JON MA RAANGWAH NGINKONGSEN 7 - NIEMNYAN Naga NT (BSI)

Jisu ngale Ate Naa heh

¹ Arediko Jisu Galilijaa nâng phoangkhôam wah; atema Judia ngenâng wângpa lehun dângwah, chenrãngma ngako Jews heh thôte jabte hehma ate ritphe rãng hunwah.

² Tembu hum hôan lahma wângchhah lokuh sanpoat pa thâng lahma dângwah,

³ Ephumma Jisu naa hehma atenâng ngatwah, “Nanga arethe kowah Judia nâng wãngo, erohkoba nangma chenni moeko ereheh nang dijunte hehma ekhea.

⁴ Chentôma chenjethang ngama methonghun oko mihnyan hehma thinma chenni moeka ereheh rânghuhriem mah. Nangma are chentô moeko hehmin rangkhen phangtangma chenjet ho!”

⁵ (Ate naa hehmemin atenâng putedâlem ho.)

⁶ Jisu ma thinnâng ngatwah, “Ngarãng sanpoat mathang eka. Rohkomin nekhu rãngma chentôpa sanpoatpun tuta.

⁷ Hah-tokkhoh mihnyan ma nenâng jienchhihchoh mahhèn, rohkomin nganâng chhihchoh ehang, chenrãngma ngako ngama thin moatlem pa achhih ngaekang.

⁸ Nea lokuh thinnâng wãngen. Nga a are lokuhko wãngmahrâng, chenrãngma ngako ngarãngma sanpoat pa mathâng eka.”

⁹ Atema aroh ngalahma Galili nâng jektôngwah.

Jisu Tembu Hum Wângchhah Lokuh thinnâng

¹⁰ Ate naa heh lokuh thinnâng wângdiko Jisu min junwângwah; rohkomin atea sansanma leloatkhoam thangma, huhchha ma hokwah.

¹¹ Jews heh thôte jabte hehma lokuh thinnâng ate lêmsokwah. Thinma, “Ate chenkoa?” ngama chhienwah.

¹² Mihnyan heh chhangko ate junma nyahrãng phoanghuh jabmînwah. Khaka hehma, “Atea mihnyansen” ngatwah, rohkomin khaka hehma, “Dangmah, Atea aba apha” ngawah.

¹³ Rohkomin ate junma henmejô laanglaang chinthôho, chenrãngma ngako thin a Jews heh thôte jabte heh ranchei wah.

¹⁴ Lokuh khaka râchoanko Jisu ma Rangsoamhum nâng wãng lahma hethô wah.

¹⁵ Jews heh thôte jabte heh nyahrãng patrii lahma ngatwah, “Are mihnyan pumma nyapweih nyapraangmin aho thangma aretô chenroh jienjet eka?”

¹⁶ Jisu ma dânthâng wah, “Ngama chenni hethô ekanga erepa ngadede wah hethô dangmek, erepa ngachien katte Joban ngewah hethô ekang.

¹⁷ Henhenma Joban ma chenni huneka erepa moat huneka erehehma, ngama Joban junko hethô ekang ale ngadede chaanmajab ekanga erepa ejet a.

¹⁸ Henhenma thindede chaanko jabeka erepumma atedede mîndôngpa ehun a. Rohkomin henma ate chienkatte mîndôngrãng huneka erepa toangtang, ngale atenâng chenni athejô aho.

¹⁹ Mosa ma nenâng Niemarang pa kohthen, rohkomin erepa henmemin kepmet. Nema nga chenrãngma ritphehun eha?”

²⁰ Mihnyan hehma dânthâng wah, “Nangnâng juchhih tongho erepumma nang ritphehun eho?”

²¹ Jisu ma dânthâng wah, “Ngama patritli moatlem wanthe moatko, nekhu phangtang patritre eken.

²² Mosa ma nenâng delachha heh khoankhen niemhôanrãng chienwah (Erepa Mosa ma ledang nete newa hehma hôngmoatwah), ngale erohwah nema delachha heh Pientông jâko khoankhen niemhôan eken.

²³ Delachha pa nema Joban Pientông jâko khoankhen niem hôanletma nema Mosa Niemarang pa lechhihsiet medang enko, Ngama khoanchette mihnyan pa Pientông jâko senthemthem mêsietrãngma nga demnâng chenrãngma rinkhah eha?

²⁴ Khoankhoh nâng sûletma achhih asen ngama rênpa jekre en, toangtangma ren en.”

Atea Misaia ne?

²⁵ Jeroselem wah mihnyan khuthema ngatwah, “Jews heh thôte jabte hehma ritphe rãng lemeka mihnyan pa arepa ledangne?

²⁶ Sûtan! atema nok atang heh chhangko thôkoh eka, rohkomin thinma ate lelatnâng chenjô jabmah! Thinmemin atea linlinjô Misaia ngama jetthem eka?

²⁷ Rohkomin chenthu Misaia pa meka theko, henmemin ate chenwah hûera erepa lejetmin. Phumma ate chenwah hûera erepa nãngkhu chentôma jet e.”

²⁸ Jisu ma Rangsoamhum nâng hethô poatko, atema chaanmõang rakjabwah, “Nema nga linlinjô jet ha, ngale nga chenwah hûerânga erepa jet ha? Nga a ngadede chaanko hok dangmahrâng. Rohkomin, ngachien kattepa toangtang. Phumma erepa nema jetmet,

²⁹ Ngale ngama ate jet ang, chenrãngma ngako nga ate tâwah kaerâng ngale atema chienkat ehang.”

³⁰ Ephumma thinma ate loathunwah, rohkomin henmemin atenâng dek chinjâho, chenrãngma ngako ate sanpoat pa mahû dângwah.

³¹ Rohkomin mihnyan heh chhangwah melângma atenâng putedâlem lahma ngatwah, “Chenthu Misaia meka theko, are mihnyan pumma moeka nomemin ajahthem patritli heh emoa?”

Jisu Loatkhhek rãng Sipâhi heh Chienkat

³² Mihnyan hehma Jisu junma huhthômîn pa Farasi hehma leptatwah, ephumma thinma ngale soam aroakte hehma Jisu loatkhhek rãng sipâhi heh chienkatwah.

³³ Jisu ma ngatwah, “Nga nedemnâng poatthe rãngba etongang, ngale erediko ngachienkatte tânâng ewãng ang.

³⁴ Nekhuma nga elemsûha, rohkomin nema lechoh khemin, chenrãngma ngako nga chenre theko chhoan ekanga eretheko nekhu leta wãngmin.”

³⁵ Jews heh thôte jabte heh thindede tungko jabmînwah, “Nãngma lechohlem thinnâng ate chenko chhoanrãng ngaeka? Nãnglemru Griik heh songeka hahnâng kalahma Griik hehnâng hethôkat rãng lengaeka?

³⁶ Atema ngaeka, nãngma ate elemsûe, rohkomin nãngma ate lechoh khemin, ngale ate chenko chhoan eka eretheko nãng leta wãngmin. Atema chenni junkojab eka?”

Roandông Kohthin Jokhô

³⁷ Lokuh râjâ rangwo ngale erejâpa nyahrãng alemthôanjâ rangwo ko Jisu toanchep lahma chaanmõang rakjabwah, “Henhen jolânrii eken a ereheh ngatânâng hûren, ngale

³⁸ Henhenma nganâng putedâlem ehanga erehehma jok en. Joban nyapraangma ngaeka rãngrãng, ‘Ate phoangwah roandông kohthin jokhô ehongjen kara.’”

³⁹ Arepa Jisu ma Ju junko jabwah, henhen ma atenâng putedâlem eka erehehma ere Ju pa chohmin. Ere sanpoatko Ju pa makoh dângwah, chenrãngma ngako, Jisu Joban chaan keplahma ritwah ma ngakhin dângwah.

Mihnyan heh Phoangphanjâ

⁴⁰ Mihnyan heh chhangwah khakama are jabkhab pa leptat lahma ngatwah, “Are mihnyan pa linlinjô mõng!”

⁴¹ Khaka hehma, “Atea Misaia!” ngatwah Rohkomin khaka hehma, “Misaia pa Galili wah lehûmin! ngatwah,

⁴² Joban nyapraangma ngaeka, Misaia pa Devit Lowang chhuchha wah dângmin ngale atea Devit songtah hah Bathlehem nâng chhatmin.”

⁴³ Erohwah Jisu junko mihnyan heh phoangphanjâ wah.

⁴⁴ Khaka hehma loathunwah, rohkomin atenâng henmemin dek chinjâho.

Jews thôte jabte hehma putedalam mah

⁴⁵ Chenthu abemte sipâhi heh ngakwâng phumma soam aroakte adong le Farasi hehma chhienwah, “Nema ate chenrãng lelowên dangeren a?”

⁴⁶ Sipâhi hehma dânthâng wah, “Are mihnyan pumma jabeka rãngrãng hen mihnyan memin mathat jabeka!”

⁴⁷ Farasi hehma thinnâng ngatwah, “Atema nemin baphhek thenne?”

⁴⁸ “Jews thôte jabtema komin ba Farasi ma komin wathemejô atenâng putedâlem lahma nema thatjettet a?

⁴⁹ Mihnyan hehma Mosa Niemarang pa jetmah, erohwah thin a Joban ma echhihsiet a!”

⁵⁰ Phumma ereko amanâng Jisu demnâng chohmîn hokte Farasi wathe ate mînpa Nikodima dângwah. Atema ahan hehnâng ngatwah,

⁵¹ “Nãng Niem junko mihnyan kowah machohtat ma, ngale atema chenni chhihmoeka erepa machohkhe ma hennâng min athe jien ngamih.”

⁵² Thinma dânthâng wah, “Nangmin Galili wahne? Joban nyapraang meweih oko nangma ejet o chenthumin Galili wah mõng lehongmin.”