JON MA RAANGWAH NGINKONGSEN 10 - NIEMNYAN Naga NT (BSI)

Saaksokte Thakthô

¹ Jisu ma ngatwah, “Ngama toangtang thôkoh eka: Hen komin Saak heh tânâng kâsek pumma ledang lemhânma mekohûako, erepa ahuhte.

² Henhen kâsek pumma luphueka ere peba Saaksokte.

³ Kâsek bemte pumma aterãng kâsekpa elaangkoh a; ngale atema saak hehnâng mînma roko saak hehma ate kahra pa etat a, ngale atema esen chhoan a.

⁴ Chenthu atema mesen chhoan ako, saak heh mamako ate ekhoam a, ngale saak hehmin atediko ejûnkhoam a, chenrãngma ngako thinma ate kahra pa jîn eka.

⁵ Thinma mihhândi lejûnmin; erenoma, ererãngrãng mihnyan heh tâwah huhchhoan erea, chenrãngma ngako, thinma ate kahra jînmah.”

⁶ Jisu ma thinnâng are nginthakthô pa thôkoh wah, rohkomin atema chenni nâng ngaeka erepa thinma jetmah.

Jisu Pa Saaksokte Sen

⁷ Ephumma Jisu ma wîenthe ngatwah, “Ngama toangtang thôkoh eka: Nga a saak hehrãngma kâsek.

⁸ Ngamawah katte heh phangtang ahuh tuta, ngale saak hehma thinngin kepmah.

⁹ Nga a kâsek. Henhen nga kâsekkam pumma humkhen nâng lupwãng eka ereheh khope chohmin; thin a humkhen nâng wãng lahmemin ngakloat chhoan lahma thinma phem echohphhek a.

¹⁰ Ahuhte heh ahuhrãng, ngale ritphe rãng, erediko chhihsiet rãng lolo ehûra. Nga a nema roandông chenmamchoh en ngama hûerâng - chenni nângmin lethoam lethang roandông chenmamchoh en ngama hûerâng.

¹¹ “Nga a saaksokte sen, ngale saak hehrãngma ritmin tariiang.

¹² Saaksokte ngale saaktangte ledang thãkoh lahma thieneka mihnyan pumma chenthu soan mekhe ako atema saak heh phethien lahma huhchhoan erea; ephumma soan hehma saak heh kek lahma ephan chhoanthuk a.

¹³ Thã kohlahma thieneka mihnyan pa huhchhoan erea, chenrãngma ngako atea thã nângba moeka, atema saak hehrãngma patriimah.

^14-15 Nga a saaksokte sen. Ewa ma nga jet ehang rãngrãng, ngamemin Ewa jet ekang, ererãngrãngjô ngama ngasaak heh jet ang, ngale ngasaak hehmemin nga jethang. Ngamin ngasaak hehrãngma ritmin tariiang.

¹⁶ Are saak chhangko ledangte ngasaak ahan nângmin tonga. Ngama erehehmin metkep siethokmin; thinmemin nga kahra tatlahma saaksokte wanthe khennâng khuthe dângtumin.

¹⁷ “Wama nganâng hun ehang, chenrãngma ngako ngama nga roandôngpa koh ekang. Ngama ade ditthe ngakchohrãng nga roandôngpa koh ekang.

¹⁸ Henmemin nga roandôngpa nga ngewah tanyen mahhang. Ngama ngadede hungsima koh ekang. Ngama akohmin takoh ang, ngale ngakkepmin tare ang. Ngawama nganâng aroh moatrãng chien ehang.”

¹⁹ Eredikomin are jabkhab junko thintungnâng mâmâ khukhu dângjâwah.

²⁰ Melâng mihnyan hehma atenâng ngatwah, “juchhih lup eka! Ngale apâ reka! ate ngin chenrãngma kep eken a?”

²¹ Rohkomin khaka hehma ngatwah, “Juchhih lupte mihnyan ma arerãngrãng jienjabmah! Juchhih ma mihnyan mitdoak pa chenroh jiensensiet koh a?”

Jisu nâng Thãjô

²² Arepa rangpa nâng dângwah, ngale Jeroselem wah Rangsoamhum wâng niemhôan lokuh dângwah.

²³ Rangsoamhum wah Solomon Kânthong ngama ngaeka theko Jisu phoangkhoam lahma dângwah,

²⁴ Mihnyan heh ate tumlitko khôanhu lahma atenâng chhienwah, “Nangma ni chentô lektûngmaang thukmin a? Ninâng laangthôkoh ehi: Nanga Misaia dangole?”

²⁵ Jisu ma dânthâng wah, “Ngama nenâng râthôkotah, rohkomin nema nganâng putedâlem mahha. Ngama Ewa ma chien ehang moatlem moekang pumma ngarãngma jabeka;

²⁶ roh akomin nema putedâlem met, chenrãngma ngako nea ngasaak dangmet.

²⁷ Ngasaak hehma ngakahra pa tateka; Ngamemin thin jet ang, ngale thinma ngadijun ehang.

²⁸ Ngama thinnâng roantang roanjêng roandông koh ekang, ngale thin chenthumin leriimin. Henmemin thin a ngadek wah leta nyenchhoanmin.

²⁹ Ngawama nganâng chenni koh ehanga erepa chenni nomemin adongthôan, ngale henmemin Wa dekwah leta nyenchhoan min.

³⁰ Ewa chenii a wanthe.”

³¹ Erediko mihnyan hehma atenâng petrãngma long tôanwah.

³² Jisu ma thinnâng ngatwah, “Wama nganâng mothukthang moatlemsen ajahthem ne mathahko mokotah; erehehwah chenre moatlemsen moatthã nema nga ritpetãng huneha?”

³³ Thinma dânthâng wah, “Nima nangnâng moatlemsen moatthã ritpethun dangmih, nangma Joban thãsê jabkhab jabthãba ritpetrãng ngaeki! Nanga mihnyan danglohma, nangdede Joban rãng dângrit huneko!”

³⁴ Jisu ma dânthâng wah, “Ne Niem nâng, Joban ma atenâng ‘Nanga Joban’ ngama raanglahma tonga.

³⁵ Nãngma ajet Joban nyapraangma chenni ngaeka erepa roantang roangjêng rãng toangtang; ngale Joban ma ate ngin thôkotah mihnyan hehnâng joban ngawak eka.

³⁶ Nga dangeka, Wama renlahma hahtokkhoh ko chienkat ehang. Phumma ngama nga a Joban Chha ngatrãngma nema nganâng chenroh Joban thãse eko ngama jienngaeha?

³⁷ Ewa ma mothuk ehang moatlempa ngama lemo medang angko nganâng nekpute dâlemha.

³⁸ Rohkomin ngama erehehjô memo angkomin nema nganâng putedâlem mahha, nganângjô leputedâlem eha komin, ngama moekang moatlem hehnâng putedâlem letmeko, nema Ewa pa nga demnâng ngale nga a Ewa demnâng ngama chenjettet.”

³⁹ Eredikomin rekthe thinma Jisu loatrãng hunwah, rohkomin thindekwah Jisu pechhoanwah.

⁴⁰ Erediko Jisu Jordanjo rankawah Jon ma baptijem koheka theko thengak wângwah, ngale ate eretheko tôngwah.

⁴¹ Eretheko ate tânâng ajahthem mihnyan hokwah. Thinma ngatwah, “Jon ma chenni patritli moatlemjô momah, rohkomin atema are mihnyan junma chenni ngatah a ereheh phangtang toangtang.”

⁴² Ngale ajahthem mihnyan hehma atenâng putedâlem wah.