LOATKHESOK 11 - NIEMNYAN Naga NT (BSI)

Hâkhi Wanii

¹ Erediko Nganâng athakthin ke rãngrãng wanthe kohlahma ngatwah, “Wãnglohma Joban rangsoamhum ngale Joban nâng joapsoap thin chaam pa thakwãngo, ngale rangsoamhum kowah rangsoamte mihnyan hehmin weih o.

² Rohkomin thakho rãngsâ pa nekthak, chenrãngma ngako, erethepa Joban lejette hehnâng lâkohtek, erehehma Asâthôan Hahdaang pa roakbelii jengnii rãng thindama ewoatnek a.

³ Ngama Nga hâkhi hôante wanii bosta khet kepthuk lekma echienkat ang, ngale thinma Joban nginkongpa 1,260 rangwo khenko ephoangthôa.”

⁴ Hâkhi hôante wanii pa Oliv bãng wannii ngale hahtokkhoh wah Teso mathah kowah wentit toakthin wannii pa edanga.

⁵ Henma komin thinnâng chêmsietrãng mehun ako, thinthunkâ wah wen loatka lahma thinran heh eritkham a; ngale henhenma thin chêmsietrãng huneka ereheh eroh ritphemin.

⁶ Thinma Joban nginkongpa phôangthô poatko rangpa tãnghep lahma rang lepatthuk rãngmin thinnâng chaanwin dângmin. Ngale thinnâng jokhô jatkhô hehmin heirãng litthukrãng chaanwin; ngale thinma chenthu huneka erepoatko hahtokkhoh ko rongrup khoanchet chhih huthuk lahma chêmsietrãng min chaanwin.

⁷ Chenthu thinma Joban nginkong phoangthô pa merâ tahko, hahkenlu kowah ngemchhih pa loatwãng lahma thin demnâng eloatmîn a. Ngale ngemchhih pumma jien lahma ritphe erea,

⁸ ngale thin mangpa thin Teso rittektah hahdaangdong lemko echên a. Ere hahdaangdong mînpa Sodom ba Igip ngama edanga.

⁹ Chentô diak akan, jat apat, jab ajâ, ngale chentô mihnyan nyuchha hehma thinmangko jârem khatherãng esûhûa, ngale thinmangpa leruthuk ethien a.

¹⁰ Are hâkhi wanii ritjunko hahtokkhoh wah mihnyan heh khuhah nâhah edanga. Thinma kuhhôan lahma wathema wathe nâng hînhô heh elit kohmînwak a, chenrãngma ngako, ere mõng wanii pumma chentô mihnyan nyuchha heh khohnâng ajahthem chêmchei pa kephokwah.

¹¹ Jârem khathe diko thinkhoh nâng Joban wah roandông chohthin rek kalahma thinnâng lupkatwah, ngale ephumma thin tôanchepwah; ngale thinnâng khête heh phangtang chei rewah.

¹² Erediko mõng wanii pumma rangkhethung wah jabkhab chaanmõangma atenii nâng jabkat lahma tatwah, “Anâng wãngrên!” Phumma thinran hehma sokjenjen ko atenii phoam khohma rangkhethung nâng wângwah.

¹³ Ere sanpoat poatko hah dôngmõang tiiwah; phumma thiak echhi rãng hahdaang heh chhihsiet wah, ngale hahjat engit mihnyan heh ritwah. Ngale mihnyan ahan hehma chei nungma rangkhethung wah Joban dongnâng rôwakwah.

¹⁴ Lôdi kowah cheli thôanpa lâthôantah, rohkomin eredi wanrem kowah cheili thôanpa sitsiak ehûra!

Poakpopo Wanengit

¹⁵ Erediko wanengit kowah ngintatte pumma ate poakpopa rahmetwah, ngale ephumma rangkhethung nâng aroh chaanmõang rakjab lahma dângwah, “Ade phumma rangkhen pênrãng chaanpa nãng Teso ngale ate Misaia niinâng tonga, ngale atema roantang roangjêng rãng epên a!”

¹⁶ Erediko ate tôngthin mathah kowah tôngte roaknii wabelii khhepho phannang hehma thindede thhenpa hahko khupjup katlahma Joban nâng soamtô wah,

¹⁷ thinma ngatwah, “Teso Joban Adongthôan, Henpa athâng hehmin Joban, ngale Henpa khema komin Joban dângwah! Nima nangnâng dangkoh a ngaeki, chenrãngma ngako nangma nangchaan adongthôanpa kepeko ngale nangma pên eko!

¹⁸ Phumma Joban lejette mihnyan heh nyahrãng rinkhah wah, chenrãngma ngako nekhu rinkhah sanpoat pa hûera, ngale ritte heh rên sanpoat pa hûera. Ngale nanghaa mõng hehnâng, ngale nangran cheichei dângte mihnyan chentô nâng, adong arin lenga khoakthe ko kaamsen moatthã koh sanpoat pa hûera. Ngale henhenma hahtokkhoh pa chhihsiet eka, ereheh chhihsiet sanpoat pa hûera!”

¹⁹ Rangkhethung wah Joban rangsoam humpa laangwah, ngale Toamsem bâkot pa eretheko khewênwah. Erediko rangmok rangphak, ngale rangdãng khiapda liap dângwah, ngale hahtii erediko miendong jâlahma dângwah.