JON MA RAANGWAH NGINKONGSEN 16 - NIEMNYAN Naga NT (BSI)

¹ “Ngama ne putedâlem pa nekchen chhihjâ eken ngama arepa thôkoh eka.

² Nea Sanagog wahmin ejunlo hèn, ngale mihnyan hehma ne ritphe lahma thinma Joban nâng soamtô eki ngama thônghûn sanpoat pa ehûra.

³ Mihnyan hehma Wa min lejet ngale Nga min lejet dâng phumma ne eritphe hèn.

⁴ Phumma ngama nenâng arepa thôkoh eka, erohkoba chenthu thinma arohmoat sanpoat mehûthako, ngama nenâng chenni thôkotah a ereheh nema ethonghun en. “Ngama areheh nenâng khebengko thôkomah, chenrãngma ngako, Nga nedemko dângwah.

Asâthôanju Moatlem

⁵ Rohkomin ade phumma Nga a ngachienkatte tânâng wãngekang, rohkomin nekhuwah henmemin nga chennâng dângrãng ngaekanga erepa thongphâ mahha.

⁶ Ngale athângheh ngama nenâng thôkoh eka, phumma nea nyahrãng hungchhih rekmah dangeken.

⁷ Rohkomin ngama toangtang thôkoh eka: Nga chhoan ekangpa nerãng sênrãng chhoan ekang, chenrãngma ngako Nga lechhoan medang angko, chohsokte Jupa netânâng lekamin. Phumma Nga mechhoan angkoba Ngama netânâng ate echienkatrâng.

⁸ Ngale chenthu ate meka theko, atema hahtokkhoh wah mihnyan hehnâng, pap, ngale toangtang, erediko Joban ma khope rênjunma ekhesok a.

⁹ Thin a pap junko athe, chenrãngma ngako thinma nganâng putedâlem mahhang;

¹⁰ ngale thin a toangtang junkomin athe, chenrãngma ngako Nga a Wa tânâng wãngekang ngale nema nga lechoh khetûmin;

¹¹ ngale thin a chhih asen rên junkomin athe ngama ekhesok a, chenrãngma ngako, are hahtokkhoh pênteko athe lângatah.

¹² “Ngama nenâng ajahthem thôkohthin tonga, rohkomin athângheh nema ereheh phangtang takepmet.

¹³ Ephumma chenthu toangtang Ju pa meka theko, atema Joban toangtang pa ekhesokkat hèn, ngale atema nemin toangtang lemnâng esenhèn. Atema atedede hungwah lehong jabmin, rohkomin atema chenni chohtat eka erepa ethôa, ngale khediko chenni dângmin a erehehmin ethôkoh hèn.

¹⁴ Atema ngamîn edongthuk hang, chenrãngma ngako, ngama chennijab ekanga erepa atema nenâng thôkoh ehèn.

¹⁵ Ewa ngenâng chentô tongtong apa phangtang ngarãng; erohwah ngama ngaekang, ngama Junâng chennikoh ekanga erepa atema thalahma nenâng ethôkoh hèn.

Asep Ajôang ngale Khuhah Nâhah

¹⁶ “Chuthe diko nema nga lechohkhe tumin, ngale ere chuthe diko nema nga echohkheha.”

¹⁷ Ate dijunte khuthema thindede chhienmînwah, “Arepa chenni junko jabeka? Ngale atema nãngnâng chenni junko thôkoh ehia, Nãngma chuthe diko ate lechohkhe tumin ngale ere chuthe diko nãngma ate echohkhe e; ngale atema arohmin ngaeka, ‘Chenrãngma ngako Nga a Wa tânâng wãngekang.’

¹⁸ ‘Chuthe diko’ pa chennâng ngaeka? Atema chenni junko jabeka erepa nãngma jetmih!”

¹⁹ Thinma nganâng thôngphâ hun ehang ngama jetlahma, Jisu ma thinnâng ngatwah, “Ngama ngaekang, ‘chuthe diko nema nga lechohkhe tumin, ngale ere chuthe diko nema nga echohkheha.’ Are junma nekhu dede tungko lechhienmîn eken a?

²⁰ Ngama toangtang thôkoh eka: Nea sep ajoang ere en, rohkomin hahtokkhoh pa khuhah nâhah edanga; nea hungchhih rekmah edangen, rohkomin ne hungchhih rekmah dang ekenpa khuhah nâhahrãng elitjâa.

²¹ Chenthu dihiaknyu pumma naachhatrãng menga tahko, atenâng nyahrãng chhâ lahma rângchêm a; rohkomin chenthu naapa mechha tahko, atema naachhat poatwah chêmpa lekphe rângrea, chenrãngma ngako, hahtokkhoh ko naapa tachhakat era.

²² Ererãngrãng jôba nekhu demnâng dângmin: athângheh nekhua hungchhih rekmah dangeken, rohkomin nekhu demnâng Nga engak chohmîn a, ngale ephumma khuhah nâhah edangen, ere khuhah ekenpa newah henmemin leta rephe tumin.

²³ “Chenthu ere rangwo pa mehû theko, nema nga ngewah chenmin letha tumin. Ngama toangtang thôkoh eka: Nema Ngamînko chenni komin Wa ngewah metha enko atema nenâng ekohhèn.

²⁴ Nema ngamînko chenmin mathattha eken; tha en ekoba nema echoh en, erediko ba nema linlin dangletma khu ehah en.

Hahtokkhoh Jien

²⁵ “Ngama are ngin heh nenâng nginthakthô rãngrãng keplekma thôkoh eka. Rohkomin ngama nginthakthô lekep thangma thôkoh sanpoat pa ehûra, ere sanpoatko ngama nenâng Wa nginpa eloat thôkoh a.

²⁶ Chenthu ere rangwo pa mehû theko, nema atewah ngamînko etha en; ngale ngama atewah nerãngma ethakoh a ngama ngamek,

²⁷ chenrãngma ngako, Wama nenâng hun ehèn. Atema nenâng hun ehènpa nema nganâng hundi ngale nga a Joban tâwah kaerâng ngama nganâng putedâlemdi hun ehèn.

²⁸ Nga a hahtokkhoh ko Wa tâwah kaerâng; ngale ade phumma Ngama hahtokkhoh pa phethien lekma Wa tânâng wãngekang.”

²⁹ Ephumma ate dijunte hehma atenâng ngatwah, “Athângheh nangma nginthakthô demnâng ledang thangma nima jetli thôkoh ehi.

³⁰ Nima athângheh lâjettih, nangma chentôpa jet eko; nangnâng henma komin nginthôngphâ mehun ako, thinma thôngphâ mama nangma rângdânthango. Erejunko nanga Joban tâwah kaero ngama nima putedâlem eki.”

³¹ Jisu ma thinnâng dânthâng wah, “Nema athângheh ba putedâlem ehane?

³² Nekhu phangtang phânchhoan sanpoat pa ehûra, ngale erepa lâhûtha, nekhu anga nga mâmâ humnâng phanchhoan letma ngalolo ephe thienha. Rohkomin nga a linlinko ngalolo dangmek, chenrãngma ngako Ewa nga demnâng tonghang.

³³ Ngama nenâng areheh thôkoh ekapa nga demnâng dangletma mêmo chenchoh en ngama thôkoh eka. Hahtokkhoh ma nenâng echêmthuk hèn. Rohkomin hung dongdong dangen! Ngama hahtokkhoh pa lâjientek!”