LOATKHESOK 13 - NIEMNYAN Naga NT (BSI)

Ngemchhih Wannii

¹ Erediko Ngama ngemchhih pa josi wah loatwãng lahma khewah. Ere ngemchhih ko rong kaechhi ngale kho phangengit dângwah; ate rong chentô nâng khophokwin dângwah, ngale ate kho chentô nâng Joban nâng dûmmek lahma mînraangwin dângwah

² Ngemchhih pa rusah rãngrãng dângwah, ngale dapa sepba da rãngrãng dângwah, ngale thunpa sahdong hinhoo thun rãngrãng dângwah. Pûchhih pumma ngemchhih ko ate chaan, ate tôngthin, ngale ate chaan ahang heh phangtang kohwah.

³ Ngemchhih kowah khophang wanthe pa nyahrãng maksakdong chohlahma chetwawa buhritwah rãngrãng dângwah, rohkomin mâmãn pa mechoan dângwah. Phumma hahtokkhoh phangtang nyahrãng barii lahma ngemchhih diko junkhoam wah.

⁴ Anga ngama pûchhih ko soamtô wah, chenrãngma ngako, atema ate chaanpa ngemchhih hehnâng kohwah. Thinma ngemchhih hehnângmin soamtô lahma ngatwah, “Ngemchhih rãngrãng hen tonga? ngale ate demnâng hen tâloatmîn min a?”

⁵ Ngemchhih ko nyahrãng ngam poapoa Joban nâng dûmmek thãsê jabkhab heh jabthukwah. Ngale eroh pa atenâng roakbelii jengnii rãng dângthukwah.

⁶ Atema Joban nâng tem athoak, Joban mînko tem athoak, ngale Joban sôngthin the, erediko rangkhethung nâng chentô tongeka ereheh nângmin têm athoak wah.

⁷ Atenâng Joban mihnyan heh demnâng loatmîn lahma Joban mihnyan heh jienrãng chaan kohwah, ngale atenâng chentô jat apat, diak akan, ngale jab ajâ, ngale chentô mihnyan nyuchha heh khohko pênrãng chaan kohwah.

⁸ Hahtokkhoh wah sôngte chentô mihnyan hehma atenâng esoam a, rohkomin rang ahah hôan mama henhen mînpa ahîn titab nâng raangthientah a, ngale henhen pa ritphe retah Saakchha rãng dângtea erehehma loloba lesoam edanga.

⁹ “Erohwah nenâng nâ metong hènko tat en!

¹⁰ Henhen loatritmin a, ereheh metkep eloriia; Ngale henhen dengnâng ritdoak ritmin a, ereheh metkep dengnâng erit doakriia. Arepa Joban mihnyan hehma tadô letma Joban nâng senthemthem putedâlem rãng thôkoh eka.”

¹¹ Eredikomin Ngama ahan ngemchhih wîenkhe wah, erepa hahkhen wah hongwãng lahma khewah. Atenâng saakchha rong rãngrãng rong kanii dângwah, ngale atema pûchhih jablele jabwah.

¹² Atema khebengwah ngemchhih chaan ahang dong heh phangtang kepwah. Atema hahtokkhoh ngale hahtokkhoh wah sôngtôngte mihnyan chentô hehnâng khebengwah mâ mechoan ngemchhih ko soamtô rãng metloatwah.

¹³ Are khedi kowah ngemchhih pumma patritli moatlem heh nyahrãng dôngmõang moatwah; atema anga nga mitkheko rangkhethung wah hahtokkhoh ko wen jâsietkat lahma khesokwah.

¹⁴ Ngale atenâng khebengwah ngemchhih mathahko patritli moatlem mothuk eka heh junko hahtokkhoh wah sôngte mihnyan heh phangtang diapchhahwah. Ngemchhih pumma thinnâng khebengwah dengma doakchoan ngemchhih rohkomin ahîn ere ngemchhih ko soamrãng ate moang hôanrãng chienwah.

¹⁵ Khedi kowah ngemchhih ko ama wah ngemchhih moangko rekma metlahma hînmet rãng chaan kohwah, ephumma ere moang pumma jab jienjabwah, ngale henhenma atenâng lesoam letôtea ere mihnyan heh phangtang ritphe rewah.

¹⁶ Ngemchhih pumma chentô mihnyan hehnâng, adong arin, techhu tangchhih, haa ngale haa ledangte, chentô nâng thin dekchah ngeko eroh ledang kako thin khengko ngemchhih mîn tûngrãng chienwah.

¹⁷ Hennâng ere mînpa aho dangeka erehehma ariakmin chenjô leta chohriimin, ngale asengmin leta sengmin, ere mînpa dangeka, ngemchhih mînpa dângmin, ba atemîn thiakpa nemboat dângmin.

¹⁸ Erepa jetloatrãng nãngnâng Joban buthi mongthemwin dângmin. Henhen nâng Joban buthi mongthem tongeka erehehma ere ngemchhih nemboat pa eta jetloa, chenrãngma ngako ere nemboat pa mihnyan mîn thiakpa edanga. Ere namboat pa 666 dângmin.