JEMS 5 - NIEMNYAN Naga NT (BSI)

Techhu hehnâng Ritngat

¹ Ngale ade dangeka, techhu hehma Ngangin ko jetat tanha! Nekhu khohnâng hokmin chêmchei hehrãngma sep ajôangre en!

² Ne ngun akem heh sãnjâtah, ngale nekhet akhu hehmin thup adõngma lâphhektah.

³ Ne ngun akem hehmin chhinma lâphhek kohthen, ngale are chhin pumma chhihphhek eka junma nea achhih ngama jeteka, ngale ere chhin pumma nephoang hehmin wenma jêmkhâm rãngrãng ephhek hèn. Nema ngun akem heh are rãngkuh sanha thôanthâng sanpoatko khôanbi eken.

⁴ Nema nepit wah dekbi biite hehnângmin dekbi thã kohmet. Thinma ne lelatnâng jabeka nginpa jetattan en! Ne chhah khôankhen kohte mihnyan heh sepjôangpa Chentô noma achaanthôan Teso Joban nânâng lâhûtah.

⁵ Are hahtokkhoh kowah ne roangdôngko ngun akem lolo chenni nângjô lesekmah thangma khuhah nâhah tongeken. Nededema ne ritphejâ rangwo korãng tetjoakrii eken.

⁶ Nema chenni nângjô lethete mihnyansen hehnâng achhih ngaletma ritphe eken, ngale thinma nenâng jektãng mahhèn.

Hungmông Rinmông ngale Rangsoam

⁷ Ngalemruchha heh, Teso mangak ngaka hung arin môngmông tongen. Thatsû tan en, pitmoatte hehma thinpit wah chhah heh mamun munwãng chenroh rângbem a. Thinma rangcho chobengwah rangpat ngale chojekwah rangpat heh thin pitwah chhah hehrãngma hung arin môngmông danglahma rângbemla a.

⁸ Ererãngrãng nemin hung arin môngmông tongen. Ne dâlem pa senthemthem dangen, chenrãngma ngako Teso ngakkat rangwopa lânamtha.

⁹ Ngalemruchha heh, wathema wathemîn nekchhih thômîn en, eroh medang enkoba Joban ma nenâng achhih ngama lenga edanghèn. Aren rangwopa lânam hutha, ngale lâhong eka.

¹⁰ Ngalemruchha heh, Teso mînko jabte mõng hehnâng thatthong hun tan en. Thin chenroh hung arin môngmông dangtah a, ngale chêmchei heh chenroh tadô tah a, ereheh nâng thatsû letma nemin thin rãngrãng dangen.

¹¹ Thinma chêmchei heh tâdôdi nãngma thinnâng rangkepte ngama rooeki. Job ma chenroh tadôtah a erepa nema lâchohtattet, ngale nemajet athôanko Teso ma atenâng chentô chohkohtah a. Chenrãngma ngako Teso nâng mînchen ngale hun achet pa jahmõang tonga.

¹² Ngalemruchha heh, chentô noma alemthôan pa, chenthu nema toamsêm poatko, rang ahah mîn kepletma min neksem en, erediko chennimîn keplet mejô neksem en. Nema meta enko, “Tamo ang” ngaen, ba letamoli medang ako, “Tamomek” ngaen, eroh medang enkoba nekhoh nâng Joban ma achhih lenga edanghèn.

¹³ Hen akomin nekhuwah chêmcheite tongen a? Eroh metong enko rangsoam en. Ngale hen akomin nekhuwah khuhahte tongen a? Eroh metong enko nema Joban nâng rôsê se en.

¹⁴ Nekhuwah hen akomin khunte tongen a? nema Asâthem khhepho heh roochhoanthuk en, ngale thinma Teso mînko khunte hehnâng Oliv tienma hutko lahma rang chensoamkoh a.

¹⁵ Putedâlem lahma thinrãng rangsoam koheka junko khunte pa ame erea; Teso ma thinphoang pa engaksensiet a, ngale thinma pap motah hehmin map echoh a.

¹⁶ Erohwah, nepap heh wathema wathe nâng thômîn koletma map thamîn en, ngale wathema watherãng rangsoammîn koh en, erohkoba ne khoanchet heh esen en. Joban nâng putedâlemte mihnyansen heh rangsoam pa nyahrãng chaanwin.

¹⁷ Ilija min nãngkhu rãngrãng mihnyan jôba dângwah. Atema nyahrãng hung kohlahma rang nekchenpat eka ngama rangsoam wah, phumma pârem khathe hahtokkhoh ko rang lepat dângwah.

¹⁸ Eredikomin depthe atema rang chenpat a ngama rangsoam wah, phumma rangkho wah rangpat patka lahma hahko too achhah sênwah.

¹⁹ Ngalemruchha heh, nekhuwah hen komin toangtang kowah kechhoan letma mihhan wathema methe ngaksiet hû hènko,

²⁰ are nginpa thonghun en: Henma akomin papi mihnyan pa lemkhôchhih wah mengak siethû ako atema papi mihnyan Jupa ritwah pesiet eka ngale ajahthem pap hehmin map chohthuk eka.