LOATKHESOK 19 - NIEMNYAN Naga NT (BSI)

¹ Erediko Ngama rangkhethung nâng jahmõang mihnyan rak akak rãngrãng tatwah, thinma ngatwah, “Joban nâng rôe! khope, mîndông ngale chaan ahang heh nãng Joban thiak!

² Atema toangtang ngale khôalemko ren eka! Erediko hahtokkhoh wah mihnyan heh ate demnâng kaamchhih mothuk lahma chhihsiette dihiaknyu komin Joban ma chêmthuk eka. Dihiaknyu pumma Joban haaheh ritphedi Joban ma atenâng chêmthuk eka.”

³ Eredikomin thinma rakwah, “Joban nâng rôe! Hahdaang dongthôan jemkham eka wenkhuh pa roantang roangjêng rãng rangkho nâng khuhwên eka!”

⁴ Roaknii wabelii khhepho phannang heh erediko ahîn ngem wanbelii heh Joban mathahko khupjup lahma tôngthin kowah tôngte Joban ko soamwah. Thinma ngatwah, “Amen! Joban nâng rôe!”

Saakchha Nemnyansiet Kuhhôan Phhekchhah

⁵ Erediko tôngthin kowah aroh jabkhab hôngloat jabwah, “Joban nâng rôe, ate haa chentô hehma, ngale chentô mihnyan nyuchha hehma, adong arin, anga nga Joban ran cheite hehma Joban nâng rôe!”

⁶ Erediko Ngama jahmõang mihnyan heh jab rãngrãng tatwah, ngale longchhakwah jo jâjen katko rahwah rãngrãng tatwah, ngale rangmok rangphakwah rãngrãng tatwah. Thinma, “Joban nâng rôe! ngama ngawak lahma tatwah. Chenrãngma ngako, Teso nãng Joban Adongthôan pa Lowang! ngama ngawak lahma tatwah.

⁷ Nãngkhu khuhah nâhah ngale rinroan bahsa dange; Nãngkhuma ate adongthôanpa rôe! Chenrãngma ngako Saakchha nemnyansiet sanpoat pa lâhûtha, ngale ate rãngma ate nemnyannyu ma atedede khoakhemrii eka.

⁸ Nemnyannyu ko atema keprãng khetpo asâ koheka.” (Khetpo ngaeka pa Joban mihnyan hehma moatlemsen moeka hehnâng ngaeka.)

⁹ Erediko ngintatte ma Nganâng ngatwah, “Arepa raango: Henhen pa Saakchha nemnyansiet kuhhôan phhekchhah nget ekako rooeka mihnyan heh rangkepte dângmin.” Ngale eredikomin ngintatte pumma ngatwah, “Are jabkhab heh a Joban ma jabwah toangtang jabkhab.”

¹⁰ Ngama atenâng soamtô rãng ate dathongko khupjup wah, rohkomin atema Nganâng ngatwah, “Aroh nekmo! Ngamin nang rãngrãng erediko putedâlemte mihnyan ahan, ngale Jisu ma loatsiet eka hehnâng toangtangko rongtêngtêng danglahma tôngte heh rãngrãng haa jôba. Joban nângba soamtô o!” Chenrãngma ngako, Jisu ma loatsiet eka toangtang junma Mõng heh Joban ngin phoangthô rãng chaan choh eka.

Mok Khohko Chhangte

¹¹ Erediko Ngama rangkhethung pa laang lahma khewênwah, ngale ereko Mok po dângwah. Mok po khohko chhangte pa Putedâlemsen ngale Toangtang dângwah; atema toangtangko ren eka ngale toangtangko ranloatmîn eka.

¹² Ate mitpa wentheli rãngrãng dângwah, ngale atema ate khoko khaphok heh jahmõang phokwah. Ate khohko mînraang lahma dângwah, rohkomin ere mînraang ekapa henmemin jetmah, atema lolo jetwah.

¹³ Atema poh eka khetpa hei lolo dângwah. Ngale ate mînpa “Joban Jabkhab” ngama dângwah.

¹⁴ Rangkhethung wah sipâhi heh ate diko Mok po ko chhang lahma khetpo asâ heh keplahma junkhoam wah.

¹⁵ Ate thunkâ kowah deng nahmõang hôngkatwah, ere deng pumma atema chentô diak akan heh jieneka. Atema thin khohko janke semlahma epên a, ngale khemkoakthin koannâng angur khihlitwah rãngrãng Adongthôan Joban nyahrãng rinkhah thunko ekhihsiet a.

¹⁶ Ate khetko ngale ate da komin raanglahma dângwah: Ere mînpa “Lowang kowah Lowangdong thôan, ngale Teso kowah Teso dongthôan.” Ngama raangwah.

¹⁷ Erediko Ngama ngintatte pa san khohko cheplahma khewênwah. Atema rangtung siwa wah phoangpukte wo hehnâng chaanmõang raklahma ngatwah: “Hûnren ngale aroamma Joban ma phhekdong chhahdong nget ekako roamphhek chhah e!

¹⁸ Hûren Lowang heh ngempa phhek hûren, sipâhi sahhabdong heh ngempa phhek hûren, ngale sipâhi heh, erediko Mok ngale mok khoh kowah chhangte mihnyan, mihnyan nyuchha, haaheh, haa ledangte, erediko adong arin anga nga mihnyan heh ngempa phhek hûren!”

¹⁹ Erediko Ngama ngemchhih ngale hahtokkhoh wah lowang heh erediko thin sipâhi heh Mok khoh kowah chhangte ngale ate sipâhi heh demnâng loatmîn râng khôan lahma khewah.

²⁰ Ngemchhih pa phâtek nâng loatkhhek wah, ngale ate demko ate mathah kowah patritli moatlem moatte mõngmõang hehmin phâtek nâng johloatkhhek wah. (Ere patritli moatlem moeka pumma Ngemchhih namboat tûngte ngale ngemchhih moang nâng soamte mihnyan heh diapchhahwah.) Ngemchhih ngale mõngmõang heh wanniinii ahînma Salfar demnâng kham eka wenko phekatwah.

²¹ Thin sipâhi heh Mokkhoh kowah chhangte thunka kowah loatka era deng pumma ritdoakwah; ngale chentô wo hehma chentô taphhek eka eretô thinmang heh phhekwah.