LOATKHESOK 20 - NIEMNYAN Naga NT (BSI)

Hahjatthe Rangpâ

¹ Erediko Ngama rangkhethung wah ngintatte ate dekko chenthumin leta thôanthin hahkenlu ko katthin sâbi ngale janru dong semlahma kalahma khewah.

² Atema dragon pûchhih, rangbeng hahbeng thuwah pû - erepa, juchhih nâng ngaeka, ba Joak ajo heh hahjatthe rangpâ rãng janruma khhekthien eka.

³ Ngintatte pumma chenthujô leta thôanthin hahkenlu ko phekat lahma kâsek pumma tangsek lahma têngmiem wah, erohkoba hahjatthe rangpâ malien lienko atema hen diak akanjô leta diapchhah edanga. Erediko atema amãnchha rãng elaangphea.

⁴ Erediko Ngama tôngthin heh khewah, ngale tôngthinko tôngte mihnyan hehnâng arên rãng chaan kohwah. Eredikomin Jisu ma loatsiettah toangtang ngin phoangthôte mihnyan ngale Joban jabkhab phoangthôte mihnyan ritphetah Ju hehmin khetek. Thinma ngemchhih ngale ate moang hehnâng soamtô mah, ngale thinma thin kheng nâng ngale dek hehnâng ngemchhih nemboat hehmin tungmah. Thin ngakhin lahma Krista demnâng Lowang rãngrãng danglahma hahjatthe rangpâ pên eka.

⁵ (Ahan riichoante mihnyan heh ere hahjatthe rangpâ pa malienlien kako ngakhin mah.) Arepa aritwah khebeng ngakhîn wângpa.

⁶ Khuhah nâhah ngale ajahthem rangkepte mihnyan heh are khebeng ngakhînko johngakhînte mihnyan heh dângmin. Ere mihnyan heh ditnii lethe ngakrii tumin; thin a Joban ngale Krista rãngma soam aroakte edanga, ngale thinma ate demnâng hahjatthe rangpâ ejohpên a.

Joak jienrit

⁷ Hahjatthe rangpâ pa liendiko, joakpa phâtek khenwah laangphe eka,

⁸ ngale atema phoangchhoan lahma hahtokkhoh wah phoangphan chhoan eka diak akan heh ephoang diapphhek chhah a, erepa Gog ngale Magog ngama ngaeka pa. Joak ma jophawah seheh jahtô phangtang ranloatmîn rãng ekhôansiet a.

⁹ Thin hah phangtang nâng menchhoan lahma Joban mihnyan heh nok ahah, ngale Joban ma huneka hahdaang heh ekoamwak a. Rohkomin rangkhethung wah wen jâka lahma thin jemkham wakeka.

¹⁰ Thin diapchhahte juchhih pa ngemchhih ngale mõngmõang heh phekat tah wen ngale salfar ko phekat eka; ngale ereko roantang roangjêng rãng rangwo rangnyek echêmriia.

Athôan Ren

¹¹ Erediko Ngama tôngthin po dôngmõang ngale ere tôngthinko tôngtepa khewah. Hahkho ngale rangkhopa ate tâkowah huhchhoan lahma lechoh khetu mahchhoan wah.

¹² Ngale Ngama riichoante heh adong arin khoakthema phangtang tôngthin mathahko cheplahma khewah. Eko titab heh lakwah, ngale erediko titab ahan hehmin lakwah, ahîn titab pa lakwah. Riichoante mihnyan heh thinma chenroh molahma titab nâng raangthientah a erejunko rênwah.

¹³ Erediko Josi hehmemin thinwah aritte mihnyan heh kohwah. Arit ngale rit amah hehmemin thinma thientah aritte mihnyan heh kohwah. Ngale chentôpa henma chenroh motah a erejunko rênwah.

¹⁴ Erediko arit ngale rit amah heh wennâng phekatwah. (Are wenpa depnii thêrit pa.)

¹⁵ Henhen mînpa ahîn titab nâng leraangthien dangeka ere mihnyan heh wennâng phekatwah.