JON MA RAANGWAH NGINKONGSEN 12 - NIEMNYAN Naga NT (BSI)

Bathani Hahnâng Jisu nâng Tienma Lokkoh

¹ Adankhoam lokuh rãng jâerok mako, Bathani hahwah atema riichoanwah ngakhinsiettah mihwa Lazaras humko Jisu hokwah.

² Thinma ere humko Jisu rãng rangjâ phhekchhah khoakhêm kohwah, phhekchhah kohtepa Martha dângwah; ngale Lazaras min Jisu demko johphhekchhah lahma dângwah.

³ Phumma Mariam ma nard bãngrin wah hôanwah tien thãchaanjat kephû lahma Jisu dako lokkohwah, ngale ate khochoo ma choakhutkoh rewah. Ngale tien pumma hum tangma tûmsietwah.

⁴ Jisu dijunte wathe, ate mînpa Juda Iskarot ate chênsângte pumma ngatwah,

⁵ “Are tienpa chârem ngun nâng sângminwah ngale ere ngunpa tangchhih hehnâng kohminwah”

⁶ Atema arepa tangchhih hehnâng mînchen lahma ngatwah dangmah, atea ahuh dângkowah ngatwah. Atea ngun thiente dâng phumma ere ngun kowah atedede rãng chîkepwah.

⁷ Phumma Jisu ma ngatwah, “Nekchhihsû en, ate hunsiko thien en! Atema nga ritjâ rangwo rãngma chenni moeka erepa chenmoa.

⁸ Nema ne demko tangchhih heh roantangma echoh en, rohkomin nema nga roantang chohmahha.”

Lazaras Lelatnâng Ranchep

⁹ Jahmõang mihnyan hehma Jisu Bathani hahnâng tonga ngama chohtatwah, ephumma thin Bathani hahnâng katwah, Jisu tânâng lolo ledang atema aritwah ngakhinsiettah Lazaras sokrãng memin katwah.

¹⁰ Ephumma soam aroakte adong hehma Lazaras min ritphe rãng themawa wah,

¹¹ chenrãngma ngako ate junma ajahthem Jews hehma thinnâng leputetu thangma Jisu nâng putedâlem wah.

Tajien lahma Jeroselem nâng Hok

¹² Eredijâko jahmõang mihnyan Adankhoam lokuh rãng hokte hehma Jisu Jeroselem nâng hûera ngama chohtatwah

¹³ Ephumma thinma Pam bãngphak heh semlahma Jisu chohmînrãng katwah, thinma, “Joban nâng rôe! Teso mînko hokte nâng Joban ma rangkoh eka! Joban ma Isrial Lowang nâng rangkoh eka!” ngama rakwah.

¹⁴ Joban nyapraangma ngaeka rãngrãng, Jisu ma Gado chha choh lahma ere khohko chhangwah,

¹⁵ “Zion chha heh, nekchei en! Ne Lowang pa lâhûtha, Gado chha khohko chhang lahma hûera.”

¹⁶ Ere sanpoatko ate dijunte hehma arepa jetloho; phumma Jisu ritwah Joban chaan chohlahma ngakhîn diko Joban nyapraangma arepa ate junma ngatwah ngale thinmemin arepa aterãng moatwah ngama thônghun wah.

¹⁷ Jisu ma Lazaras mangruk wah rookat lahma ritwah ngakhinsiettah poatko ate demnâng dangtah mihnyan hehma Jisu ma chenni retah a ereheh thôkoh wah.

¹⁸ Ere junko mihnyan heh ate demnâng chohmînwah - chenrãngma ngako Jisu ma are patritli moatlem moeka pa thinma chohtatwah.

¹⁹ Ephumma Farasi heh jabmînwah, “Thatsûtan en, nãngma tajek tãngmih! rangkhenpa phangtang ate diko jun eka!”

Griik hehma Jisu Lêm

²⁰ Lokuh poatko Jeroselem nâng rangsoam rãng katte heh demnâng Griik jatmin khuthe dângwah.

²¹ Thinma Filip tânâng wãng lahma (atea Galilijaa wah Batsida hah wah dângwah) ngatwah, “Hethôte, nimemin Jisu demnâng chohmînhun eki.”

²² Filip wãng lahma Andru nâng thôkoh wah, ngale ere waniipa wãng lahma Jisu nâng thôkoh wah.

²³ Jisu ma thinnâng dânthâng wah, “Mihnyan Chhama Joban wah nyahrãng chaandong choh sanpoat pa thângheh lâhûtha.

²⁴ Ngama toangtang thôkoh eka: chhahpha pa hahko wênkat lahma leriikako phathelolo jôba dângmin. Erepa meriiako jôba, erekowah chhahpha ahan ajah ehonga.

²⁵ Henhenma thindede roandôngko huneka erehehma mahphe erea; henhenma are hahtokkhoh ko thin roandôngko lehun dangeka erehehma thin roandông pemin lemahphe thangma roantang roanjêng roandông echoh a.

²⁶ Henhenma ngadijun hun ehanga erehehma chenjunhang, erohkoba nga chenko dang ekanga eretheko ngahaa pemin edanga. Ngale henma nga khoakhem ehanga erepa nga Wa memin atenâng echhoanpôan a.

Jisu ma ate Rit Ngin Jab

²⁷ “Athângheh ngahungpa nyahrãng chêm ekang - ngale ngama chenni jab anga? ‘Wa, are sanpoat pa nga khohnâng nekhu thukro’ ngama jabanga? Rohkomin ererãngma nga katwah - erohwah Ngama are chêm sanpoat pa chohmin jôba.

²⁸ Wa, nangmînpa dongthuk e!” Erediko rangkho wah jabkhab jabkatwah, “Ngama Wa mînpa lâdong thuktek, ngale ademin edongthuk ang.”

²⁹ Erekowah chepte mihnyan hehma ere jabkhab pa tatwah, phumma khaka hehma rangmok eka ngama ngatwah, erediko khaka hehma, “Atenâng rangkhethung wah Joban ngintatte hehma jabkat eka!” ngatwah.

³⁰ Rohkomin Jisu ma thinnâng ngatwah, “Are jabkhab hongjab ekapa ngarãngma dangmah, nekhurãng sênrãngma hongjab eka.

³¹ Athângheh are hahtokkhoh pa achhih asen rên sanpoat pa; ngale are hahtokkhoh pênte juchhihpa rephe sanpoat.

³² Chenthu nga are hahtokkhoh kowah metoansietwên thangko, Ngama chentôpa ngatânâng sietwêmin.”

³³ (Jisu ma arepa ate chenroh ritmin a erengin pa thôkoh wah.)

³⁴ Mihnyan hehma dânthâng wah, “Ni Niemma Misaia pa roantang roangjêng rãng hînmin ngama thôkoh ehi. Nangma Mihnyan Chhapa tôansietwên min ngama chenroh jiennga eko? Mihnyan Chhapa hen a?”

³⁵ Jisu ma dânthâng wah, “Wenphiak pa nekhu demko chutherãng tôngmin. Erohwah nema wenphiak pa chohpoatko khoam en, erohkoba nenâng rangnyek ma lelep edanghèn; chenrãngma ngako rangnyek nâng henkhoam eka erepumma ate chennâng chhoan eka erepa jetmah.

³⁶ Nema wenphiak pa chohpoatko wenphiakko dâlem en, erohkoba nea wenphiak chha edangen.” Jisu ma areheh ngatdiko, thintâwah chhoan lahma bîntông chhoanwah.

Mihnyan hehma Putedâlem wah

³⁷ Jisu ma thintâko are chentô patritli hehjô memo akomin, thinma atenâng putedâlem ho,

³⁸ Erohwah mõng Isaia ma chenni jabtah a ereheh toangtang dângwah: “Teso, nima thôkoh eki nginko henma putedâlem eka? Teso ma hennâng ate chaanpa khesoktah a?”

³⁹ Ngale thinma putedâlem ho, chenrãngma ngako Isaia ma ngatwah,

⁴⁰ “Joban ma thinmit pa doaksiet eka ngale thinhung pa basiet eka, erohwah thinmitma khe mah, ngale thinhung memin tajet mah, ngale Joban ma ngaeka, ngama thin sênsiet rãngma, thin ngatânâng hûmahra.”

⁴¹ Chenrãngma ngako Isaia ma are jabkhab jab ekapa atema Jisu mîndôngpa khelahma Jisu junma jabwah.

⁴² Eroh akomin ajahthem Jews thôte jabte hehmemin Jisu nâng putedâlem wah; rohkomin Farasi hehma Sanagog wah nekchen junlo ehi ngama thinma mihheh tânâng chinloat jabho.

⁴³ Thinma Joban wah rô chohhun noma mihnyan hehwah rô chohba hunwah.

Jisu Jabkhab ma Achhih Asen pa Ren eka

⁴⁴ Jisu ma chaanmõang rakjabwah, “Henhenma nganâng putedâlem ehanga erepa nganâng lolo putedâlem dangmah, ngachienkatte komin putedâlem eka.

⁴⁵ Henhenma nga khe ehanga erepumma ngachienkatte pemin khe eka.

⁴⁶ Nga a hahtokkhoh ko wenphiak rãngrãng kaerâng, erohwah henhenma nganâng putedâlem ehanga ereheh rangnyek khennâng letongtûmin.

⁴⁷ Mihnyan hehma nga nginpa tatlahma lekep medang akomin, ngama thinnâng achhih lengamin. Nga a hahtokkhoh wah mihnyan hehnâng achhih asen rênrãngkat dangmahrâng, mihnyan heh pepâng rãngba kaerâng.

⁴⁸ Henhenma nganâng lepute dâlemte ngale nga nginlekep dangeka ereheh nâng achhih ngate tonga. Ngama jabekang jabkhab pumma athôan jâko thinnâng achhih engawak a!

⁴⁹ Arepa toangtang, chenrãngma ngako, ngama ngadede chaanjunko jab dangmek, rohkomin ngachienkatte Wama ngama chenni jabmin a ereheh thôkoh ehang.

⁵⁰ Ngale ngama ajet ate ngin junko roantang roanjêng roandông choheki. Erohwah, Wama chenni thôkoh ehanga, ereheh ngama jabekang.”