JON MA RAANGWAH NGINKONGSEN 18 - NIEMNYAN Naga NT (BSI)

Jisu Loatkhhek

¹ Jisu ma are rangsoam pa tâsoam diko, ate dijunte heh demnâng Kidron hahthung ranka ngenâng dânkatwah. Eretheko penri thong dângwah, phumma Jisu le ate dijunte heh eretheko wângwah.

² Jisu chên sângte, Juda ma erethepa jetlahma dângwah, chenrãngma ngako, eretheko Jisu ate dijunte heh demnâng chîchohmîn wah.

³ Juda ma ate demko Soam aroakte adong ngale Farasi hehma chienkatwah Roman sipâhi ngale Rangsoamhum bemte heh sietlahma penri thongko hokwah; thinma dãng apah, wentit, ngale wennan heh semlahma hokwah.

⁴ Jisu ma ate khohnâng chenni hokmin a ereheh phangtang jetchoan dângwah, ephumma chohkhoam kalahma atema thinnâng ngatwah, “Nema henlem eken a?”

⁵ Thinma, “Nazarat wah Jisu lemki,” ngama dânthâng wah. Jisu ma, “Erepa Nga,” ngama dânthâng wah. Thin demko chênsângte Juda johchep lahma dângwah.

⁶ Chenthu Jisu ma thinnâng, “Erepa Nga,” ngama ngatko, thin a tokdi ngenâng ngadâ lahma hahko kôanjâwah.

⁷ Eredikomin Jisu ma thinnâng thôngphâ wah, “Nema henlem eken a?” Thinma, “Nazarat wah Jisu lemki,” ngama dânthâng wah.

⁸ Jisu ma thinnâng ngatwah, “Erepa Nga, ngama nenâng lâthô kotah,” “Nema ate lem medang enko, are ahan heh chenchhoan eka.”

⁹ (Arepa khemako atema chenni jabtah a erepa toangtang dângrãng ngatwah: “Wa, Nangma nganâng kohthang heh ngama wathemin mahphemek.”)

¹⁰ Simon Piter ngenâng dãng dângwah, phumma atema dãngpa toanlahma Soam aroakte adongthôan haanâng doaklahma ate nâchahpa jâdoakwah. Ere haa mînpa Malkus dângwah.

¹¹ Jisu ma Piter nâng ngatwah, “Nang dãngpa ate thienthin theko ngakthien o! Ewa ma nganâng kohthang chêmchei pa ngama nekchenchoh eka ngama thonghun ehanga?”

Jisu Anas tânâng Siethok

¹² Roman Sipâhi sahhab le ate sipâhi erediko Jews heh Rangsoamhum bemte hehma Jisu loatwah, ngale thinma khhek rewah,

¹³ Thinma khebengko Anas tâko siethokwah. Atea Kaipas dihiak wa dângwah, ere rangpâko Kaipas pa Soam aroakte adongthôan dângwah.

¹⁴ Kaipas ma Jews heh thôte jabte hehnâng mihnyan heh phangtangrãng wathe mihnyan ritpeba asen ngama thôkoh wah.

Piter ma Jisu Jetmek ngat

¹⁵ Simon Piter ngale dijunte ahan wathe Jisu diko junchhoan wah. Ere dijunte wathe pumma Soam aroakte adongthôanpa senthemthem jetlahma dângwah, erohwah Soam aroakte adongthôan humthakho ko Jisu demnâng ate johwângwah,

¹⁶ Ere poatko Piter a panlienko tôngwah. Phumma ere dijunte pa rangsâ nâng ngakka lahma pankâsek kowah chepte dihiaknya ko ngalahma, Piter pankhen nâng sietwênwah.

¹⁷ Pankâsek kowah chepte dihiaknya pumma Piter nâng ngatwah, “Nangmin ire mihnyan dijunte wanthe dangoni?” Piter ma, “Nga dangmek,” ngama dânthâng wah.

¹⁸ Erepa rangchhông poatko dângwah, erohwah, haa ngale abemte hehma wenthhek lahma wenko tumlit cheplahma lêmsahrit wah.

Soam Aroakte Adongthôan ma Jisu nâng Ngin Chhien

¹⁹ Soam aroakte adongthôan pumma Jisu nâng ate dijunte heh ngale atema hethôeka ngin heh junma chhienwah.

²⁰ Jisu ma dânthâng wah, “Ngama roantangma mihnyan heh nâtatko chentô nâng thôkotek; Ngama chentôpa mihnyan heh anga nga roamkhôan thin Sanagog ngale Rangsoamhum nâng hethô wah. Ngama chenthumin ngale chennimin huhchhama thôho.

²¹ Nangma nganâng chenrãngma chhien ehanga? Henhenma Ngangin tatthanga ere mihnyan hehnâng chhien o. Ngama thinnâng chenni thôkotek a erepa thinnâng thongpha en - ngama chenjabtek a erepa thinma jet a.”

²² Chenthu Jisu ma aroh ngat poatko, erethe kowah abemte wathema Jisu thhenko watlahma ngatwah, “Nangma Soam aroakte adongthôan nâng chenroh tapaanglaang dânthang ekoa!”

²³ Jisu ma atenâng dânthâng wah, “Ngama chenni komin methe jabtekko, chenpa thejabtek a erepa arekowah hehnâng thôkoh. Rohkomin ngama toangtang jabwah medang angko nangma nganâng chenrãngma wat ehanga?”

²⁴ Erediko Anas ma khhek lahma Soam aroakte adongthôan Kaipas tânâng chienwênwah.

Piter ma Jisu Jetmek ngama Wîenngatwah

²⁵ Eretheko Piter cheplahma wenko lemsahrii lahma tôngwah. Ephumma ahan hehma atenâng ngatwah, “Nangmin ire mihnyan dijunte dangoni?” Phumma Piter ma, “Nga dangmek,” ngama dânthâng wah.

²⁶ Soam aroakte adongthôan haa, atea Piter ma nâ jâdoaktah rãngma tangkâ dângwah, phumma erepumma ngatwah. “Nanga ngama ate demnâng penri thongko khetih?”

²⁷ Erepoat komin Piter ma, “Nga dangmek,” ngama wîenngat wah - phumma lemlienma wowênwah.

Jisu Pilat tânâng Siethok

²⁸ Rangkhahkho ma Jisu, Kaipas humwah Govono humnâng sietkatwah. Jews heh thôte jabte heh Govono humkhen nâng lupwãngwak ho, chenrãngma ngako, Adankhoam lokuh phhekchhah jienchhahrãng, thin a niemarang junko asâma tônghunwah.

²⁹ Ephumma Pilat ma rangsâ nâng thintâko loatka lahma thinnâng thôngphâ wah, “Nema are mihnyan pa chennâng thelahma sekham eken a”

³⁰ Thinma, “Atema lechhihmo nomeko nima nang tânâng lesiet huminwah” ngama dânthâng wah.

³¹ Pilat ma thinnâng ngatwah, “Eroh medang ako nema sietchhoan letma neniem junko sekham en.” Thinma dânthâng wah, “Niniem junko nima mih henjô tarit phemih.”

³² (Arepa Jisu ma rekthe ate chenroh ritmin a, erejunma jabtah pa toangtang dângrãng dângwah.)

³³ Pilat ma ate humkhen nâng ngakwãng lahma Jisu nâng roowah. Ngale atema chhienwah, “Nanga Jews heh Lowang ne?”

³⁴ Jisu ma dânthâng wah, “Are nginpa nangdede hungwah thôngphâ ehangle, nangnâng ngajunma henma komin thôkoh thoa?”

³⁵ Pilat ma dânthâng wah, “Nangma Nga a Jews ngama lethonghun ehanga? Nedede mihnyan ngale Soam aroakte adong hehma nanga nga dekko siethukoh ehang. Nangma chenni motoh a?”

³⁶ Jisu ma ngatwah, “Nga Hahsôngpa are hahtokkhoh korãng dangmah; Nga Hahsôngpa are hahtokkhoh korãng dângnomeko, ngadijunte heh loatmîn lahma Jews heh thôte jabte hehnâng Nga lelo thukminwah. Nga Hahsôngpa are hahtokkhoh korãng dangmah!”

³⁷ Ephumma Pilat ma atenâng chhienwah, “Eroh medang ako nanga lowangne?” Jisu ma dânthâng wah, “Nangma Nga a Lowang ngama lâpun ngathang. Ngama toangtang thôrãng, ngale ererãngma lolo jôba nga chhatwah, ngale ererãngma lolo jôba are hahtokkhoh ko kaerâng. Erohwah henhen toangtangko dangeka erehehma ngangin etathang.”

³⁸ Pilat ma chhienwah, “Toangtang pa chennia?” Erediko Pilat rangsâ nâng mihnyan heh tânâng ngakka lahma thinnâng ngatwah, “Ngama ate ritphe rãng chenjô chhihmo lahma chohkhemek.

Jisu Ritpherãng Nginpat

³⁹ Rohkomin neniem junko, Ngama Adankhoam lokuh roakweih phâtek nâng khhekte nerãng rânglaang phekoh a. Phumma nema Jews heh Lowang pa laangphekoh hun ekenle?”

⁴⁰ Thinma raklahma dânthâng wah, “Nima ate hunmih! Nima Barabas ba huneki!” (Barabas pa mihngoan dângwah.)