JON MA RAANGWAH NGINKONGSEN 9 - NIEMNYAN Naga NT (BSI)

Jisu ma Achhat Mejû Mitdoak Dela wathe Sênsiet

¹ Jisu dankhôam poatko, atema chhat mejû mitdoak chhatwah dela wathe lepkhewah.

² Ate dijunte hehma atenâng chhienwah, “Hethôte, Hen pap junma atea mitdoak chhaeka? Atedede pap junko ale ate nyong awa heh pap junko mitdoak chhaeka?”

³ Jisu ma dânthâng wah, “Ate mitdoak pa ate pap junmemin dangmah ngale ate nyong awa heh pap junmemin dangmah. Ate mitdoak ekapa atenâng Joban chaan ma molahma jienkherãng doak eka.

⁴ Rangwo poatko, nãngma ngachienkatte moatlempa moatmin; rangnyek pa lâhûera, erepoatko henmemin lejien motumin.

⁵ Nga a hahtokkhoh ko dângpoatko, Hahtokkhoh rãngma wenphiak.”

⁶ Atema arepa ngatdiko, Jisu ma hahko thoakkah thoak lahma hahwah ngeknyetwah; ngale atema ere hahngek pa mihwa mitko hutkohwah

⁷ ngale atenâng ngatwah, “Nang thhenpa Silom binko mutphekao.” (Are ngaeka pa “achienchhoan” ngama ngaeka.) Ephumma mihwa pa kalahma ate thhenpa mutphê katwah, eko mitma jienkhe lahma ngakwâng wah.

⁸ Ate tok akhung wah hehma, ngale khemako chutphhekchhah khetah mihnyan hehma ngatwah, “Are mihnyan pa tonglahma chitha phhekchhah tahpa ledangne?”

⁹ Khaka ma, “Danga” ngatwah, ngale khaka ma, “Ate dangmah; rohkomin ate rãngrãngjô” ngama ngatwah. Ephumma mihwa pumma ate dedema hôngngatwah, “Nga ere mihnyan pa dangang”

¹⁰ Thinma chhienwah, “Nangma athângheh chenroh danglohma jienkhe ekoa?”

¹¹ Atema dânthâng wah, “Mihnyan wathe ate mînpa Jisu, atema hahngek ngeknyet lahma ngamitko hutkoh ehang, ngale atema nang thhenpa Silom bin ko mutphekao ngama chienwah. Ephumma nga kalekma mutphêkat wah, ngale ngama mutphê rienrienko jienkhe ekang.”

¹² “Ate chenkoa?” ngama thinma thôngphâ wah. “Ngama jetmek,” ngama dânthâng wah.

Farasi hehma Khoanchet Mêsiet junma Lêmte

¹³ Erediko mitdoak dangtah mihwa pa thinma Farasi heh tânâng siethokwah.

¹⁴ Jisu ma hahngek ngeknyet lahma ate mitdoak sensiettah jâpa Joban pientôngjâ dângwah.

¹⁵ Erediko Farasi hehma mihwako ate mitpa chenroh jienhong sentah a erepa thengak thôngphâ wah. Atema thinnâng thôkoh wah, “Atema nga mitko hahngek hutkohwah; erediko ngama thhen mutphe lekma jienkhe wah.”

¹⁶ Farasi khuthema ngatwah, “Are moatte mihnyan pa Joban tâwah ledangmin, chenrãngma ngako atema Pientông niem pa kepmah.” Ahan hehma aroh ngatwah, “Arerãngrãng patritli moatlem heh papi mihnyan ma chenroh ejienmoa?” Ngale thintung komin mâmâ khukhu dangjâwah.

¹⁷ Ephumma Farasi hehma ere mihwako wîenngak chhienwah, “Nangma nang mitpa atema sensiet ehang ngaeko - sen a, eroh medang ako nangma atea hen ngama ngaekoa?” “Atea mõng,” ngama mihwa pumma dânthâng wah.

¹⁸ Rohkomin Jews heh thôte jabte hehma ate nyong awa heh roomako atea mitdoak dângwah jienkhe eka ngama lepute dângwah

¹⁹ ngale thinma ate nyong awa hehnâng chhienwah, “Arepa nechha ne? ngale nema atea mitdoak chhat wahne; eroh medang ako, atema athângheh chenroh jienkhe eka?”

²⁰ Ate nyong awa hehma dânthâng wah, “Nima ajet atea nichha, ngale nima ajet atea mitdoak chhatwah.

²¹ Rohkomin athângheh atema chenroh jienkhe eka erepa nimemin jetmih, ngale ate mitdoakpa henma sensiettah a erepemin nima jetmih. Atenâng chhien en; atea phannang lâdangtah, ate rãngma atedede mejô ejien dânthânghen”

²² Ate nyong awa hehma arepa Jews heh thôte jabte heh rancheima ngatwah, chenrãngma ngako Jews heh thôte jabte hehma henhenma Jisu nâng atea Misaia ngama putedâlem eka ereheh Sanagog wah junloatmin ngama nginpatwah.

²³ Erohwah ate nyong awa hehma, “Atea phannang lâdangtah; atenâng thôngphâ en!” ngama ngatwah.

²⁴ Eredikomin mitdoak dângwah sentah pa rekthe thengak roolahma atenâng ngatwah, “Joban mathahko toangtang thôang ngama toamsem o! Nima ajet are nang sênsiette mihnyan pa papi mihnyan.”

²⁵ Mihwa pumma dânthâng wah, “Ngama atea papi dang ale dangmah a erepa jetmek” “Ngama wanthe loloba jet ang: Nga mitdoak dângwah, ade phumma ngama lâjienkhetek.”

²⁶ Thinma thôngphâ wah, “Atema nangnâng chenni rethoa? nang mitdoak pa chenroh sensietthoa?”

²⁷ Atema dânthâng wah, “Ngama thôkotah, rohkomin nema putemet. Chenrãngma thêngaktat hun eken a? Nemin ate dijunte dânghun eken a?”

²⁸ Thinma atenâng dûmmek lahma ngatwah, “Nanga ere mihnyan dijunte; rohkomin nia Mosa dijunte.

²⁹ Nima ajet Mosa demnâng Joban jabmîn rewah; phumma are mihnyan pa chenwah hûera erepa nima ajetjô lemjetmih!”

³⁰ Mihwa pumma dânthâng wah, “Arepa chentô patritli ngin a! Nema ate chenwah hûera erepa jetmet, rohkomin atema nga mitdoak pa sensiet ehang!

³¹ Nãngma ajet Joban ma papi mihnyan hehnâng jetatmah; Ate rancheite le atema huneka moatlem moatte mihnyan hehnâng ba atema jetat eka.

³² Rangbâng hahbâng thuwah achhatma mitdoak chhatte nâng henmemin mitsensiet lahma mathat chohtat eki.

³³ Erohwah are mihnyan pemin Joban tâwahkat ledang nâng, atema arerãngrãng pa leta momin”

³⁴ Thinma dânthâng wah, “Nanga achhat mejû papi chhaeho - phumma nangma ninâng hethô hun ehia?” Ephumma thinma atea Sanagog wah junloat rewah.

Ju nâng Mitdoak

³⁵ Ere nginpa Jisu ma chohtat diko, atema mihwa pa chohmîn lahma atenâng chhienwah, “Nangma Mihnyan Chha nâng putedâlem ekole?”

³⁶ Mihwa pumma dânthâng wah, “Hethôte, Atea hen a erepa nganâng thôkoh hang, ephumma ngama atenâng eputedâlem ang!”

³⁷ Jisu ma atenâng ngatwah, “Nangma ate lâkhetoh, ngale erepa athângheh nang demnâng thômîn ehopa.”

³⁸ Mihwa pumma ngatwah, “Teso!, ngama putedâlem ekang,” eroh ngalahma Jisu mathahko khupjup wah.

³⁹ Jisu ma ngatwah, “Nga are hahtokkhoh ko achhih asen rên rãngma kaerâng, erohwah mitdoak hehma ejienkhea, ngale henhenma jienkhe eka ereheh mitdoakrãng edanga.”

⁴⁰ Ate demwah Farasi khuthe dangtah hehma erepa tatlahma atenâng ngatwah, “Nangma ninângmin mitdoak ngaehia?”

⁴¹ Jisu ma dânthâng wah, “Nea mitdoak dângnomeko nenâng pap aho dângmin wah; rohkomin nema nia mitdoak dangmih ngama ngatdi, nenâng pap tonghèn.”