JON MA RAANGWAH NGINKONGSEN 2 - NIEMNYAN Naga NT (BSI)

Kana Hahnâng Nemnyansiet

¹ Jânii diko Galili wah Kana hahnâng nemnyansiet kuhhôan dângwah. Jisu nyong min nemnyansiet thinnâng dângwah,

² ngale jisu le ate dijunte hehmin nemnyansiet thinnâng roowah.

³ Chenthu angurti thôan phumma Jisu nâng ate nyong ma ngatwah, “Thin angurti lâthôantah.”

⁴ Jisu ma dânthâng wah, “Ngama moatthin moatlempa nangma nekthôkoh hang,” “Ngama moatrãng sanpoat mahûera.”

⁵ Erediko Jisu nyong ma haa hehnâng ngatwah, “Atema nenâng chenni chien ehèn a erepa mo en.”

⁶ Jews hehnâng seksâsoan niem tonga, erohwah ere niemko keprãng eretheko longwah hôanwah jotêm phangerok dângwah, ngale jotêm phangtheko châthe litat lânchhamroh dângwah.

⁷ Jisu ma haa hehnâng ngatwah, “Are jotêm heh joma menkien en.” Ephumma haa hehma mênkienwah,

⁸ ngale erediko atema thinnâng ngatwah, “Arejo kowah kholetma kuhhôan semwa khhepho nâng wênkoh en.” Ephumma thinma jokowah khoatwên kohwah,

⁹ erejopa angurtirãng litjâ lahma dângwah, ngale sêmwa khhepho pumma erepa thatjokwah. Phumma ere angurti pa chenwah choh ekapa atema lejetwah (rohkomin jokhoatwênte haa pumma epa jetwah); ephumma kuhhôan sêmwa khhepho pumma nemnyan wapa roowah

¹⁰ ngale atenâng ngatwah, “Anga ngama khebeng khoko angurtisen senpa rângbengkoh a, phumma mihhehma melejok tahkoba, khediko achhih pa rângkoh a. Rohkomin nangma athâng hehmin asen pa thien eko!”

¹¹ Jisu ma arepa khebengrãng patritli moatlem Kana nâng bengmoatwah; Enâng Jisu ma ate chaanpa bengkhesok wah, ngale ate dijunte hehma atenâng putedâlem wah.

¹² Erediko Jisu le ate nyong, naa heh, erediko ate dijunte heh Kaparnam nâng kalahma jâthe jânii tongkatwah.

Jisu Rangsoamhum nâng Hok

¹³ Ere sanpoat pa Adankhoam Lokuh thângnemnem dângwah, erohwah Jisu Jeroselem nângkatwah.

¹⁴ Atema Rangsoamhum ko lee amân, saak, phari sengte heh erediko ngun akem litminte heh tonglahma khehokwah.

¹⁵ Ephumma atema ruhepma watlahma chentô ngem heh Rangsoamhum kowah junloatwah, saak ngale lee amân hehmin junloatwah; ngale atema ngun litminte khoang heh dâthin phekoh relahma thin ngun heh rêmphekoh rewah;

¹⁶ ngale phariwo sengte hehnângmin atema, “Erekowah kepchhoanrãng chienwah! Nga Wa Hum pa phîn athã sengthin therãng nekhôan en!” ngama ngalahma junloatwah.

¹⁷ Joban nyapraangma ngaeka heh ate dijunte hehma thônghun wah, “Joban, Ngama nang Hum ko hun ekang pumma wenma khâmwah rãngrãng kham ehang.”

¹⁸ Jews heh thôte jabte heh ate tânâng ngin chhienrang ngakhok wah, “Nangnâng areheh moatrãng chaan tongho ngama nima jetrãng, nangma ninâng chenni patritli molohma khesok hia?”

¹⁹ Jisu ma dânthâng wah, “Nema are Rangsoamhum pa runsiet en, Ngama jârem khenko ngakhoan ang.”

²⁰ Thinma chhienwah, “Nangma jârem khenko tangakhoan oa?” “Are Rangsoamhum pa hôanrãng roakbelii pâerok rangpâ lemwah!”

²¹ Rohkomin Jisu ma ngaeka rangsoamhum pa ate phoangpa ngatwah.

²² Ephumma chenthu Jisu ritwah ngakhîn diko, ate dijunte hehma atema jabtah pa thonghunwah, ngale Jisu ma jabtah Joban nyapraangko thinma putedâlem wah.

Jisu ma Mihnyan jat apat pa Jet

²³ Jisu Adankhoam Lokuh rãng Jeroselem nâng dângpoatko, atema patritli moatlem heh moat khelahma jahmõang mihnyan hehma atenâng putedâlem wah.

²⁴ Rohkomin Jisu ma thinnâng puteho, chenrãngma ngako Jisu ma mihnyan heh phangtang jetlahma dângwah.

²⁵ Thinjunma atenâng chêmthôkoh thinjô aho dângwah, chenrãngma ngako thinhungnâng chenni thonghun eka erepa ate dedema jet dângwah.