JON MA RAANGWAH NGINKONGSEN 15 - NIEMNYAN Naga NT (BSI)

Jisu pa Angur Linlin

¹ “Nga a angur linlin, ngale Ngawa pa bãngthong pânte.

² Atema ngawah penri leri bãngphak chentôpa doakphe eka, ngale penri rite bãngphak chentôpa pân reka, erohkoba senthemthem donglahma penri ajah eria.

³ Ngama nenâng hethôeka jabkhab pumma ne lâsâsietthen.

⁴ Nga demnângjû dangen, ngale ngamin ne demnângjû danglekma etongang. Bãngphak pumma ate dedema penri jienhong rimah; bãng demkojû danglahma metong ekoba penri jienhong rimin. Ererãngrãng nemin nga demnângjû dangletma letong kenko nema penri jienrimet.

⁵ “Nga a angurbãng, ngale nea bãngphak. Henhen nga demnângjû danglahma tongeka, ngale ngamin hen demnângjû danglekma tongekãnga, erehehma penri ajah eria; chenrãngma ngako nga aho thangma nema chennimin leta momin.

⁶ Henhen nga demnângjû lejohdang thangma dangeka ereheh a petphe lahma bãngphak choakjâwah rãngrãng echoakjâa; Arerãngrãng bãngphak heh khôantoan lahma wennâng phêkatmin, ngale ere wenko jemkhâm erewak a.

⁷ Nea nga demnângjû medang enko ngale nga jabkhab pemin ne demnângjû medang hènko, nema chenni komin hun letma metha enko, erepa nema echoh en.

⁸ Ngawa mîndông pa nema penri ajah rijunko ekhesok a; ngale erohkoba nemin ngadijunte eta dangen.

⁹ Wama nganâng hun ehang rãngrãng ngamemin nenâng huneka; erohwah ngawah hunkojû tongen.

¹⁰ Ngama chenroh Ewa hôkum keplekma ate hunkojû danglekma tong ekanga, ererãngrãng nemin nga hôkumpa kepletma ngawah hunkojû dangletma tongen.

¹¹ “Ngama nenâng are thôkoh ekapa, nga ngewah khuhah linlinpa nema kepletma, nehung khennâng nyahrãng khuhah nâhah chendangen ngama thôkoh eka.

¹² Nga ngewah hôkumpa arepa: Ngama nenâng chenroh huneka, ererãngrãng nekhumin wathema wathe nâng hunmîn en.

¹³ Nema ne lemruchha nâng hun achet kowah adongthôanpa thinrãngma ne roandông kohpa.

¹⁴ Ngale ngama nenâng chenni chieneka erepa nema memo enko nea ngalemruchha.

¹⁵ Ngama nenâng haa ngama rootumah, chenrãngma ngako thin tângtewa pumma chenni moeka erepa haa hehma jetmah. Erohwah, ngama nenâng lemruchha ngama rooeka, chenrãngma ngako ngama Ewa wah chentô chohtat ekanga ereheh phangtang nenâng thôkoh eka.

¹⁶ Nema nga rên dangmahha; Ngameba ne renlahma chenthumin lechhihjâ thangma lektôngli penri richhoanthuk eka. Ngale ngamînko Wa ngewah nema chenni thaeken a ereheh atema ekohhèn.

¹⁷ Erohwah ngama arepa nenâng chieneka: wathema wathe nâng hunmîn en.

Hahtokkhoh wah hehma Chhihchoh

¹⁸ “Hahtokkhoh ma nenâng mechhihchoh hènko, thonghun en, khebengko nganâng chhihchoh ehang.

¹⁹ Nea hahtokkhoh rãng medang enko, hahtokkhoh ma nenâng aterãng dângdi ehunhèn. Rohkomin ngama nea are hahtokkhoh wah ren eka, ngale nea hahtokkhoh rãng dangmet; erohwah hahtokkhoh ma nenâng chhihchoh ehèn.

²⁰ Ngama nenâng chenni thôkotah a ereheh thonghuntan en: ‘Haaheh thin tângtewa noma adong dangmah.’ Mihnyan hehma nganâng mechêmsiet hangko, thinma nemin echêmsiet hèn; ngale ngama hethô ekangpa thinma mekep ako, thinma ne nginmin ekephèn.

²¹ Rohkomin nea ngarãng dângdi are chentôpa thinma nenâng ehôan ejôan hèn; chenrãngma ngako ngachienkatte pa thinma jetmah.

²² Nga kalekma hahtokkhoh wah mihnyan hehnâng lethôkoh ngako thinnâng pap aho dângmin wah; Ade phumma thinpap heh map lekohtumin.

²³ Henhenma nganâng chhihchoh ehanga nga Wa nangmin chhihchoh eka.

²⁴ Henmemin lethat moli moatlem heh ngama thin tânâng lemo ngako thinnâng pap aho dângmin wah; phumma ngama chenni moekanga erepa thinma lâkhetah, rohkomin thinma Ewa chheni waniinii nâng chhihchoh ehi.

²⁵ Arepa metkep dângmin, erohkoba thin Niem nâng chenni raangtah a erepa toangtang edanga: ‘Thinma nganâng ledangli nâng chhihchoh ehang.’

²⁶ “Achohsokte Ju ekara, atema Wa tâwah kalahma Joban toangtang pa ekhesok kahèn. Ngale atea ngama Wa tâwah nekhu tânâng echienkat râng, ngale atema nenâng ngangin ethôkoh hèn.

²⁷ Ngale nememin nga nginpa mihnâng ethôkoh en, chenrãngma ngako nea khebengma nga demnângjû.