwah.

¹³ Chentô ngeko pankâsek wanremru dângwah: sankat ngenâng wanrem, jome ngenâng wanrem, jokuh ngenâng wanrem, ngale sannyup ngenâng wanrem dângwah.

¹⁴ Hahdaang panpa echhi wannii longphang khohnâng hôanwah, ereheh khohko Saakchha moattat chhoante echhi wanii hehmîn raanglahma dângwah.

¹⁵ Nga demnâng jabmînte ngintatte ngeko hahdaang, ngale pankâsek heh erediko pan heh thakrãng kemwah hôanwah athakthin ke dângwah.

¹⁶ Hahdaang pa jêng akha tumlit nyahrãng tôde dângwah. Ngintatte pumma ere hahdaang pa ate ngewah athakthin ke pumma thakwah: ere hahdaang pa ajêngnâng hahjatthe châbangâ meejêng dângwah, ngale akha erediko achôang pemin ajêng tôjô mãnthe dângwah.

¹⁷ Ngintatte pumma pan pemin thakwah, ngale erepa 216 fut achôang dângwah, atema thak junko eretô dângwah.

¹⁸ Panpa jaspar longwah hôanwah, ngale hahdaangpa alinlin kemwah sîsa rãngrãng khînriri hôanwah.

¹⁹ Hahdaang pan hôanrãng thieneka long heh rongrup thãchaanjat long hehma raangapaang lahma dângwah. Khebengthôan longpa jaspar ma hôanwah, eredikowah pa Safira ma hôanwah, eredikowah pa agate longma hôanwah, eredikowah pa Imerald longhinjat dângwah,

²⁰ ngale onix, Karnelian, amien jat quart, beril, topaz, Kalsidoni, turkoise, ngale athôan kowah pa amithist ma hôanwah.

²¹ Pankâsek echhi wanniipa litpha echhi phanii heh; chentô pankâsek heh litpha pharu ma hôanwah. Hahdaang kowah lemheh alinlin kemma hôanwah, ngale sîsa rãngrãng alienkhe dângwah.

²² Ngama ere hahdaangko rangsoamhum kheho, chenrãngma ngako, erekowah rangsoamhum pa Teso Joban Adongthôan ngale Saakchha jôba rangsoamhum rãng dangeka.

²³ Ere hahdaangko phiakrãng san ngale dâmin lemmah, chenrãngma ngako, Joban phiak pumma ere hahdaangko phiak eka, ngale Saakchhapa wentit rãngrãng dangeka.

²⁴ Hahtokkhoh wah mihnyan heh ere phiakko ekhoamwak a, hahtokkhoh wah lowang hehma thin ngun akem heh ere hahdaangko ekep hûa.

²⁵ Ere hahdaang kowah pankâsek heh rangwo roakweih laanglaangjû edanga; ereheh chenthumin lesekmin, chenrãngma ngako, ere hahdaangko rangnyek aho dângmin.

²⁶ Chentô diak akan hehwah dongaleng ngale ngun akem techhu heh ere hahdaangko kephokmin.

²⁷ Roh-komin ere hahdaangko ngek atek chenjô leta hûmin, ba rêsêli kaamchhih moatte ngale mothô khoanglep thôte hehmin leta hûmin. Henhen mînpa Saakchha ngewah ahîn titabko raangeka ere mihnyan heh loloba ere hahdaangko tâhokmin.