KOLOSIEN 3 - NIEMNYAN Naga NT (BSI)

¹ Nea Krista demnâng ritwah lângaksattet, erohwah nehung hehmin rangkhethung wah hehnâng koh en, enâng Krista ate Lowang tôngthinko Joban dekchahko tongeka.

² Nehung nerin pa are hahtokkhoh wah sêmmak hehnâng ledang rangkhethung wah sêmmak hehnâng koh en.

³ Chenrãngma ngako, nea lâriitet, ngale ne roandôngpa Krista junma Joban demnâng tongeka.

⁴ Krista pa ne roandông linlin, ngale chenthu ate mehong tahko, nemin ate demnâng johhong letma ate mîndôngko ejohroam en!

Roandông Pã ngale Roandông Nyan

⁵ Erohwah nema nehung khenwah chentô achhih heh ritphe en, dihiak dela kaamchhih moat, lihân kaamchhih heh, dihiak nâng phetwân, hungnâng achhih thônghun, ngale chhahnyoak (Chhahnyoak pa moangachaang nâng soamtô nâng ngaeka).

⁶ Chenrãngma ngako, areheh junko henma Joban nginlekep dangeka ereheh khohnâng Joban rinkhah pa elen a.

⁷ Rekthe ne roandôngpa arerãngrãng hehma lumpet lahma nekhu hung arin hehnângmin arerãngrãng thonghun letma dângwah.

⁸ Rohkomin ade phumma nekhumin arerãngrãng hehwah ajekre en: rinkhah, ngale hungkhen nâng achhih thônghun, ngale mihnâng chhihchoh hehwah ajekre en. Ne thunkhab wah mihnâng dûmmek, ngale jabkhab chhih heh nekhongjab en.

⁹ Wathema wathe nâng mothô nekthômîn en, chenrãngma ngako, nema newah pap roandông apã pa ne jatchhih patkhah heh demnâng lâjoh petphetet

¹⁰ ngale nea roandông nyan lâdangtet. Are roandông nyan pa Joban ma ate rãngrãng hôaneka, ngale nema ate senthemthem jienjet rãngma ate rãngrãng hôan ehèn.

¹¹ Erohwah, Jews ngale Jews ledangte heh tungko chenjô mâmâ aho, ngale khoankhen niem hôante le lehôante heh tungkomin chenjô mâmâ aho, jet ajien le nokba tungkomin, haa le haa ledangte tungkomin chenjô mâmâ aho, rohkomin Krista jôba anga nga rãng, ngale ate jôba chentôpa.

¹² Nea Joban mihnyan; atema nenâng hun ehèn ngale ate dedema ate mihnyan dângrãng ren ehèn. Erohwah, khetkep rãngrãng, mînchenmîn, hun achetmîn, numnene, noapnene, ngale hungmông rinmông dangletma tongen.

¹³ Wathema wathe nâng lietmîn re en, ngale hentung nângjô mechhihmîn en komin map kohmîn en. Chenroh Teso ma nenâng mapkoh ehèn a ererãngrãng wathema wathe nâng map kohmîn en.

¹⁴ Ngale areheh demko hun achetmîn min chentonga, hun achetmîn pumma jôba nekhu chentôpa jutjut jaangjaang senthemthem roamkhhek ehèn.

¹⁵ Nehung nerin khenwah thonghun eken pemin Krista ma koheka mêmo junko chendanga; chenrãngma ngako, are mêmo junko Joban ma nekhu phoangthe ko dângrãngma rooehèn. Ngale roantangma Joban nâng dangkoh a nga en.

¹⁶ Krista nginkongsen pa nehung nâng mênchong tongthuk en. Ere nginkongsen buthi mongthem junko wathema wathe nâng rîn akhahmîn letma hethômîn en. Rangsoamsê heh se en, Jobansê hehmin se en, ngale lihân rangsoamsê hehmin se en; nehung ma Joban nâng dangkoh a ngat nungma se en.

¹⁷ Erohwah, nema chentô moeken a ngale jab aja eken a ereheh Joban nâng Jisu Krista mînko dangkoh a ngat nungma mo en.

Roandông nyan danglihma sôngtông

¹⁸ Tangnyu heh, ne tangwa ngin kepletma thinran cheichei dangen, chenrãngma ngako, Kristan dangletma nema eroh moatmin.

¹⁹ Tangwa heh, ne tangnyu hehnâng hun en ngale thin demnâng rinkhah punpun nekdangen.

²⁰ Chha heh, nea Kristan dangletma roantangma mâmâ nyong awa nginkepkep dângpa ne moatlem, chenrãngma ngako, erohko Joban rinme eka.

²¹ Nyong awa heh, ne chha heh hung nekke thuk en, eroh medang ako, thin ajah môang chhihjâa.

²² Haaheh, rongrup nâng ne tângtewa nginkepkep dangen, thinma nenâng sokpoatko lolo chensenchohhi ngama nekdangen; rohkomin Teso ranchei letma nehung nerin phangtang kohletma chentôpa mo en.

²³ Nema chenjô memo enkomin, nehung nerin phangtang kohletma Teso rãngma mokoh eki, mihnyan rãng moatkoh dangmah ngama thonghun letma mo en.

²⁴ Thonghun en Teso ma ate mihnyan hehrãng thienkohtah heh nenâng ekohhèn. Chenrãngma ngako, alinlin Tângte Krista pa nema khoakhem eken.

²⁵ Ngale chentô kaamchhih moatte hehnâng thinma chenni kaamchhih motah a ere thãpa engakkoh a, chenrãngma ngako, Joban ma anga nganâng khoakthema ren eka.