JON MA RAANGWAH NGINKONGSEN 11 - NIEMNYAN Naga NT (BSI)

Lazaras Rit Ngin

¹ Bathani hahnâng sôngte mihnyan wathe ate mînpa Lazaras pa khun rewah. Mariam ngale ate naa Martha niimin erehahko sôngwah.

² (Are Mariam pumma Teso dako tientumli ma lokko lahma ate khochoo pumma choakhut kohwah; phumma are khuntepa ate naa Lazaras dângwah.)

³ Ate khakho pumma Jisu nâng ngin matkatwah: “Teso, nang lemruchhasen pa riitah.”

⁴ Chenthu Jisu ma are nginpa tatphumma atema ngatwah, “Are khun junwah Lazaras leriimin; arepa Joban mîndôngthuk rãngba khun eka, ngale are junko Joban Chha mîn edongthuk a.”

⁵ Jisu ma Martha ngale ate khakho ngale Lazaras nâng nyahrãng hunwah.

⁶ Rohkomin chenthu atema Lazaras khun nginpa chohtat lahmemin leka thangma ate tongtah theko jânii tôngthienwah.

⁷ Erediko atema dijunte hehnâng ngatwah, “Nãng Judia nâng ngakwãnge.”

⁸ Dijunte hehma dânthâng wah, “Hethôte,” “Enângwah mihnyan hehma nang longma ritpetrãng phungtahwah chentô mataang eka; phumma nanga enâng ngakwâng phung ekoa?”

⁹ Jisu ma dânthâng wah, “Jâtheko echhi koantanii dangmahne? Erohwah henhen rangwo poatko khoam eka ereheh dakho lethutrii min, chenrãngma ngako are hahtokkhoh kowah wenphiak pa thinma khe eka.

¹⁰ Rohkomin thin rangnyek nâng mekhoam ako dakho ethut a, chenrãngma ngako thinnâng wenphiak aho.”

¹¹ Jisu ma arepa ngatdiko thinnâng thôkoh wah, “Nãng lemruchha Lazaras pa juplekre eka, phumma nga kalekma ate satsiet katmin.”

¹² Dijunte hehma dânthâng wah, “Teso, atea ajup medang ako, asen erea.”

¹³ Jisu ma Lazaras riitah ngama ngatthiak ngatwah, rohkomin thinma jup nângjô ngathem eka ngama thônghun wah.

¹⁴ Ephumma Jisu ma thinnâng, “Lazaras riitah, ngama thôkoh wah.

¹⁵ Rohkomin nga khuhah ekang, chenrãngma ngako nga ate demko ledangpa nekhurãng asen dangeka, ade phumma nema eputedâlem ha. Nãngkhu ate tânâng kae.”

¹⁶ Thomas (atenâng Didimas ngamemin roowah) ma ate lemru hehnâng ngatwah, “Nãngkhu phangtang nãng hethôte demnâng johkae, erohkoba nãngkhumin ate demnâng ejohriie!”

Jisu pa Arit wah Ngakhînte ngale Roandông

¹⁷ Chenthu Jisu hokkhoam phumma, Lazaras pa rukat tahwah jâbelii lâdangtah ngama tônglâwah.

¹⁸ Bathani hah pa Jeroselem kowah meenii nomemin athe dângwah,

¹⁹ ngale Jews mihnyan heh ajahthem Mariam le Martha tâko thinnaa ritjunko chohmîn hûlahma dângwah.

²⁰ Chenthu Martha ma Jisu lâhûtha ngama chohtat phumma ate lemchohrãng loatchhoan wah, rohkomin Mariam pa humko tônglâwah.

²¹ Martha ma Jisu nâng ngatwah, “Teso, nang anâng dângwah dângnomeko, nganaa pa leriimin wah!

²² Rohkomin ngama jet athâng hehmin nangma Joban wah chenni thaeko erepa ekohho.”

²³ Jisu ma atenâng thôkoh wah, “Nangnaa pa ngakhîn erea,”

²⁴ Martha ma dânthâng wah, “Ngama ajet,” “Athôanjâ rangwo ko ate engakhin a.”

²⁵ Jisu ma atenâng ngatwah, “Nga a ritwah ngakhînte ngale roandông. Nganâng henhenma putedâlem ehanga ereheh ritjô mere akomin, ahîn erea;

²⁶ ngale henhenma nganâng putedâlem lahma tongeka ereheh chenthumin leriimin. Nangma areko putedâlem ekole?”

²⁷ Atema dânthâng wah, “Teso, putedâlem ekang!” “Ngama nanga hahtokkhoh ko katte, Joban Chha Misaia ngamemin putedâlem eki.”

Jisu Sep

²⁸ Martha ma arepa ngatdiko, ngakwãng lahma ate khakho Mariam pa huhchhama roowângwah. Ate khakho nâng thôkoh wah, “Hethôte pa ako tonga,” “ngale atema nang lem eho.”

²⁹ Chenthu Mariam ma tatphumma, toanchep lahma Jisu chohmînrãng sitsiak loatkatwah.

³⁰ (Ere poatko Jisu hahdaang nâng mahuwãng dângwah, ate demnâng Martha chohmîntah theko tonglahma dângwah.)

³¹ Mariam demnâng humko johtongtah mihnyan hehma Mariam tôanchep lahma sitsiak loatchhoan pa khelahma ate diko junchhoan wah. Mariam ma mangruk nâng kalahma sepkatrãng ngaeka ngama thinma thônghun wah.

³² Mariam, Jisu tâko hûka lahma Jisu chohkhe rienrien, Jisu dathongko khupjup katwah. Atema ngatwah, “Teso,” “Nanga anâng dângwah dângnomeko nganaa pa leriiminwah!”

³³ Jisu ma Mariam seplahma khewah, ngale ate demwah mihnyan hehmin seplahma khewah; eko Jisu min nyahrãng hungchhihwah.

³⁴ Jisu ma thinnâng, “Chenriang nâng binkattet a?” ngama chhienwah. Thinma dânthâng wah, “Teso, wãnglohma sûwãng tanro,”

³⁵ Jisu sepwah.

³⁶ Mihnyan hehma ngatwah, “Sûtan en atema chentô huneka!”

³⁷ Rohkomin khaka hehma ngatwah, “Atema mitdoak hehmin sensiettah dangmahne? phumma atema Lazaras ritwah leta ngakhinsiet minne?”

Lazaras ngakhînsiet

³⁸ Eredikomin nyahrãng hung wienthe chhih lahma, Jisu mangruk nâng katwah, mangruk pa longwah thutwah, ngale lupwâng thinko longkhama tangsek lahma dângwah.

³⁹ Jisu ma “Longkhapa rephe en!” ngatwah. Martha aritte nyadem, pumma dânthâng wah, “Teso lânemtah dângmin. Ate binkat tihwah jâbelii lâdangtah!”

⁴⁰ Jisu ma atenâng ngatwah, “Putedâlem mere oko nangma Joban chaanpa echohkheo ngama lethôkoh wahne?”

⁴¹ Thinma longpa rephewah. Jisu ma rangkho nâng sûwên lahma ngatwah, “Wa nangma nganâng chohtatdi dangkoh a ngaeki.

⁴² Ngama ajet nangma roantangma tatkat ehang, rohkomin arekowah mihnyan hehrãng sênrãngma arepa ngaeki, erohkoba nga a nangma chienkatwah ngama thinma eputedâlem a.”

⁴³ Atema arepa ngatdiko, chaanmõang raklahma, “Lazaras, loatkaro!” ngama roowah.

⁴⁴ Ate dek ada heh mangdoapkhet pumma doapkhhek, ngale ate thhenphãng komin khetma doaplahma loatkatwah. Jisu ma thinnâng ngatwah, “Khet heh jânphekoh en,” “ngale chenwãnga.”

Jisu Lelatnâng Ranchep

⁴⁵ Mariam demnâng chohmînrãng jahmõang mihnyan hutah hehma Jisu ma chenni motah a erepa khelahma atenâng putedâlem wah.

⁴⁶ Rohkomin khaka heh ngakchhoan lahma Jisu ma chenni motah a ereheh Farasi hehnâng thôkoh wah.

⁴⁷ Ephumma Farasi le Soam aroakte adong heh ngoang awang heh demnâng chohmîn lahma ngatwah, “Nãngma chenre ea? Are mihnyan pumma patritli moatlem moeka hehnâng thatsûtan en!

⁴⁸ Nãngma arohjû medangthuk eko, chentôma atenâng eputedâlem a, ngale Rom diakma nãngnâng chhihchoh lahma nãng Rangsoamhum ngale nãng diakpa echhihsiet kohhi!”

⁴⁹ Kaipas ngama wathe ere rangpâko atea Soam aroakte adongthôan dângwah, erepumma ngatwah, “Nea talânbatet a!

⁵⁰ Diaktangma chhihjâ noma mihnyan hehrãngma wathe mihnyan ritpeba asen ngama nema chhemhun metne?”

⁵¹ Linlinko ate hungsiwah hôngjabwah dangmah; phumma ere rangpâko atea Soam aroakte hehwah adongthôan dângwah dâng phumma, atema Jisu Jews hehrãngma ritmin ngama Joban ngewah loatjabwah,

⁵² ngale atelolo rãng ledang, Joban nâng putedâlemte mihnyan phoangphan chhoan eka heh wathe mihnyan rãngrãng roamsiet hokrãngma jabwah.

⁵³ Erejâ phumma Jews heh thôte jabte hehma Jisu ritphe rãng themawa wah.

⁵⁴ Ephumma Jisu Judia nâng mihnyan heh mitkheko leloat khoamtu thangma, sehah kêwah Ifariem hahko tôngwângwah, ereko ate dijunte heh demnâng tôngwah.

⁵⁵ Adankhoam lokuh thângnemnem dângwah, ngale mihnyan heh jahmõang thindiakwah Jeroselem nâng lokuh mako seksâsoan niemhôan rãng hokwah.

⁵⁶ Thinma Rangsoamhum ko khôanhû lahma Jisu lemsokwah, thinma wathema wathe nâng chhienmîn wah, “Nangma chenroh thonghun eko? Linlinjô atea lokuh rãng lehû minne?”

⁵⁷ Soam aroakte adong ngale Farasi hehma ngatwah, Jisu chenriang nâng tongeka erepa jette hehma ninâng sitsiak thôhok kohmin, chenrãngma ngako thinma ate loatkhhek rãng ngatwah.