JON MA RAANGWAH NGINKONGSEN 3 - NIEMNYAN Naga NT (BSI)

Jisu ngale Nikodima

¹ Jews heh khhepho ate mînpa Nikodima ngama wathe dângwah, ngale atea Farasi dângwah.

² Jâthe rangpen nâng Jisu tânâng wãng lahma atenâng ngatwah, “Rabi, nima ajet nanga Joban ma chienkatwah hethôte. Henmemin nangma moeko rãngrãng patritli heh leta momin chenthu ate demnâng Joban chaan letong kako.”

³ Jisu ma atenâng dânthâng wah, “Ngama nangnâng toangtang thôkoh eki: henmin atea depnii lengakchha kako Joban Hahsông lechohkhe min.”

⁴ Nikodima ma chhienwah, “Dongchoan mihnyan pa chenroh depnii jienthe ngakchhat min a?” “Depnii ngakchhat rãng chenthumin ate nyong wokkhen nâng jienthe ngaklupmah!”

⁵ Jisu ma dânthâng wah, “Ngama nangnâng toangtang thôkoh eki” “Henmin jo ngale Juma lechha kako Joban Hahsông thenâng leta wãngmin.

⁶ Mihnyan hei angem phoangpa nyong awa ma chhaehi, rohkomin jupa Juma chhatmin.

⁷ Ngama nangnâng nanga depnii ngakchhatmin ngama ngatrãngma nekpatrii.

⁸ Pôngpa atema chennge nâng pôngchhoan huneka enge nâng rângpong chhoan a; ngale nangma pônglin peba rângtat o, rohkomin nangma chenwah ponghûera, ngale chennâng pongchhoan eka erepa rângjetmoh. Henhen Juwah chhaeka erehehmin ererãngrãng jôba dângmin.”

⁹ “Aroh chenroh jiendângmin a?” ngama Nikodima ma chhienwah.

¹⁰ Jisu ma dânthâng wah, “Nanga Isrial ko hethôte adong wathe, phumma nangma arepa jetmohne?

¹¹ Ngama nangnâng toangtang thôkoh eki: Nima chenni jet ekia erepa thôeki, ngale chenni khe ekia erepa jôba thôeki, rohkomin nekhuma henmemin ni nginko putemet.

¹² Ngama nangnâng are hahtokkhoh wah ngin heh thôkohko pute mahhang; phumma ngama nangnâng, rangkhethung wah ngin heh methôkoh eko jãtanga, nangma chenroh ejien pute hanga?

¹³ Ngale henmin rangkhethung nâng mathat wãngeka, Mihnyan Chhapa loloba rangkhethung wah kaera.”

¹⁴ Mosa ma janwah hôanwah pû sehahnâng thankah ranâng laangtah rãngrãng, Mihnyan Chhamin eroh laangmin,

¹⁵ erohkoba henhenma atenâng putedâlem eka erehehma roantang roanjêng roandông echoh a.

¹⁶ Joban ma are hahtokkhoh ko nyahrãng hunlahma ate Chha wathelolo pemin koheka, erohwah henhenma atenâng putedâlem eka ereheh leriimin rohkomin thinma roantang roanjêng roandông echoh a.

¹⁷ Chenrãngma ngako Joban ma ate Chhapa hahtokkhoh chhihsietrãng chienkat dangmah, hahtokkhoh pepângrãng chienkat era.

¹⁸ Henhenma Chhako putedâlem eka ereheh nâng achhih lengamin; rohkomin henhenma leputedâlem dangeka ereheh achhih ngama rângatah, chenrãngma ngako, thinma Joban Chha wathe loloko putedâlem mah.

¹⁹ Achhih asen pa aroh ren eka: wenphiak pa hahtokkhoh ko kaera, rohkomin mihnyan hehma wenphiakko hunnoma rangnyekko huneka, chenrãngma ngako thin moatlem heh achhih.

²⁰ Henhenma achhihli moeka erehehma wenphiakko chhihchoh eka ngale wenphiakko hûwakmah, chenrãngma ngako thinma moatlem chhih heh kherit hunmah.

²¹ Rohkomin henhenma asenli moeka erehehma thin moatlem pa Joban junko moeka ngama wenphiak pumma chenkhesok a ngama wenphiakko hûeka.

Jisu ngale Jon

²² Erediko, Jisu le ate dijunte heh Judia diak ngenâng katwah, thindem ko enâng jâthe jânii rãng tongthien lahma baptijem kohthienwah.

²³ Salim tâwah Ainon hahko Jon memin baptijem kohlahma dângwah, chenrãngma ngako eretheko jo ajah dângwah. Mihnyan heh ate tâko hûlahma thinnâng atema baptijem kohwah.

²⁴ (Arepa Jon phâtek nâng sekmako dângwah.)

²⁵ Jon dijunte khuthe Jews heh demnâng niemarang junko seksâsoan rãngma chhiakmîn wah.

²⁶ Ephumma Jon tânâng wãng lahma thinma thôkoh wah, “Hethôte, nangma thonghun ekole Jordanjo rãngma sankat ngewah nang demko mihnyan wathe dangtah pa, nangma mihnyan hehnâng ate junma thôkotoh pa? atema athângheh baptijem koheka, ngale anga nga ate tânâng hûeka!”

²⁷ Jon ma dânthâng wah, “Joban ma lekoh kako, mihnyan ma chenmin leta chohmin.

²⁸ Ngama jab ekãngpa nema lâtattha, ‘Nga a Misaia dangmek, rohkomin nga a ate mako chienkatla ehang.’

²⁹ Nemnyanwa pa nemnyannyu rãng; rohkomin nemnyanwa tâwah cheplahma atenâng jetat eka ate lemruchha pa, nemnyanwa kahra tatko khuhah eka. Ererãngrãng ngamin khuhah ekang.

³⁰ Ate jêngdong dongwãng rêmin, rohkomin nga jêngrin rinjâ rêmin.”

Rangkhethung wah Katte

³¹ Rangkhethung wah hen kaera erepa chentô noma adong. Henpa hahtokkhoh wah a ereheh a hahtokkhoh thiak ngale hahtokkhoh ngin ethôa, rohkomin henpa rangkhethung wah kaera erepa chentô noma adong.

³² Atema chenpa khetah a ngale tattah a ereheh thôkoh eka, rohkomin ate ngin pa henmemin pute mah.

³³ Rohkomin henhenma ate nginpa kep eka erehehma Joban pa toangtang ngama jet eka.

³⁴ Henpa Joban ma chienkat era erepumma Joban ngin thôeka, chenrãngma ngako atenâng Joban ma ate Jupa mênchong koheka.

³⁵ Wama ate Chhanâng hunlahma chentôpa atenâng pênthuk eka.

³⁶ Henhenma Chhako putedâlem eka erehehma roantang roanjêng roandông chohmin; Henhenma Chha nginlekep dangeka erehehma roantang roanjêng roandông lechohmin, rohkomin ereheh nâng Joban ma roantangma echêmthuk a.