JON MA RAANGWAH NGINKONGSEN 14 - NIEMNYAN Naga NT (BSI)

Jisu pa Wa tânâng Wângthin Lemkhô

¹ Jisu ma thinnâng thôkoh wah. “Neksekmah patrii en,” “Joban nâng putedâlem en ngale nganângmin putedâlem ha.”

² Ewa humnâng the jahmõang tonga, ngale nga nerãng the khoakhêm kohrãng wãngekang. Ereko the aho dângnomeko ngama nenâng lethôkoh minwah.

³ Ngale nga wãnglekma nerãng the khoakhêm kohdiko, Nga ngakka lekma nga demnâng esietwên a, ephumma nga chenko dangekanga eretheko nemin eta wãngrên.

⁴ Ngawãng ekang theko wângthin lempa nemajet en.”

⁵ Thomas ma ngatwah, “Teso, nang chenko dangekoa erepa nima jetmih; phumma nang wãngeko theko ni hokwângrãng lempa chenroh jienjetmin a?”

⁶ Jisu ma atenâng dânthâng wah, “Nga a Lemkhô, toangtang, ngale roandông; Wa tânâng henjô leta wãngmin, ngajunma lolojôba Wa tânâng tâwâng min.

⁷ Atema thinnâng ngatwah, Nema athângheh nga lâjettha,” “Ngale nema Ngawa min ejet en, ade phumma nema atemin lâjettet ngale lâkhetet.”

⁸ Filip ma atenâng ngatwah, “Teso, Wa pa ninâng khesok hi; ere khepa lolojôba nima huneki.”

⁹ Jisu ma dânthâng wah, “Filip, chenthu thuma nga nekhu demnâng dângwah; rohkomin athângheh nângmin nangma nga majet ehangne? Henhenma ngakhe ehanga erehehma Wamin lâkhetah. Nangma chenrãngma, ‘Wa pa ninâng khesok hi’ ngaekoa?

¹⁰ Filip, nga a Wa demnâng ngale Wa pa nga demnâng, erepa nangma putedâlem mohne? Jisu ma ate dijunte hehnâng ngatwah, Ngama nenâng thôkoh eka jabkhab pa ngadede wah loatjab dangmek.” Ngadem wah johtôngte Wama atedede moatlempa moeka.

¹¹ Wa pa nga demnâng ngale nga a Wa demnâng ngama ngatko nganâng putedâlem ha. Eroh komin leputedâlem medang hako, ngama moekang moatlem heh junma komin putedâlem ha.

¹² Ngama toangtang thôkoh eka: henhenma nganâng putedâlem ehanga erehehma ngama chenni moatlem moekanga ereheh emowak a, ngale erenoma moatlem dongmin eta mowak a, chenrãngma ngako Nga a Wa tânâng wãngekang.

¹³ Ngale nema ngamînko chenjô metha enkomin erepa ngama emokoh a, erohkoba Chha junma Wa mîndong lahma ekhe en.

¹⁴ Nema ngamînko chenjô metha enkomin, erepa ngama emo ang.

Asâthôanju kohrãng Toamsem

¹⁵ “Nema nganâng mehun hako, nema nga hôkum pa ekep en.

¹⁶ Ngama Wa wah etha ang, ngale atema nenâng chohsokte ahan ekohhèn, erepa nedemnâng roantang roangjêng rãng ejohtonghen.

¹⁷ Atea Ju, ngale atema Joban toangtang pa eloatsiet katra. Hahtokkhoh wah hehma ate kepmah, chenrãngma ngako thinma ate khemah ngale ajetmin jetmah. Rohkomin nema ate jet eken, chenrãngma ngako atea nedemnâng johtong ehèn ngale ne khennâng tong ehèn.

¹⁸ “Chenthu nga mewãng tekko, ngama ne lolo phethienmah; Nga netânâng engak karâng.

¹⁹ Chuthe diko hahtokkhoh wah hehma nga lekhe tumin, rohkomin nema nga ekheha; chenrãngma ngako nga a ahîn erohwah nemin ehin en.

²⁰ Chenthu ere rangwo pa mehû theko, nema nga a Ewa demnâng ngale nea nga demnâng, erediko Ngamin nedemnâng dangekang pa ejet en.

²¹ “Henhenma nga hôkum pa keplahma erejunko dangeka ereheh nganâng hunte. Henhenma nganâng hun ehanga ereheh nâng Ngawa memin ehun a; Ngamemin thinnâng ehun ang ngale ngadede min thinnâng ekherii ang.”

²² Juda (rohkomin Juda Iskarot pa dangmah) erepumma ma ngatwah, “Teso, nanga hahtokkhoh wah hehnâng lekherii thangma ninâng lolo chenroh jienkherit min a?”

²³ Jisu ma atenâng dânthâng wah, “Henhenma nganâng hun ehanga erehehma ngama hethô ekang nginpa ekep a. Ngawa memin thinnâng ehun a, ngale Ewa chenii thin tânâng kalihma thin demnâng ejoh songkae.

²⁴ Henhenma nganâng hunmahhang a erehehma ngama hethô ekang ngin pemin kepmah. Ngale nematat ekenpa nga ngewah hethô dangmek, erepa Ngachienkatte Wa ngewah hethôeka.

²⁵ “Ngama areheh nedemnâng dângpoatko thôkoh eka.

²⁶ Wama ngamînko nenâng chohsokrãng Asâthôanju echien katra, ngale atema nenâng chentôpa ehethô hèn, ngale ngama nenâng chentô thôkotah a, ereheh phangtang ethonghun thuk hèn.

²⁷ “Mêmo pa ngama nenâng phethien koheka; erepa ngadede ngewah mêmo koheka. Ngama erepa hahtokkhoh ma koheka rãngrãng koh dangmek. Nekpatrii sekmah en; ngale acheimin nekchei en.

²⁸ Ngama nenâng thôkoh pa nema lâtattet, ‘Nga chhoan ekang, rohkomin nga netânâng engakkarâng.’ Nema nganâng mehun hako, Nga a Wa tânâng wângdi nerin eroan en; chenrãngma ngako atea Nga noma adong.

²⁹ Ngama athângheh nenâng areheh phangtang linlin hongdâng mako thôkoh eka, erohwah chenthu areheh mehong dangwãng theko, nema eputedâlem en.

³⁰ Nga nekhu demnâng ajah talek jabmîn tumah, chenrãngma ngako are hahtokkhoh pênte pa lâhûtha. Rohkomin atema nganâng chennimin tare mahhang,

³¹ Phumma ngama Wa nâng hun ekang ngama hahtokkhoh wah hehma jetmin; erohwah chentôpa atema nganâng chenroh thôkoh ehanga eroh ngama moekang. “Chepen, are thekowah chhoan e.